NOBYEMBRE 29, 2023
RUSSIA

Limang Brother ang Nahatulan ng Korte ng Russia sa Rehiyon ng Saratov

I-PLAY

Noong Nobyembre 23, 2023, inilabas ng Balakovskiy District Court of the Saratov Region ang hatol nito sa kaso nina Brother Aleksey Bogatov, Yevgeniy Fomashin, Vladimir Mavrin, Andrey Murych, at Sergey Tyurin. Hinatulang may-sala ang limang brother. Sina Aleksey at Vladimir ay nahatulan ng anim-na-taóng suspended prison sentence. Pinagmulta naman ang bawat isa kina Andrey, Sergey, at Yevgeniy ng 300,000 ruble ($3,362 U.S.). Hindi sila makukulong sa ngayon.

Profile

Aleksey Bogatov

Ipinanganak: 1960 (Baklushi, Ulyanovsk Region)

Maikling Impormasyon: Nagtrabaho bilang drayber ng ambulansiya

Napangasawa niya si Lyubov noong 1982. Nagpalaki sila ng tatlong anak na lalaki

Nakatulong sa kaniya ang pakikipag-aral ng Bibliya sa mga Saksi ni Jehova para maintindihan kung paano magkakaroon ng katarungan para sa lahat ng tao sa pamamagitan ng Kaharian ng Diyos. Nabautismuhan siya noong 1994

Personal na mga Komento

Paano ka tinulungan ni Jehova noong nakakulong ka habang hinihintay ang paglilitis mo?

Noong unang buwan ko sa kulungan, wala akong Bibliya, pero mayroon akong bolpen at notebook. Hiniling ko kay Jehova na tulungan akong makaalala ng mga teksto sa Bibliya. Sa pagtatapos ng buwan, 112 talata ang naalala at naisulat ko. Ipinapakita lang nito na kung regular kong babasahin at bubulay-bulayin ang Bibliya, gagamitin ni Jehova ang banal na espiritu niya para maalala ko ang mga nabasa ko. Nagpapasalamat ako sa tulong ni Jehova.

Yevgeniy Fomashin

Ipinanganak: 1977 (Balakovo)

Maikling Impormasyon: Nagtrabaho bilang electrician

Nagustuhan niya ang pangako ng Bibliya na magkakaroon ng kapayapaan at pagkakaisa sa lupa. Nabautismuhan siya noong 2013. Nag-aral siya ng sign language para makatulong sa mga bingi sa lugar nila

Personal na mga Komento

Paano nakatulong sa iyo ang halimbawa ng mga brother na nakulong noon?

Habang nasa detention center ako, naisip ko sina Brother Konstantin Bazhenov, Aleksey Budenchuk, Gennadiy German, Roman Gridasov, Feliks Makhammadiyev, at Aleksey Miretskiy na nakulong din doon noong 2018-2019. Pinalakas ako ng pananampalataya nila. Napapatibay rin ako ng maraming kapatid sa buong mundo na tapat na naglilingkod kay Jehova sa kabila ng iba’t ibang pagsubok. Para bang magkakasama kaming humaharap sa mga pagsubok.

Vladimir Mavrin

Ipinanganak: 1962 (Kamyshovka, Saratov Region)

Maikling Impormasyon: Nagtatrabaho sa construction at interior finishing

Nabautismuhan noong 1994

Nang mamatay ang asawa niya noong 2004, mag-isa niyang pinalaki ang teenager niyang anak na lalaki. Napangasawa niya si Irina noong 2013

Personal na mga Komento

Ano ang natutuhan mo tungkol kay Jehova sa mahirap na panahong ito?

Alam ko ang pangako ni Jehova na nasa Hebreo 13:5: “Hinding-hindi kita iiwan, at hinding-hindi kita pababayaan.” Nakita ko kung gaano ako inalagaan ni Jehova pagkatapos kong maaresto at makulong. Tinulungan niya akong manatiling kalmado at panatag, at lagi niya akong binibigyan ng lakas. Lagi ring sinasagot ni Jehova ang mga panalangin ko sa pinakamabuting paraan. Kahit minsan, hindi ko naramdamang nag-iisa ako sa pinagdadaanan ko ngayon.

Andrey Murych

Ipinanganak: 1991 (Balakovo)

Maikling Impormasyon: Isang steelworker

Una niyang nalaman ang tungkol sa Bibliya sa lola niya. Hangang-hanga siya sa katuparan ng mga hula sa Bibliya. Nabautismuhan siya noong 2007

Napangasawa niya si Anastasiya noong 2009. Mayroon silang isang anak na babae

Personal na mga Komento

Ano ang nakatulong sa iyo para maharap ang mga problema noong nasa detention center ka?

Ang pinakamahirap sa akin, y’ong manatiling masaya, lalo na noong unang dalawang buwan. Nakatulong sa akin na isipin kung paano ko maipapakita, kahit sa mahirap na panahong iyon, na nagpapasalamat ako kay Jehova sa lahat ng ginawa niya para sa akin. Maipapakita ko ito kung mananatili akong tapat at masaya. Sigurado akong sa tulong ni Jehova, makakayanan ko ang lahat ng bagay. Mabibigyan ako ni Jehova ng kapayapaan na kailangan ko sa anumang sitwasyon.

Sergey Tyurin

Ipinanganak: 1994 (Balakovo)

Maikling Impormasyon: Nagtrabaho bilang electrician

Tinuruan siya ng lola niya tungkol sa Bibliya. Kumbinsido siya na para magkaroon ng masayang buhay, dapat sundin ang mga prinsipyo sa Bibliya. Nabautismuhan siya noong 2012

Napangasawa niya si Yelizaveta noong 2018

Personal na mga Komento

Ano ang natutuhan mo nang pag-usigin ka dahil sa pananampalataya mo?

Tatlong bagay ang natutuhan ko. Una, laging nandiyan si Jehova para tulungan ako. Alam niya ang kailangan ko, at ibinibigay niya iyon sa tamang panahon. Ikalawa, mahalagang magtiwala sa mga pangako ni Jehova para mapanatili ang panloob na kapayapaan. Mahirap ang pag-uusig, pero pansamantala lang ito kung ikukumpara sa walang-hanggang mga pagpapala sa hinaharap. Malapit nang dumating ang panahon na hindi ko na maaalala ang anumang paghihirap na nararanasan ko ngayon. At ikatlo, napakahalaga ng pagkakaisa natin bilang magkakapatid. Dahil dito, mas nakakapagtiis tayo. Dapat natin itong ingatan.

Ipinapaalala ng mga halimbawang ito ng limang tapat na brother na makakapagtiis tayo ng pagsubok para sa mabuting balita kapag nagtitiwala tayo sa kapangyarihan ng Diyos.—2 Timoteo 1:8.

Time Line

Pebrero 11, 2022

Sinampahan ng kasong kriminal
Marso 23, 2022

Hinalughog ng mga pulis na FSB ang mga bahay ng limang brother. Pinagtatanong ang bawat isa sa kanila at ikinulong sa temporary detention center
Marso 25, 2022

Ikinulong ang mga brother bago pa man sila litisin
Enero 23, 2023

Pinalaya ang mga brother pero hindi pinayagang umalis ng kanilang lugar
Hulyo 21, 2023

Nagsimula ang paglilitis
Nobyembre 23, 2023

Nahatulang may-sala

Magugustuhan Mo Rin

NEWS RELEASE

Nakabilanggo Dahil sa Kanilang Pananampalataya—Russia

Ibinibilanggo ang mga Saksi ni Jehova sa Russia dahil sa kanilang pananampalataya. Alamin ang kuwento nila, at kumuha ng listahan ng mga Saksing nakabilanggo.

NEWS RELEASE