PEBRERO 9, 2024
RUSSIA

Pagharap sa Pagsubok Nang May Tiwala kay Jehova

I-PLAY

Malapit nang ilabas ng Blagoveshchensk City Court of the Amur Region ang hatol nito sa kaso nina Sister Kristina Golik, Yekaterina Olshevskaya, Mariya Myasnikova, at Valentina Yermilova. Wala pang hinihiling ang prosecutor na parusa para sa kanila.

Profile

Kristina Golik

Ipinanganak: 1992 (Ukraine)

Maikling Impormasyon: Nag-aral ng graphics at web design

Nasa ikalimang henerasyon na ng mga Saksi ni Jehova sa pamilya. Nabautismuhan noong 2006

Napangasawa niya si Dmitriy noong 2012. Nahatulan si Dmitriy noong Hunyo 2021 na mabilanggo nang anim na taon at dalawang buwan

Personal na mga Komento

Anong teksto sa Bibliya ang nakakatulong sa iyo na manatiling masaya?

Nang una kaming magkahiwalay ni Dmitriy, hindi ko alam kung ano ang mararamdaman ko. Talagang nami-miss ko ang tulong at suporta niya. Nagsumamo ako kay Jehova na tulungan ako. Sa pagbabasa ko ng Bibliya, nabasa ko ang Awit 17. Partikular akong napatibay ng talata 15: “Pero ako, makikita ko ang iyong mukha dahil ginagawa ko ang tama; kontento akong magising na kasama ka.” Paggising ko tuwing umaga, ipinapaalala ko sa sarili ko na kilalang-kilala ako ng Diyos ko, si Jehova. Siya ang pinakanakakaalam kung paano ako papatibayin at palalakasin. Kahit may mga pagsubok, lagi pa rin akong may dahilan para maging masaya.

Yekaterina Olshevskaya

Ipinanganak: 1984 (Blagoveshchensk)

Maikling Impormasyon: Napangasawa niya si Anton noong 2010. Mayroon silang apat-na-taóng-gulang na anak na lalaki

Nahatulan si Anton at ang tatay niyang si Sergey Afanasiyev noong Disyembre 2022 at nasentensiyahang makulong nang mahigit anim na taon

Personal na mga Komento

Paano tumibay ang kaugnayan mo kay Jehova dahil sa pinagdadaanan mo ngayon?

Sa nakalipas na limang taon, pagod na pagod ako sa mga hearing sa kaso ng tatay ko, ng asawa ko, at ngayon, ng sarili kong kaso. Puwede akong makulong, at kapag nangyari iyon, mawawalan ng magulang ang anak namin. Pero totoong-totoo sa akin ang sinabi ng matuwid na si Job sa Job 42:5: “Narinig ng mga tainga ko ang tungkol sa iyo, pero ngayon ay nakikita ka na ng aking mga mata.” Kahit na mahirap ang pinagdadaanan ko ngayon at wala akong asawang masandalan, ngayon lang ako nagkaroon ng ganito kalapít na kaugnayan kay Jehova. Sinabi sa akin noon ni Anton: “Kahit na makulong ako at hindi kita mapaglaanan, huwag kang mag-alala. Si Jehova ang pinakamahusay na ulo ng pamilya. Aalagaan ka niya.” At talagang naging napakabait ni Jehova sa akin. Hindi lang siya basta nakikinig at naaawa sa akin. Inilalaan niya ang emosyonal at pisikal na mga pangangailangan ko, kadalasan na, bago ko pa hilingin iyon.

Mariya Myasnikova

Ipinanganak: 1994 (Chernigovka, Amur Region)

Maikling Impormasyon: Isang office manager

Tinuruan si Mariya ng nanay niya tungkol sa Bibliya. Nagustuhan niya ang katuparan ng mga hula sa Bibliya at ang pag-asang buhay na walang hanggan. Nabautismuhan siya noong 2006

Napangasawa niya si Nikolay noong 2021

Personal na mga Komento

Ano ang nakatulong sa iyo na manatiling positibo sa kabila ng nararanasan mong pagsubok?

Itinuturing ko ang mga pagsubok na pagkakataon para maging mas mabuting Kristiyano. Nadadalisay ang ginto sa mainit na temperatura. Nakakatulong din ang mga problemang nararanasan ko ngayon para magkaroon ako ng mga katangiang gusto ni Jehova at makakatulong sa akin sa hinaharap. Isa pa, napapatibay ako ng sinasabi sa 1 Juan 2:17: “Ang sanlibutan ay lumilipas, pati ang pagnanasa nito, pero ang gumagawa ng kalooban ng Diyos ay mananatili magpakailanman.” Kapag iniisip kong pansamantala lang ang mga nangyayari ngayon, nagkakaroon ako ng lakas para patuloy na makapagtiis.

Valentina Yermilova

Ipinanganak: 1970 (Shimanovsk, Amur Region)

Maikling Impormasyon: Nagtrabaho bilang isang laboratory technician

Napangasawa si Sergey noong 1995. Mayroon silang isang anak na lalaki

Tuwang-tuwa siya nang malaman niya ang tungkol sa pag-asang pagkabuhay-muli. Nabautismuhan noong 2009

Noong Disyembre 2022, nasentensiyahan si Sergey na mabilanggo nang anim na taon at tatlong buwan

Personal na mga Komento

Ano ang natutuhan mo sa mahirap na karanasang ito?

Nakita kong mahalaga na huwag masyadong magpokus sa sarili kong kalagayan. Pinapaalala ko sa sarili ko na ang pinakamahalaga sa lahat ay ang mapabanal ang pangalan ni Jehova. Itinuturing ng maraming tao na isang malaking karangalan na ibigay ang buhay nila para sa kanilang bansa. Pero para sa akin, di-hamak na mas malaking karangalan ang ipagtanggol ang pangalan ni Jehova. Gusto kong ibigay ang pinakamabuti ko kay Jehova at purihin siya. Sigurado ako na hinding-hindi niya ako pababayaan.

Nagpapasalamat tayo sa halimbawa ng mga sister na ito na nagtitiwala kay Jehova. Sigurado tayo na patuloy silang pangangalagaan ni Jehova at sagana niya silang pagpapalain.—Awit 27:3.

Time Line

Hulyo 20, 2018

Hinalughog ang mga bahay
Hulyo 22, 2021

Sinampahan ng kasong kriminal ang apat na sister
Hulyo 27, 2021

Sina Kristina at Mariya ay pinagbawalang umalis ng kanilang lugar
Agosto 3, 2021

Pinagbawalang umalis ng kanilang lugar si Yekaterina
Agosto 4, 2021

Pinagbawalang umalis ng kanilang lugar si Valentina
Mayo 26, 2023

Nagsimula ang paglilitis

Magugustuhan Mo Rin

NEWS RELEASE

Nakabilanggo Dahil sa Kanilang Pananampalataya—Russia

Ibinibilanggo ang mga Saksi ni Jehova sa Russia dahil sa kanilang pananampalataya. Alamin ang kuwento nila, at kumuha ng listahan ng mga Saksing nakabilanggo.

NEWS RELEASE