HUNYO 27, 2023
RUSSIA

Nahatulan Sina Brother Skvortsov at Tibiy

I-PLAY

Noong Hunyo 20, 2023, hinatulan ng Taganrog City Court of the Rostov Region sina Brother Aleksandr Skvortsov at Valeriy Tibiy. Sinentensiyahan ng pitong-taóng pagkabilanggo si Aleksandr. Nakakulong na siya mula pa noong Disyembre 7, 2021, at mananatiling nakakulong. Sinentensiyahan naman si Valeriy ng anim-na-taóng suspended prison sentence. Naka-detain siya mula pa noong Mayo 18, 2022 at pinalaya na.

Profile

Aleksandr Skvortsov

Ipinanganak: 1962 (Taganrog)

Maikling Impormasyon: Nagtrabaho bilang welder

Napangasawa si Larisa noong 1983. Mayroon silang dalawang anak na babae

Nagpa-Bible study si Larisa sa mga Saksi ni Jehova at nabautismuhan noong 1996. Masaya si Aleksandr na malaman ang pag-asa sa Bibliya tungkol sa isang mundo na hindi na makakaranas ng kawalang-katarungan. Nabautismuhan noong 1997

Hinatulan noong 2015 ng lima-at-kalahating-taóng suspended prison sentence

Personal na mga Komento Mula sa Asawa ni Aleksandr na si Larisa a

Ano ang nakakatulong sa asawa mo na makayanan ang mga kalagayan sa pretrial detention center?

Sa loob lang ng isang taon, inilipat si Aleksandr sa 13 iba’t ibang selda. Hindi madaling makisama sa ibang bilanggo, pero sinisikap pa rin niyang gawin iyon. Madalas niyang sabihin na nakatulong sa kaniya ang pananalangin kay Jehova, pagbabasa ng Bibliya, at pagbabasa ng mga sulat na natatanggap niya para manatiling malakas ang pananampalataya niya. Napakahirap sa kaniya na hindi makasama ang mga kapamilya at kaibigan niya, pero binibigyan siya ni Jehova ng kapanatagan.

Paano naapektuhan ng karanasang ito ang kaugnayan mo kay Jehova?

Ngayon, mas nagtitiwala na ako kay Jehova. Nakikita ko ang tulong at suporta ni Jehova sa aming mag-asawa. Naiiyak ako kasi damang-dama ko ang malasakit ng mga kapatid, at alam kong ipinapanalangin nila kami.

Valeriy Tibiy

Ipinanganak: 1977 (Novopokrovka, Crimea)

Maikling Impormasyon: Nagtrabaho bilang truck driver

Nagpa-Bible study sa mga Saksi ni Jehova nang malaman ang pangalan ng Diyos. Nabautismuhan noong 2004

Napangasawa si Kristina noong 2012

Personal na mga Komento Mula sa Asawa ni Valeriy na si Kristina b

Paano nakakayanan ni Valeriy ang kawalang-katiyakan ng buhay sa bilangguan?

Madalas ipanalangin ni Valeriy na manatili siyang kalmado at magkaroon siya ng lakas para matiis ang ingay sa loob ng selda niya dahil sa dami ng tao doon. Napansin ng mga kasama niya na lagi siyang kalmado. Lagi nila siyang tinatanong: “Paano ka nananatiling kalmado? Ikaw ang pinakakontento at pinakamasayang tao dito!” Masaya si Valeriy sa mga usapan nila, kasi tinutulungan siya ni Jehova na isabuhay ang mga prinsipyo ng Bibliya. Humihingi pa nga sila ng payo sa kaniya. Ramdam na ramdam ni Valeriy ang proteksiyon ni Jehova kasi nirerespeto siya ng mga kasama niya.

Anong teksto sa Bibliya ang nakatulong sa iyo sa mahirap na panahong ito?

Sa panahong ito, nakatulong sa akin ang Kawikaan 3:6 na mas magtiwala pa kay Jehova. Sabi doon: “Isaisip mo siya sa lahat ng tatahakin mong landas, at itutuwid niya ang mga daan mo.” Si Jehova lang ang nagtataglay ng lubos na karunungan. Kapag may problema, natutuhan ko ang kahalagahan ng Bibliya para malaman ang pananaw ni Jehova sa bagay na iyon. Anuman ang mangyari, hinding-hindi mawawala ang pagmamahal ni Jehova sa akin.

Nagpapasalamat tayo kay Jehova sa maibiging pangangalaga at patnubay niya. Dahil dito, natitiis natin ang anumang pagsubok.—Awit 5:12.

Time Line

Marso 20, 2021

Hinalughog ang bahay ng mga Skvortsov
Disyembre 7, 2021

Hinalughog sa ikalawang pagkakataon ang bahay ng mga Skvortsov, pati na ang 29 na iba pang bahay ng mga Saksi ni Jehova sa Taganrog. Sinampahan siya ng kasong kriminal at inilagay sa temporary detention
Disyembre 8, 2021

Inilagay si Aleksandr sa pretrial detention
Marso 29, 2022

Sinampahan ng kasong kriminal si Valeriy
Marso 31, 2022

Pinagsama ng mga imbestigador ang mga kaso laban kina Aleksandr at Valeriy
Mayo 18, 2022

Inaresto si Valeriy at inilagay sa temporary detention
Mayo 26, 2022

Inilipat si Valeriy sa pretrial detention
Disyembre 6, 2022

Nagsimula ang paglilitis
Hunyo 20, 2023

Sinentensiyahan si Aleksandr ng pitong-taóng pagkabilanggo. Sinentensiyahan naman si Valeriy ng anim-na-taóng suspended prison sentence

a b Noong inihahanda ang artikulong ito, nasa pretrial detention sina Brother Skvortsov at Tibiy. Hindi posibleng makuha ang mga komento nila.

Tingnan Din

NEWS RELEASE

Nakabilanggo Dahil sa Kanilang Pananampalataya—Russia

Ibinibilanggo ang mga Saksi ni Jehova sa Russia dahil sa kanilang pananampalataya. Alamin ang kuwento nila, at kumuha ng listahan ng mga Saksing nakabilanggo.

NEWS RELEASE