HULYO 10, 2023
RUSSIA

Nahatulan ang Tatlong Sister sa Komsomolsk-on-Amur

I-PLAY

Noong Marso 23, 2023, hinatulan ng Centralniy District Court of Komsomolsk-on-Amur sina Sister Tatyana Bondarenko, Yelena Nesterova, at Tatyana Svoboda. Sinentensiyahan sila ng tiglimang-taóng suspended prison sentence. Hindi nila kailangang makulong sa ngayon.

Profile

Tatyana Bondarenko

Ipinanganak: 1960 (Komsomolsk-on-Amur, Khabarovsk Territory)

Maikling Impormasyon: Nagtrabaho bilang operator ng milling machine at housekeeper

Napangasawa si Vladimir noong 1992. Mayroon silang tatlong anak na lalaki

Nagpa-Bible study nang malaman niya ang layunin ng Diyos para sa mga tao at ang pangako ng Diyos na paraisong lupa. Nabautismuhan noong 2005

Personal na mga Komento

Paano ka tinulungan ni Jehova sa mahirap na panahong ito?

Nasa ospital ang mister ko, na hindi Saksi ni Jehova, nang halughugin ang bahay namin. Tinawagan niya ako noong araw na iyon para sabihin na pinapauwi na siya ng mga doktor. Pero dahil kinuha ng mga pulis ang phone ko, hindi ko nasagot ang tawag niya. Gabi na nang matawagan ko siya, pagkatapos ng imbestigasyon, para ipaliwanag ang nangyari. Alalang-alala talaga kami. Pero nanalangin ako kay Jehova para maging kalmado ako, at sinagot niya iyon. Nang makauwi na kami ng mister ko nang gabing iyon, napakabait niya at tinulungan niya akong linisin ang bahay pagkatapos ng paghalughog dito. Natulungan ako ng karanasang ito na mas magtiwala kay Jehova.

Yelena Nesterova

Ipinanganak: 1967 (Komsomolsk-on-Amur)

Maikling Impormasyon: Nagtrabaho bilang accountant

Mayroon siyang dalawang anak na babae; ang isa ay namatay noong 1998

Nakilala ang mga Saksi ni Jehova nang kumuha siya ng isang abogado na Saksi. Humanga siya sa katapatan nila at paggamit ng Bibliya para sagutin ang mga tanong niya. Nabautismuhan noong 1997

Personal na mga Komento

Ano ang natutuhan mo sa mahirap na karanasang ito?

Mas nakita ko na kapag masunurin tayo at sumusunod sa mga payo, talagang makikinabang tayo. Pagkatapos akong sampahan ng kasong kriminal, pinayuhan ako ng isang brother na umpisahan na ang paggawa ng mga huling sasabihin ko sa mga hukom. Babasahin ko lang ’yon sa pagtatapos ng paglilitis, pero naisip ko, ‘Ni hindi pa nga nag-uumpisa ang paglilitis, e.’ Pero pagkatapos kong ipanalangin iyon, isinulat ko ang sasabihin ko. Napakabilis ng paglilitis, kaya kung hindi ako naghanda nang patiuna, hindi ko magagawang magbigay ng mahusay na patotoo sa korte. Kaya napakahalagang makinig sa mga kapatid, kahit na kung minsan, hindi natin ito masyadong nauunawaan.

Dalangin natin na patuloy na pagpalain at palakasin ni Jehova ang mga sister nating ito habang nananatili silang tapat sa ilalim ng pagsubok.—Ruth 2:12.

Time Line

Setyembre 21, 2021

Sinampahan ng kasong kriminal si Tatyana Svoboda
Oktubre 18, 2021

Inimbestigahan ng mga awtoridad sina Tatyana Bondarenko at Yelena Nesterova
Oktubre 20, 2021

Hinalughog ang mga bahay nila
Agosto 28, 2022

Sinampahan sila ng kasong kriminal
Disyembre 28, 2022

Nagsimula ang paglilitis
Marso 23, 2023

Nahatulan at binigyan sila ng tiglilimang-taóng suspended prison sentence

Tingnan Din

NEWS RELEASE

Nakabilanggo Dahil sa Kanilang Pananampalataya—Russia

Ibinibilanggo ang mga Saksi ni Jehova sa Russia dahil sa kanilang pananampalataya. Alamin ang kuwento nila, at kumuha ng listahan ng mga Saksing nakabilanggo.

NEWS RELEASE