SETYEMBRE 15, 2023
RUSSIA

Brother Sergey Gromov, Nahatulang Makulong Nang Anim na Taon at Isang Buwan sa Russia

I-PLAY

Noong Setyembre 14, 2023, hinatulan ng Moskovskiy District Court of Kazan si Brother Sergey Gromov at sinentensiyahang makulong nang anim na taon at isang buwan. Nakakulong na siya mula Marso 15, 2022, at mananatiling nakakulong.

Profile

Sergey Gromov

Ipinanganak: 1969 (Kazan, Republic of Tatarstan)

Maikling Impormasyon: Nagtrabaho bilang isang graphic designer

Napangasawa si Yelena noong 1990. Mayroon silang isang anak na lalaki at babae

Lumaking ateista pero madalas niyang pag-isipan kung paano nagsimula ang buhay. Nakipag-aral siya sa mga Saksi ni Jehova. Tuwang-tuwa siyang malaman na hindi magkasalungat ang siyensiya at ang Bibliya. Nabautismuhan sila ni Yelena noong 1995

Personal na mga Komento Mula sa Asawa ni Sergey na si Yelena a

Paano ninyo pinaghandaan ni Sergey ang pag-uusig?

Nang magbago ang sitwasyon sa Russia noong 2017, hindi kami nag-alala. Sa halip, nagtiwala kami kay Jehova. Sinunod naming pamilya ang mga tagubilin ng organisasyon ni Jehova, at determinado kaming patuloy na maglingkod at huwag magpadala sa takot. Patuloy kaming nag-aral, nangaral, dumalo sa mga pulong, nanalangin, at nagpatibay sa mga kapatid.

Paano ka tinulungan ni Jehova habang nakakulong ang asawa mo?

Talagang dumalas at mas naging taimtim ang mga panalangin ko kay Jehova mula nang magkahiwalay kami ni Sergey. Damang-dama kong malapit sa akin si Jehova. At hindi niya ako iniwan. May mga panahon nga na pagkatapos na pagkatapos kong manalangin, biglang may magpapatibay sa akin, yayakap, o magpapakita ng malasakit sa ibang paraan. Alam kong sagot iyon ni Jehova sa mga panalangin ko at paraan niya iyon para patatagin ako. Nakatulong ito sa akin para hindi ko laging isipin ang mga problema ko. Napakilos pa nga ako nito na magpokus sa pagtulong sa iba.

Talagang napapatibay tayo ng halimbawa ng katapatan at pagtitiwala nina Sergey at Yelena kay Jehova. Ang pagpapala sa kanila ng Diyos dahil sa pananatili nilang tapat ay malinaw na patunay na “ang kamay ni Jehova ay hindi maikli para hindi makapagligtas, at ang tainga niya ay hindi mahina para hindi makarinig.”—Isaias 59:1.

Time Line

Marso 15, 2022

Sinampahan ng kasong kriminal. Isinama para sa interogasyon at pansamantalang ikinulong
Marso 16, 2022

Hinalughog ang bahay
Marso 17, 2022

Inilipat sa bilangguan habang naghihintay ng paglilitis
Marso 30, 2023

Nagsimula ang paglilitis
Setyembre 14, 2023

Nahatulan at nasentensiyahang makulong nang anim na taon at isang buwan

a Nang inihahanda ang artikulong ito, kasalukuyang nakakulong si Brother Gromov habang naghihintay ng paglilitis, kaya hindi siya posibleng makunan ng personal na komento.

Tingnan Din

NEWS RELEASE

Nakabilanggo Dahil sa Kanilang Pananampalataya—Russia

Ibinibilanggo ang mga Saksi ni Jehova sa Russia dahil sa kanilang pananampalataya. Alamin ang kuwento nila, at kumuha ng listahan ng mga Saksing nakabilanggo.

NEWS RELEASE