ENERO 27, 2022
RUSSIA

Alam ng Dalawang Brother na Pinalalakas Sila ni Jehova

I-PLAY

Malapit nang ibaba ng KKirsanovskiy District Court ng Tambov Region ang hatol nito sa kaso nina Brother Anton Kuzhelkov at Nikolay Prokhorov. Wala pang hinihiling ang prosecutor na parusa para sa kanila.

Time Line

Disyembre 21, 2020

Sinampahan ng kasong kriminal sina Anton at Nikolay dahil sa pag-oorganisa ng mga gawain ng isang ekstremistang organisasyon
Disyembre 24, 2020

Hinalughog ng mga imbestigador ang 19 na lugar, kasama na ang bahay ni Anton. Dinala si Anton sa isang lugar na 350 kilometro ang layo mula sa bahay niya para pagtatanungin. Pinagtatanong si Nikolay at pinagbawalang umalis sa lugar na iyon
Disyembre 25, 2020

Hindi pinayagang umuwi ng bahay si Anton at ikinulong sa pretrial detention center
Agosto 30, 2021

Inilipat si Anton sa ibang kulungan

Profile

Anton Kuzhelkov

Ipinanganak: 1993 (Sortavala, Republic of Karelia)

Maikling Impormasyon: Panganay sa tatlong magkakapatid na lalaki. Mahilig mag-fishing at snowboarding noong bata pa. Natuto ng construction mula sa tatay niya

Nabautismuhan noong 2007. Napangasawa si Alyona noong 2015

Personal na mga Komento Mula sa Asawa ni Anton na si Alyona a

Anong mga hamon ang napaharap sa iyo habang dinadalaw mo si Anton?

Kapag pinapayagan kaming dumalaw sandali, pupunta ako sa imbestigador para kumuha ng permiso dalawang beses sa isang buwan. Lagi akong kinakabahan. At kapag pupunta ako sa kulungan, kailangan kong magpakita ng patunay na negatibo ako sa COVID-19 test. Napakamahal ng mga test na iyon.

Nakakalungkot, hindi muna kami pinapayagang dumalaw. Pero nagsimula na ang mga pagdinig ng korte, at ngayon, pinapayagan na nila ako sa hukuman. Pero nasa 100 kilometro ang layo n’on sa bahay namin.

Ano ang nakakatulong sa asawa mo na magtiis?

Nakakatulong sa kaniya ang espesipiko, taimtim, at marubdob na panalangin, at kung minsan ay naiiyak pa nga siya. Sa lahat ng sitwasyon, alam niya na tinutulungan siya ni Jehova. . . . Masaya din niyang pinagmamasdan ang iba’t ibang bagay na gawa ng Diyos. Halimbawa, pinagmamasdan niya ang mga ibon kapag naglalakad siya sa bakuran. . . . Pinag-iisipan niya ang karunungan ng Diyos at ang ilustrasyon ni Jesus tungkol sa mga maya. . . . Nakakatulong ’yon sa kaniya na manatiling masaya.

Nikolay Prokhorov

Ipinanganak: 1964 (Morshan, Tambov Region)

Maikling Impormasyon: Naglingkod sa militar. Mahilig lumangoy at maglakbay

Napangasawa si Yelena noong 2008. May anak na lalaki at babae. Nagpa-Bible study dahil sa magandang paggawi ng mga Saksi ni Jehova. Nabautismuhan noong 2008

Personal na mga Komento

May mga espesipikong panahon ba na nadama mong tinulungan ka ni Jehova?

Kahit sa pinakamahirap na panahon [ko], lagi [akong] tinutulungan ni Jehova. . . . Nag-iisa ako noon. Pinipilit ng mga pulis na makipagtulungan ako sa kanila o, kahit aminin ko lang daw ang “krimen.” . . . Nakaupo ako noon at nag-iisip kung makakapanatili kaya akong tapat kay Jehova dahil natatakot ako. Nanalangin ako kay Jehova na bigyan ako ng lakas at panloob na kapayapaan. Napansin ng isa sa mga opisyal na nakayuko ako, tinanong niya ako, “Ano’ng ipinagdadasal mo?” Sinabi ko, “Hinihiling ko po na huwag akong makadama ng pagkaawa sa sarili.” At naalala ko ang Isaias 54:17. Alam kong wala silang magagawa sa akin. Lumakas ang loob ko at napansin din ito ng mga pulis. Sa wakas, tinigilan na nila ang pananakot sa akin. Hiniling pa nga nila na huwag akong magkimkim ng sama ng loob sa kanila.

Paano kayo tinulungan ng mga kapuwa ninyo Saksi?

Malaki ang naitulong sa amin ng mga kapatid namin sa kongregasyon. Kahit nanganganib din sila mula sa mga ahensiya ng gobyerno, kinontak kami ng marami sa kanila. Tumanggap din kami ng mga tawag sa telepono mula sa mga kapatid sa buong Russia at sa iba pang bansa.

Sinuportahan nila kaming lahat sa mahirap na panahong iyon. Noong mga pagdinig sa korte, nandoon sila para suportahan kami . . . Mainam na patotoo sa mga may kaugnayan sa paglilitis ang tunay na pag-ibig na ipinakita ng ating kapatirang Kristiyano. Talagang nakatulong ito sa aming mag-asawa na manatiling tapat kay Jehova [sa mahirap na panahong ito].

Alam natin na patuloy na bibigyan ni Jehova ng lakas-loob at suporta ang mahal nating mga kapatid na pinag-uusig.—Kawikaan 1:33.

a Si Brother Kuzhelkov ay kasalukuyang nakakulong sa pretrial detention center. Hindi siya posibleng hingan ng komento.

Magugustuhan Mo Rin

NEWS RELEASE

Nakabilanggo Dahil sa Kanilang Pananampalataya—Russia

Ibinibilanggo ang mga Saksi ni Jehova sa Russia dahil sa kanilang pananampalataya. Alamin ang kuwento nila, at kumuha ng listahan ng mga Saksing nakabilanggo.

NEWS RELEASE