DISYEMBRE 8, 2022
BALITA SA BUONG DAIGDIG

Nahatulang Mabilanggo Nang Anim na Taon Sina Brother Dubovenko at Litvinyuk

I-PLAY

Noong Nobyembre 30, 2022, hinatulan ng Armyanskiy City Court of the Republic of Crimea sina Brother Aleksandr Dubovenko at Aleksandr Litvinyuk. Nahatulang makulong nang anim na taon ang dalawang brother at agad na ikinulong.

Profile

Aleksandr Dubovenko

Ipinanganak: 1973 (Ochakiv, Ukraine)

Maikling Impormasyon: Nagtrabaho bilang welder, electrician, at karpintero. Napangasawa si Irina noong 1999

Nalaman ang katotohanan nang maging Saksi ni Jehova ang nanay niya. Tuwang-tuwa siya nang malaman niya ang pangako ng Bibliya na magiging paraiso ang lupa. Nabautismuhan noong 1999

Personal na mga Komento a

Paano mo natiis ang kalagayan habang naka-house arrest ka?

Bawal akong makipag-usap kaninuman sa labas ng bahay ko maliban sa mga imbestigador o abogado sa loob ng mahigit 13 buwan. Bawal pa rin akong makipag-usap sa mga kapatid na saksi sa kaso ko. Pero iniisip ko ang halimbawa ni Elias. Nasa ilang siya at lungkot na lungkot. Pinalakas siya ni Jehova at tiniyak sa kaniya na hindi siya nag-iisa. Hindi iniwan ni Jehova si Elias, at kumbinsido ako na hindi rin Niya ako iiwan.

Aleksandr Litvinyuk

Ipinanganak: 1960 (Amangeldi, Kazakhstan)

Maikling Impormasyon: Nagtrabaho sa isang planta ng kemikal at bilang isang welder. Napangasawa si Nadezhda noong 1979. Mayroon silang dalawang anak na lalaki at isang anak na babae

Naisip niya kung bakit pinahihintulutan ng Diyos ang kahirapan at kasamaan. Nalaman ang sagot pagkatapos nilang mag-aral ni Nadezhda ng Bibliya sa mga Saksi ni Jehova. Nabautismuhan noong 1993

Personal na mga Komento b

Paano mo pinaghandaan ang pag-uusig?

Nang mabalitaan ko ang nangyayari sa mga kapatid, naisip ko kung matitiis ko rin ba ang pag-uusig. Nasabi ko na hindi pa ako handa. Sinimulan kong basahin at bulay-bulayin ang mga ulat ng Bibliya tungkol sa mga nagtiis ng mahihirap na pagsubok. Pinag-aralan ko kung paano sila nakapagtiis at nagtiwala kay Jehova. Ni-research ko ang mga ulat na ito at sinikap kong gawin silang totoo sa isip ko. Binasa rin naming mag-asawa ang mga talambuhay ng tapat na mga kapatid ngayon. Napatibay nito ang pananampalataya namin at naging mas handa kami sa puwedeng mangyari.

Paano nakatulong sa inyo ang panalangin ng iba para sa inyo?

Naiiyak ako kapag naririnig ko kung gaano karubdob nananalangin para sa akin ang mga kapatid. Hinihiling nila kay Jehova na gawin akong kalmado at bigyan ako ng lakas ng loob na kailangan ko. Bago magsimula ang bawat pagdinig sa korte, tatanungin ako ng isang brother kung ano ang ikinababahala ko na binabanggit ko sa personal na mga panalangin ko nang araw na iyon may kaugnayan sa paglilitis. Pagkatapos, ipapanalangin rin niya ang mga bagay na iyon habang naghihintay siya sa labas. Talagang napapatibay ako sa ginagawa niyang ’yon.

Lumalakas ang loob natin kapag alam natin na laging nasa tabi natin si Jehova saanman at kailanman tayo mapaharap sa pagsubok.—Awit 139:7-12.

Time Line

Agosto 2, 2021

Sinampahan ng kasong kriminal. Ang dalawang brother ay inakusahan na gumagamit ng videoconferencing software para suportahan ang mga gawain ng isang ekstremistang organisasyon
Agosto 5, 2021

Hinalughog ang mga bahay ng walong pamilyang Saksi ni Jehova, pati na ang mga bahay ng mga Dubovenko at Litvinyuk. Inaresto si Brother Litvinyuk at inilagay sa temporary detention
Agosto 6, 2021

Pinalaya si Brother Litvinyuk mula sa temporary detention at inilagay sa house arrest
Agosto 9, 2021

Hinalughog ng mga pulis ang bahay ng mga Dubovenko sa ikalawang pagkakataon. Sumailalim si Aleksandr sa interogasyon at inilagay sa house arrest
Agosto 11, 2021

Opisyal na kinasuhan si Brother Litvinyuk dahil sa akusasyon na pag-oorganisa ng mga gawain ng isang ekstremistang organisasyon
Pebrero 8, 2022

Opisyal na kinasuhan si Brother Dubovenko dahil sa akusasyon na pag-oorganisa ng mga gawain ng isang ekstremistang organisasyon
Abril 29, 2022

Nagsimula ang paglilitis. Hindi pinagbigyan ng hukom ang kahilingan ni Brother Litvinyuk na magpunta sa doktor at magpagamot habang naka-house arrest
Setyembre 8, 2022

Ang dalawang brother ay pinayagang umalis ng kanilang bahay sa pagitan ng 7:00 n.u. at 7:00 n.g.
Nobyembre 30, 2022

Hinatulan ng anim-na-taóng pagkabilanggo ang dalawang brother

a b Ang personal na mga komento ay ibinigay bago ang hatol.

Magugustuhan Mo Rin

NEWS RELEASE

Nakabilanggo Dahil sa Kanilang Pananampalataya—Russia

Ibinibilanggo ang mga Saksi ni Jehova sa Russia dahil sa kanilang pananampalataya. Alamin ang kuwento nila, at kumuha ng listahan ng mga Saksing nakabilanggo.

NEWS RELEASE