AGOSTO 24, 2022
RUSSIA

Nagpokus ang mga Brother sa Iba Para Matiis ang Pagkakakulong

I-PLAY

Malapit nang ibaba ng Taiginskiy City Court of the Kemerovo Region ang hatol nito sa kaso nina Brother Maksim Morozov at Yuriy Usanov. Wala pang hinihiling ang prosecutor na parusa para sa kanila.

Time Line

Abril 1, 2021

Sinampahan ng kasong kriminal si Yuriy dahil sa pag-oorganisa ng relihiyosong mga pulong ng isang ipinagbabawal na organisasyon
Abril 2, 2021

Hinalughog ng mga pulis ang bahay ni Yuriy sa loob ng tatlong oras. Inaresto siya at ikinulong sa pretrial detention center
Agosto 4, 2021

Sinampahan ng kasong kriminal si Maksim
Agosto 6, 2021

Inaresto si Maksim at ikinulong nang magdamag
Agosto 7, 2021

Sinampahan ng kasong kriminal si Maksim at ikinulong sa pretrial detention center
Mayo 16, 2022

Nagsimula ang paglilitis

Profile

Maksim Morozov

Ipinanganak: 1983 (Volgograd, Volgograd Region)

Maikling Impormasyon: Isang paratrooper sa army. Nang maglaon, naging driver ng trak

Nagpa-Bible study sa mga Saksi ni Jehova pagkaalis sa army. Nabautismuhan noong 2009

Personal na mga Komento

Ano ang nakatulong sa iyo na manatiling masaya kahit nakakulong ka?

Mayroon akong Bibliya na binabasa ko araw-araw. Nae-enjoy ko ang pagbabasa ng mga liham ni apostol Pablo at kung paano niya inilarawan ang pagkakakulong niya o habang nakatanikala siya at nasa pangawan. Hindi siya nagpokus sa kaniyang kalagayan kundi sa gawaing ibinigay sa kaniya ni Jehova.

Alam ko rin na hindi ako nag-iisa kaya nakapanatili akong positibo. Nariyan si Jehova, si Jesus, at ang mga anghel, at siyempre pa ang ating kapatiran. Napanood natin sa video ni Caleb at Sophia kung ano ang reaksiyon ng mga anghel kapag ang mga bata ay gumagawa ng mabubuting desisyon sa paaralan. Ipinaalala niyan sa akin na mahalagang ituring ang bawat problema na isang pagkakataon para ipakita ang katapatan ko sa Diyos. Kaya hindi ko masyadong napapansin ang sarili ko at mga problema ko, sa halip, mas nakapokus ako sa mas malalaking isyu.

Yuriy Usanov

Ipinanganak: 1991 (Gorno-Chuisky, Irkutsk Region)

Maikling Impormasyon: Isang electrician at welder. Nalaman ang katotohanan tungkol kay Jehova kasama ang nanay niya noong bata pa siya. Nabautismuhan noong 2007

Napangasawa si Irina noong 2021

Personal na mga Komento Mula sa Asawa ni Yuriy na si Irina a

Paano ka napatibay ni Yuriy kahit nakakulong siya?

Hanggang ngayon hindi pa kami pinapayagang dumalaw nang personal o mag-usap sa telepono. Ang pagsulat ng mga liham lang ang paraan ng komunikasyon namin, at madalas ay naaantala pa. Iba talaga kung personal mong nakakausap ang isang tao, pero nagpapasalamat pa rin kami na nagkakausap kami.

Nami-miss ko ang kuwentuhan at ang pagbabasa namin ng Bibliya na magkasama, gaya ng ginagawa namin noon. Pero sa bawat sulat ni Yuriy, isinasama niya ang mga teksto sa Bibliya na nakapagpatibay sa kaniya. Kung minsan, may isinasama rin siyang magagandang mensahe mula sa mga liham na natatanggap niya. Nae-enjoy din namin ang aming pampamilyang pagsamba sa ganoong paraan. Lagi rin niyang ipinapaalala sa akin ang tungkol sa pag-ibig ni Jehova at ang mga pagpapalang ibibigay niya sa amin. At lagi ring sinasabi ni Yuriy na mahal niya ako at pinapahalagahan niya ang mga pagsisikap ko. Parang mga simpleng bagay lang ’yon, pero talagang nakakapagpatibay ’yon sa akin.

Alam natin na talagang pinapahalagahan ni Jehova ang mapagsakripisyong saloobin ng mga kapatid na ito. Nagtitiwala tayo na patuloy silang pagpapalain ni Jehova ngayon at sa hinaharap.—Hebreo 11:26.

a Habang inihahanda ang artikulong ito, nakakulong si Brother Usanov sa pretrial detention center. Hindi posibleng makuha ang komento niya.

Magugustuhan Mo Rin

NEWS RELEASE

Nakabilanggo Dahil sa Kanilang Pananampalataya—Russia

Ibinibilanggo ang mga Saksi ni Jehova sa Russia dahil sa kanilang pananampalataya. Alamin ang kuwento nila, at kumuha ng listahan ng mga Saksing nakabilanggo.

NEWS RELEASE