SETYEMBRE 24, 2021
RUSSIA

Brother Maksim Beltikov—Napatibay ng Kaniyang Espirituwal na Rutin

I-PLAY

UPDATE | Hinatulan ng Korte ng Russia si Brother Maksim Beltikov

Noong Enero 17, 2022, hinatulan ng Pavlovskiy District Court of the Krasnodar Territory si Brother Maksim Beltikov at sinentensiyahan ng dalawang-taóng pagkabilanggo. Ipinatupad agad ang sentensiya sa kaniya.

Time Line

Hunyo 29, 2020

Pinagbawalang umalis sa lugar nila
Hunyo 23, 2020

Sinampahan ng kasong kriminal. Ang paratang: “pakikibahagi sa mga sesyon ng pagtuturo ng relihiyon” kasama ang “pagdaraos at pakikinig sa mga pahayag na batay sa relihiyosong literatura”
Abril 29, 2020

Hinalughog ng mga pulis ang bahay ni Maksim. Pagkatapos, pinagtatanong siya

Profile

Maksim Beltikov

Ipinanganak: 1980 (Baltiysk, Kaliningrad Region)

Maikling Impormasyon: Mahilig tumugtog ng tradisyonal na musika noong bata siya. Isang bricklayer. Ang pinsan niya ang unang nagturo sa kaniya tungkol sa Bibliya. Natuwa nang malaman ang personal na pangalan ng Diyos na Jehova. Manghang-mangha sa natupad na mga hula ng Bibliya at sa praktikal na payo nito. Nabautismuhan bilang Saksi ni Jehova noong 2001. Napangasawa si Mariya noong 2005. May tatlo silang maliliit na anak

Personal na mga Komento

Paano ka tinulungan ni Jehova at ang iyong pamilya sa panahon ng pag-uusig?

Inilaan ni Jehova ang lahat ng pangangailangan ng pamilya ko sa espirituwal at materyal. Sinikap ng asawa ko at mga anak na maintindihan ang nadarama ko, at tinulungan nila akong huwag masyadong mag-alala. Ginamit ng isang brother ang Awit 23 para patibayin ako. Sinabi niya: “Huwag mong tanggihan ang tulong ni Jehova at ng kaniyang organisasyon. Hayaan mong alagaan ka ni Jehova.”

Paano nakatulong sa iyo ang espirituwal na rutin para manatili kang masaya?

Nakatulong sa akin ang regular na pagbabasa ng Bibliya at pagdalo sa lahat ng pulong para maging masaya pa rin at magtiwala na kontrolado ni Jehova ang lahat ng bagay. Nadaluhan naming mag-asawa ang kombensiyon sa Seoul, South Korea, noong 2018. Noong Linggo, humarap ang speaker sa seksiyon ng mga nagsasalita ng Korean, at pinakisuyuang tumayo ang lahat ng nakulong dahil sa pananampalataya. Libo-libong kapatid ang tumayo. Hindi ko malilimutan iyon at naisip ko: ‘Kung nagawa nila iyon, magagawa ko rin.’

Paano ka naging mas malapít kay Jehova dahil dito?

Naging mas malapít ang kaugnayan ko sa kaniya, at marami rin akong ginawang pagbabago. Naging mas espesipiko ang mga panalangin ko, lalo na ang mga pasasalamat ko sa kaniya. Iba na rin ang pagbabasa ko ng Bibliya. Hinahanap ko na ngayon ang mga halimbawa na kapareho ng kalagayan ko.

Patuloy sanang mapatibay ang mga kapatid natin sa Russia ng kanilang espirituwal na rutin, pati na ng pagmamahal at pagmamalasakit ng mga kapuwa nila Saksi. Alam nating hindi pababayaan ng “Diyos ng pag-ibig at kapayapaan” ang mahal nating mga kapatid.—2 Corinto 13:11.

Magugustuhan Mo Rin

NEWS RELEASE

Nakabilanggo Dahil sa Kanilang Pananampalataya—Russia

Ibinibilanggo ang mga Saksi ni Jehova sa Russia dahil sa kanilang pananampalataya. Alamin ang kuwento nila, at kumuha ng listahan ng mga Saksing nakabilanggo.

NEWS RELEASE