Noong Enero 27, 2021, ginanap ng State Parliament ng Baden-Württemberg sa Germany ang taunang pagpaparangal sa mga biktima ng mga Nazi noong Digmaang Pandaigdig II at nagpokus sila sa mga Saksi ni Jehova. Dahil sa COVID-19 pandemic, ang seremonya ay ginanap online. Mahigit 37,000 mula sa Austria, Germany, Netherlands, at Switzerland ang dumalo sa pagtitipon. Ang nakarekord na programa ay napanood din ng halos 78,000 ulit.

Sinabi ni Muhterem Aras, ang presidente ng Baden-Württemberg State Parliament, na “maraming aklat at babasahin ang nagpapaliwanag kung paano pinag-usig ang mga Saksi ni Jehova, . . . pero kaunti lang talaga ang nakakaalam sa kuwento nila.” Pagkatapos, sinabi niya na ang mga Saksi sa napakahirap na panahong iyon sa kasaysayan ay “magandang halimbawa para sa atin sa ngayon kung paano haharapin ang galit, pagtatangi, at panganib ng . . . karahasan.”

Itinampok ni State Parliament President Aras ang kuwento ni Anna Denz, isang Saksi sa Lörrach, Baden-Württemberg. Namatay ang mga magulang niya sa mga kampong piitan. Tumanggi siya na sumaludo at magsabi ng “Heil Hitler” sa paaralan. Sa tulong ng ibang mga Saksi, nakalipat siya sa Switzerland nang maglaon. Pagkatapos, tumira si Anna at ang asawa niya sa United States. “Lakas-loob na nanindigan si Anna Denz,” ang sabi ni State Parliament President Aras. “Nagawa niya iyon dahil sa pananampalataya niya.”

Ipinaliwanag ng historian na si Dr. Hans Hesse kung paano ipinagbawal ang mga Saksi ni Jehova sa Germany noong 1933, dalawang buwan lang mula nang magsimulang mamahala ang mga Nazi. Sinabi ni Dr. Hesse na ang mga kapatid natin ay “namahagi ng mga pulyeto o nagpatuloy sa pangangaral para ipakitang hindi sila mapipigilan ng pagbabawal.”

Ikinuwento ni Dr. Hesse ang karanasan ni Brother Gustaf Stange. Habang nililitis dahil sa pagtangging magsundalo udyok ng konsensiya, tinanong ng mga prosecutor si Brother Stange: “Ano na lang ang mangyayari kung gagawin ng lahat ang ginawa mo?” Sumagot si Brother Stange: “Matatapos ang digmaan.”

Pinatugtog sa programa ang Kingdom song na “Sulong, mga Saksi!” Sinabi ni Brother Wolfram Slupina, ang nangangasiwa sa mga gawain ng Public Information Desk sa sangay sa Central Europe, na ang professional na musician na si Brother Erich Frost ang kumatha ng orihinal na liriko ng awit na ito habang nakabilanggo siya sa kampong piitan ng Sachsenhausen noong 1942. Sa isang interbyu maraming taon na ang nakakaraan, ipinaliwanag ni Brother Frost na isinulat niya ang kanta para patibayin ang mga kasama niya sa bilangguan dahil “napakatindi ng pang-aabuso sa kampo.”

Ininterbyu naman nina Mara at Finn Kemper (13 at 15 taóng gulang), na mga Saksi ni Jehova rin, si Sister Simone Arnold Liebster, isang kapatid na nakaranas ng pang-uusig ng mga Nazi. Dumanas si Sister Liebster ng matinding pag-uusig noong bata siya. Dahil sa paninindigan niya, ipinadala siya ng mga awtoridad ng Nazi sa isang reform school. Sinabi niya na “napakasaya” niya dahil nakapanatili siyang tapat sa kabila ng pag-uusig.

Natutuwa tayo na nakapagbigay ang programang ito ng malaking patotoo na tinutulungan tayo ni Jehova at maaasahan natin siya sa panahon ng matinding pag-uusig.—Hebreo 13:6.