AGOSTO 2, 2021
RUSSIA

Tapat na mga May-edad—Masaya Kahit Pinag-uusig

I-PLAY

Mula nang legal na ipagbawal ang mga Saksi ni Jehova sa Russia noong 2017, pinuntirya ng mga awtoridad ang mga kapatid sa buong bansa. Ang pinakabata ay 18 at ang pinakamatanda ay 89 anyos. Noong Hulyo 2021, 18 kapatid na edad 60 pataas ang nahatulan at pinarusahan dahil lang sa kanilang mapayapang pagsamba. Tatlo pa ang nasa bilangguan. a Binanggit ng 2021 Ikaapat na Update ng Lupong Tagapamahala ang nakakapangilabot na mga pagsalakay sa may-edad nating mga kapatid.

Paano natiis ng mahal nating may-edad nang mga kapatid ang pag-uusig na ito? Natutuwa kaming ibahagi sa inyo ang sinabi ng ilan sa ating tapat na mga kapatid.

Aleksandr Ganin

Ipinanganak: 1957

Hatol: Tatlong-taóng suspended prison sentence at siyam na buwan siyang hindi puwedeng magbiyahe

Nabautismuhan: 1997

Personal na mga Komento

Paano ka nananatiling masaya kahit pinag-uusig?

Si Jehova ay nagbibigay ng malinaw na tagubilin sa pamamagitan ng kaniyang organisasyon kung paano hindi malulungkot kapag pinag-uusig at manatiling positibo. May sakit na kami ng asawa ko bago pa ako inaresto. Pero nanatili kaming abala, at hindi namin hinahayaang may makagambala sa kaugnayan namin kay Jehova.

Paano nakaapekto sa iyo at sa iyong pamilya ang pag-uusig?

Lalong tumibay ang aming pananampalataya at naging mas malapít kami sa isa’t isa. Alam kong natutupad ang mga hula sa Bibliya at napakalapit na natin sa panahon kung kailan may mangyayaring malaking mga pagbabago. Ang kaalamang iyan ang nagbibigay sa akin ng lakas para patuloy na makapaglingkod nang walang panggambala.

Yuriy Krutyakov

Ipinanganak: 1952

Hatol: Anim-na-taóng suspended prison sentence, kabilang ang limang-taon na probation at isang taon na hindi puwedeng magbiyahe

Nabautismuhan: 1998

Personal na mga Komento

Paano nakaapekto sa iyo at sa iyong pamilya ang pag-uusig na ito?

Tiyak na mas mabuti ang suspended sentence kaysa makulong. Pero mahirap makahanap ng trabaho dahil sa edad ko at dahil akusado ako sa isang krimen. At napakaliit ng natatanggap ko sa pensiyon kada buwan kumpara sa mataas na presyo ng groseri, gamot, at pagpapagamot.

Ano ang mga problema mo sa kalusugan, at paano mo ito natitiis?

May osteoarthritis ako sa tuhod. At bago umalis sa kulungan, nagkapulmonya ako. May mga kasama kasi ako sa selda na naninigarilyo. May problema pa rin ako sa baga. Kaya sinisikap kong sundin ang mga payo ng mga doktor at gawin ang buong makakaya ko para mapangalagaan ang aking kalusugan at patuloy kong magawa ang kalooban ni Jehova.

Sa ano-anong espesipikong paraan nakatulong sa iyo si Jehova nang matapos ang paglilitis mo sa korte?

Malaking tulong sa akin ang mga kapatid. Totoong-totoo ang pananalita sa Awit 133:1. Isang pagpapala na madama ang pag-ibig nila. Natatabunan no’n ang problema ko. Hindi ko akalaing magkakaroon ako ng napakaraming kaibigan na mga kapatid. Nakita ko kung paano tayo pinangangalagaan ni Jehova sa pamamagitan ng ating mga kapatid. Napakabait ni Jehova, at talagang tinutulungan niya tayo sa pinakamahihirap na kalagayan. Gusto kong patuloy na paglingkuran ang gayong maibigin at napakabait na Diyos! Iyon ang pinakamahalaga sa akin.

Lyudmila Ponomarenko

Ipinanganak: 1950

Hatol: Dalawang-taóng suspended sentence at isang-taon na probation

Nabautismuhan: 1998

Personal na mga Komento

Ano ang mga restriksiyon mo?

Hindi ako puwedeng lumipat ng bahay nang hindi ipinaaalam sa ahensiya ng gobyerno na kumokontrol sa mga gawain ng mga indibidwal na may suspended sentence. Dapat din akong magpakita sa ahensiyang ito minsan sa isang buwan.

Paano ito nakaapekto sa iyong kalusugan?

Madalas sumakit ang ulo ko at matagal itong mawala. Nakakatulong sa akin ang paghiling sa Diyos sa panalangin na sana maging makatuwiran ako at mapanatili ko ang tamang saloobin sa mga bagay na hindi ko kayang baguhin.

Paano ka tinutulungan ni Jehova?

Sagana akong pinagpapala ni Jehova mula nang matapos ang mga paglilitis sa korte. Binibigyan niya ako ng lakas para patuloy ko siyang sambahin, at hindi niya ako iniwang mag-isa. Laging nasa tabi ko ang aking maibiging mga kapatid, at kapag may problema, lagi silang handang tumulong sa akin. Kahit na mahirap ang buhay at parang imposibleng magbago ang ilang sitwasyon, may mga pagpapala pa rin si Jehova. Natutuhan kong higit na magtiwala kay Jehova sa lahat ng bagay. Nagpapasalamat ako kay Jehova sa pagbibigay sa akin ng atas na mangaral sa mga opisyal sa korte. Isang kagalakan iyon para sa akin. Wala akong dahilan para malungkot, at determinado akong takbuhin hanggang wakas ang takbuhan para sa buhay at tulungan ang iba na matapos ito.

Gennady Shpakovskiy

Ipinanganak: 1958

Hatol: Noong una, anim-at-kalahating-taóng pagkabilanggo. Umapela siya, at pinagaan ang parusa sa suspended sentence na may dalawang-taon na probation

Nabautismuhan: 1995

Personal na mga Komento

Mula nang matapos ang iyong paglilitis, ano ang mga restriksiyon mo?

Hindi ako puwedeng makibahagi sa pag-oorganisa o paggawa ng anumang pampublikong gawain ng relihiyosong mga organisasyon sa loob ng tatlong taon. Hindi ako puwedeng umalis ng bahay mula 11:00 p.m. hanggang 6:00 a.m. Hindi ako puwedeng bumiyahe sa labas ng lunsod namin o lumipat ng bahay nang walang pahintulot. At dapat akong magpakita sa isang ahensiya ng gobyerno dalawang beses sa isang buwan.

Paano ka tinulungan ng mga kapuwa mo Saksi sa panahong ito?

Tumanggap ako ng lahat ng uri ng tulong. Mula noong unang araw na makulong ako, ako at ang pamilya ko ay tumanggap ng mga liham, card, drowing, at mga text. Damang-dama namin ang pagmamahal nila, pinapatibay nila kami, at nag-aalok sila ng anumang maitutulong.

Paano napatibay ang determinasyon mong patuloy na paglingkuran si Jehova?

Ang lahat ng nangyari sa akin at sa pamilya ko nitong nakalipas na mga taon ay nagpatibay ng pagtitiwala ko na ang pinaglilingkuran ko ay ang tunay na Diyos, si Jehova! Dahil sa pagbabasa, pagbubulay-bulay, at pakikibahagi ko sa mga pangyayari na inilalarawan ng Bibliya bilang “mga huling araw,” mas nagiging kumbinsido ako na nasa tamang landas ako papunta sa bagong sanlibutan.

Valentina Suvorova

Ipinanganak: 1948

Talambuhay: Dalawang-taóng suspended prison sentence

Nabautismuhan: 1996

Personal na mga Komento

Paano ka naapektuhan ng pag-uusig na ito?

Kahiya-hiyang mahatulan na isang kriminal, dahil naniniwala ako sa isang Diyos ng pag-ibig, kagalakan, at awa. Lagi akong nababahala. May mga gabing hindi ako makatulog, sumasakit ang ulo ko, tumataas ang presyon ko, at masakit ang likod ko.

Ano ang nakatulong sa iyo na manatiling positibo?

Nakatulong sa akin ang pag-ibig, pasasalamat, at pagpapahalaga sa ating Diyos na si Jehova, sa kaniyang mga kautusan at mga simulain, at sa ating organisasyon. Dati ko nang alam ang tungkol sa pag-ibig, awa, kaaliwan, at pampatibay-loob ng ating mahal na Ama sa langit, ang Diyos na Jehova. Pero ngayon, lalo ko pang nararanasan ang pangangalaga ni Jehova sa akin; inilalaan niya ang mga pangangailangan ko sa araw-araw at tinutulungan niya akong manatiling tapat sa kaniya. Maraming salamat sa mahal kong mga kapananampalataya, matatalik na mga kaibigan, mga brother na nangunguna, at sa ating buong organisasyon. Salamat sa inyong lahat!

Nagpapasalamat tayo sa mahuhusay na halimbawa ng tapat nating may-edad nang mga kapatid sa Russia. Ang kanilang matapang na paninindigan sa katuwiran ay karapat-dapat tularan, at higit sa lahat, pinapahalagahan ni Jehova.—Kawikaan 16:31.

a Si Sister Valentina Baranovskaya, edad 70, ay nahatulang makulong nang dalawang taon. Si Brother Aleksandr Ivshin, edad 63, ay nahatulang makulong nang pito at kalahating taon. At si Brother Yuriy Savelyev, edad 68, ay nahatulang makulong nang anim na taon.

Magugustuhan Mo Rin

NEWS RELEASE

Nakabilanggo Dahil sa Kanilang Pananampalataya—Russia

Ibinibilanggo ang mga Saksi ni Jehova sa Russia dahil sa kanilang pananampalataya. Alamin ang kuwento nila, at kumuha ng listahan ng mga Saksing nakabilanggo.

NEWS RELEASE