HUNYO 27, 2019
ITALY

Mga Doktor sa Dalawang Malaking Komperensiya sa Italy, Interesado sa Paggamot Nang Walang Pagsasalin ng Dugo

I-PLAY

Pinupuntahan ng mga propesyonal sa larangan ng medisina ang booth natin sa SIAARTI conference sa Palermo

Maraming doktor ang nagpasalamat sa kaayusang sinimulan ng ating organisasyon para makapagbigay ng impormasyon tungkol sa paggamot at pag-oopera nang walang pagsasalin ng dugo. Bahagi ng pandaigdig na kaayusang ito ang Hospital Information Services (Italy), na nasa tanggapang pansangay ng mga Saksi ni Jehova sa Rome. Noong nakaraang taon, nagsaayos ang mga kinatawan ng Hospital Information Services (Italy) at mga miyembro ng Hospital Liaison Committee ng isang information booth sa National Congress of the Italian Society of Anesthesia, Analgesia, Resuscitation, and Intensive Care (SIAARTI), na ginanap noong Oktubre 10 hanggang 13, 2018, sa Palermo, Sicily. Pagkatapos ng komperensiyang iyon, ang mga kapatid ay naglagay din ng booth sa Joint Congress of the Scientific Societies of Surgery na ginanap sa “La Nuvola” Convention Center sa Rome.

Ang mga komperensiyang iyon ay nagbukas sa atin ng pagkakataon na makapagbigay ng pinakabagong impormasyon tungkol sa paggamot nang walang pagsasalin ng dugo sa maraming interesadong propesyonal sa larangan ng medisina. Dinaluhan ng 2,800 anesthesiologist ang komperensiya sa Palermo. Ang komperensiya sa Rome, na itinuturing na pinakamalaking komperensiya ng mga surgeon na ginanap sa Italy, ay dinaluhan ng 3,500 surgeon. Naroon din ang mga kinatawan ng iba’t ibang iginagalang na mga institusyon sa medisina. Kabilang dito ang mga miyembro ng bawat samahan ng mga surgeon sa Italy at ng Italy Chapter of the American College of Surgeons. Suportado ito ng ilang institusyon sa bansa, gaya ng Ministry of Health.

Pinuntahan ng anesthesiologist na si Vincenzo Scuderi, mula sa Policlinico Hospital ng Catania sa Sicily, ang ating booth sa komperensiya sa Palermo. Noong Enero 18, 2019, inoperahan niya ang isang pasyenteng Saksi na may sakit sa puso. Naisagawa niya ang mahirap na operasyong ito nang walang pagsasalin ng dugo. Ganito ang sinabi ni Dr. Scuderi: “Malaki ang naitulong ng [booth ninyo] sa SIAARTI 2018 Congress. Nakatulong sa amin ang mga dokumento na ibinigay ninyo sa amin.”

Sa kasalukuyan, mahigit 5,000 doktor sa Italy ang nakikipagtulungan sa mga pasyenteng Saksi ni Jehova para magamot o maoperahan ang mga ito nang walang pagsasalin ng dugo. Taon-taon sa Italy, mga 16,000 pasyenteng Saksi ang ginagamot sa ganitong paraan.

Pagkatapos ng mga komperensiya, ikinuwento ng mga anesthesiologist at surgeon ang mga karanasan nila sa paggamot sa mga pasyenteng Saksi ni Jehova.

“Marami na rin akong naging pasyenteng Saksi ni Jehova. Nitong nakalipas na mga taon, inirekord ng Working Group ng SIAARTI Study Group on Bioethics ang mga kaso ng mga pasyenteng tumatangging magpasalin ng dugo. Nakapagbigay ng guideline ang Working Group na ito sa mga anesthesiologist para malaman nila kung ano ang dapat gawin kapag mahirap ang operasyon at kung paano pinakamabuting gamutin ang pasyente. Ipinapaliwanag ng dokumento na ang ‘karapatan ng pasyente na magpasiya kung anong paggamot ang tinatanggap niya ay mahalagang karapatang pantao na ginagarantiyahan ng Konstitusyon (Article 2, 13, at 32), ng Universal Declaration of Human Rights, ng Oviedo Convention, at ng Charter of Fundamental Rights of the European Union.’”—Antonio Corcione, coordinator ng regional transplant center for the Campania region, director ng anesthesia and intensive care units sa Monaldi Hospital, dating presidente ng Italian Society of Anesthesia, Analgesia, Resuscitation, and Intensive Care (SIAARTI)

“Dahil sa mga pasyente kong Saksi ni Jehova, napakilos ako at ang lahat ng kasamahan ko na paghusayin ang mga paraan na ginagamit namin para mabawasan ang pagdurugo kapag nag-oopera at mabilis na maka-recover ang mga pasyente pagkatapos ng operasyon, kaya nababawasan ang pangangailangan na magsalin ng dugo. Dahil dito, nakaiwas sa pagsasalin ng dugo ang mga ayaw magpasalin, pero nakinabang din ang mga pasyenteng handang magpasalin ng dugo.”—Ugo Boggi, full professor of general surgery sa University of Pisa (Italy), adjunct associate professor of surgery sa University of Pittsburgh (USA), president-elect ng Italian Society for Organ Transplantation (SITO)

“Ang liver transplant ang pinakamahirap sa lahat. Dalawa, tatlo, o apat na beses itong mas mahirap kumpara sa iba pang transplant, dahil masyado itong madugo. Pero dahil may siyentipikong katibayan kami mula sa libo-libong kaso sa buong daigdig, sampu-sampung libong kaso ng mga liver transplant, masasabi naming alam na namin ang mabisang mga paraan para iwasan ang labis na pagdurugo. Ang totoo, subok na mga paraan ito para maiwasan ang labis na pagdurugo. Alam namin kung paano iiwasan ang pagsasalin ng dugo. Ang karamihan ng ginagawa naming pag-oopera sa atay, kahit mga liver transplant pa, ay ginagawa namin nang walang pagsasalin ng dugo. Sa pag-oopera sa atay, bihira na kaming magsalin ng dugo kasi may mas bagong teknik kaming ginagamit. Ngayon, namo-monitor na namin ang bawat ugat. Gusto kong pasalamatan ang mga Saksi ni Jehova kasi dahil sa kanila, nabigyan namin ng pansin ang pagsasalba ng dugo, na hindi namin gaanong pinag-iisipan sa nakalipas na 10 o 15 taon.”—Umberto Cillo, full professor ng general surgery at director ng hepatobiliary and liver transplant unit sa University of Padua, presidente ng Italian Society for Organ Transplantation (SITO)

“Hinahangaan ko ang mga pasyenteng Saksi dahil sa matibay na pananampalataya nila. Isa sila sa mga dahilan ko kung bakit pinagbubuti ko ang paraan ng paggamot ko. Para sa akin, dapat lang talaga silang igalang. Ayaw ng mga Saksi ni Jehova na mamatay o maging martir; gusto lang nila ng mahusay na medikal na pangangalaga.”—Francesco Corcione, full professor of surgery sa University of Naples Federico II, president emeritus ng Italian Society of Surgery (SIC), honorary member ng Académie Nationale de Chirurgie, Paris, France

“Dahil sa pakikipagtulungan ko sa mga Saksi ni Jehova, mas nakita kong dapat igalang ng mga doktor at nars ang kultura at paniniwala ng mga pasyente. At para sa akin, sinusuportahan iyan ng Law 219 sa Italy na pinagtibay noong Disyembre 2017, ang ‘Provisions for informed consent and advance directives.’ Sinasabi ng batas na ito na ‘maaari lang ibigay o ipagpatuloy ang isang paraan ng paggamot kung lubusan itong nauunawaan at sinasang-ayunan ng pasyente.’ Kung malinaw itong maipapaliwanag ng surgeon sa pasyente, pareho nilang babalikatin ang pananagutan at mas malayang makapagdedesisyon ang pasyente kung ano ang gusto niyang paggamot. Kaya magiging mas matagumpay ang resulta.”—Luca Ansaloni, director ng general and emergency surgery unit sa Bufalini Hospital of Cesena, presidente ng Italian Society of Surgical Physiopathology (SIFIPAC)

“Malaki ang naitulong ng mga Saksi ni Jehova para makahanap kami ng mas mahusay na mga teknik na hindi nangangailangan ng pagsasalin ng dugo. Ang bagong mga teknolohiya sa pag-oopera ay nakatulong sa mga surgeon na gustong igalang ang desisyon ng mga pasyente na huwag magpasalin ng dugo dahil sa kanilang relihiyon. Mas matipid at mas mahusay ang paggamot na walang pagsasalin ng dugo.”—Diego Piazza, presidente ng Italian Medical Association of Catania, director ng oncological surgery sa Garibaldi-Nesima Hospital of Catania, dating presidente ng Italian Association of Hospital Surgeons (ACOI)

“Inaakala ng ilan na walang problema sa pagsasalin ng dugo. Pabor sila sa pagsasalin ng dugo kasi madaling makakuha ng dugo, mas mura ito, at mas madaling irekomenda. Isa pa, mas madali ring makita ang epekto nito (sa pagtaas ng hemoglobin ng pasyente). Kaya maraming doktor ang nagsasalin ng dugo. Pero taon-taon, dumarami ang mga ebidensiya na mapanganib ang pagsasalin ng pulang selula ng dugo at iba pang sangkap ng dugo. Sa katunayan, ipinapakita ng mga pagsusuri na mas maraming problema ang mga pasyenteng nagpasalin ng dugo kaysa sa mga hindi nagpasalin. Ang mga nagpasalin ng dugo ay mas malamang na mamatay o magkasakit at maospital nang matagal (dahil sa stroke, sakit sa bato, pamumuo ng dugo, impeksiyon o sakit sa baga). Sa tingin ko, dahil sa mga pasyenteng Saksi ni Jehova sa nakalipas na 50 taon, naging mas bukás ang isip ng mga doktor sa pagsasalba ng dugo habang nag-oopera at pag-oopera nang hindi nagsasalin ng dugo.”—Giandomenico Biancofiore, director ng complex operative unit of anesthesia and resuscitation in transplants sa Pisa University Hospital, associate professor ng anesthesiology and resuscitation sa University of Pisa