Sa Oktubre 23, 2020, * ibababa ng Oktyabrsky District Court ng Kirov ang hatol nito kay Brother Anatoliy Tokarev. Posible siyang mabilanggo nang tatlo at kalahating taon.

Anatoliy Tokarev

• Ipinanganak: 1958 (Baranovskaya, Kirov Region)

• Maikling Impormasyon: Pinalaki ng nanay niya. Dating software engineer. Mahilig sa photography at mag-chess at tumugtog ng accordion. Noong 1979, napangasawa niya si Margarita. May dalawa silang anak

• Dahil sa pag-aaral niya ng siyensiya, naging ateista siya. Noong 27 siya, nakipag-aral siya ng Bibliya sa mga Saksi ni Jehova at na-realize niya na hindi magkasalungat ang turo ng Bibliya at ng siyensiya

Noong Mayo 24, 2019, ni-raid ng Center for Countering Extremism ng Russia ang apartment ng mag-asawang Tokarev. Inimbestigahan nila si Brother Tokarev. Pinagbantaan ng mga pulis si Brother Tokarev na kapag hindi niya inamin na “ekstremista” siya, madadamay ang pamilya niya. Dinala si Brother Tokarev sa department of investigation para pagtatanungin.

Pagkalipas ng limang buwan, kinasuhan si Brother Tokarev ng paglabag sa dalawang artikulo ng Criminal Code of the Russian Federation. Inakusahan siyang nagbibigay ng pondo sa isang “ekstremistang” organisasyon. May mga audio recording ang prosecutor mula sa apartment ni Brother Tokarev na nagsasabi raw na nag-organisa siya ng pulong para pag-aralan ang ipinagbabawal na “ekstremistang” literatura.

Ipinapanalangin natin si Brother Tokarev at ang pamilya niya. Nagtitiwala tayo na patuloy na “magiging tapat” si Jehova sa kanila.—Awit 18:25.