AGOSTO 20, 2021
RUSSIA

Tatlong Brother at Isang Sister sa Dagestan, Tinulungan ni Jehova Habang Nakaditine

I-PLAY

Time Line

Malapit nang ilabas ng Kirovskiy District Court ng Makhachkala, sa Republic of Dagestan, ang hatol nito sa kaso nina Brother Marat Abdulgalimov, Arsen Abdullaev, Anton Dergalev, at Sister Mariya Karpova. a Wala pang hinihiling ang prosecutor na parusa para sa kanila
Mayo 27, 2020

Pagkatapos ng 362 araw, sina Marat, Arsen, Anton, at Mariya ay inilipat mula sa pretrial detention center at inilagay sa house arrest
Hunyo 4, 2019

Ipinadala ng Sovetskiy District Court ng Makhachkala ang apat na kapatid sa isang pretrial detention center
Hunyo 1, 2019

Pinasok ng mga opisyal ng FSB, secret police ng Russia, ang 13 bahay ng mga Saksi ni Jehova na nasa kabila ng Dagestan
Mayo 27, 2019

Sinampahan ng tanggapan ng FSB sa Dagestan ng kasong kriminal sina Marat, Arsen, Anton, at Mariya

Profile

Marat Abdulgalimov

Ipinanganak: 1991 (Makhachkala, Republic of Dagestan)

Maikling Impormasyon: May tatlong kapatid. Mahilig maglaro ng soccer. Sinanay bilang isang welder at kasalukuyang nagtatrabaho sa tindahan ng sapatos

Gustong-gusto niyang magbasa ng Bibliya mula sa pagkabata. Malapít siya sa mga taong tumutulad kay Kristo at iniibig ang kanilang kapuwa. Nabautismuhan bilang Saksi ni Jehova noong 2013

Personal na mga Komento

Ano ang nakatulong sa iyo na magtiis nang halos isang taon sa detention center?

Binulay-bulay ko ang kalagayan ko at ikinumpara ito sa kalagayan ni Jose. Posible akong makulong nang 10 taon. Nakulong si Jose nang 13 taon. Sa tulong ni Jehova, kaya ko ring manatiling tapat. Habang nakikita ko kung paano sinasagot ni Jehova ang mga panalangin ko, inihahagis ko sa kaniya ang lahat ng pasanin ko. Nakatulong sa akin ang Awit 55:22 na matiis ang pagsubok na ito. Nangangako ang tekstong ito na kung ihahagis ko ang pasanin ko kay Jehova, tutulungan niya ako. Kaya iyon ang ginawa ko.

Arsen Abdullaev

Ipinanganak: 1979 (Kasumkent, Republic of Dagestan)

Maikling Impormasyon: Mula pagkabata, mahilig nang maglaro ng volleyball at magbasa ng mga aklat. Nagtapos ng kurso sa paggawa ng alak. Nagtatrabaho bilang tagakumpuni ng heating at plumbing

Kahit salansang noong una ang mga magulang niya, nabautismuhan siya bilang Saksi ni Jehova noong 2000. Napangasawa niya si Suat. May isa silang anak na lalaki

Personal na mga Komento

Paano mo nalabanan ang pagkasira ng loob noong nakakulong ka?

Talagang nakatulong ang mga awit natin. Sumasaya ako dahil sa mga iyon. Madalas akong kumanta. Naging paborito ko ang Awit 45, “Ang Pagbubulay-bulay ng Aking Puso.” Nasisiraan din ako ng loob kung minsan. Naiinis ako sa kalagayan ko, naiirita, at wala akong gustong gawin. Pero hindi ko iyon hinahayaang tumagal hanggang kinabukasan. Sinasabi ko sa sarili ko: ‘Paggising mo bukas, magiging maayos ang lahat. Lilipas din ang ganitong nararamdaman mo. Magpakalakas ka; kailangan ka ng pamilya mo at ng mga kapatid.’

Anton Dergalev

Ipinanganak: 1985 (Rostov-on-Don, Rostov Region)

Maikling Impormasyon: Pinalaki si Anton at ang kapatid niyang lalaki ng kanilang nanay. Tinuruan siya ng nanay at lola nila na mahalin ang mga prinsipyo sa Bibliya. Nagtrabaho bilang electrician at landscape designer. Nabautismuhan bilang Saksi ni Jehova noong 2002

Personal na mga Komento

Paano ka tinulungan ni Jehova sa panahong ito ng pagsubok?

Malaki ang naitulong ng mga kapatid para alagaan kami. Sinabi ng isang kasama ko sa selda na hihinto rin ang mga padala mula sa mga kaibigan ko pagkatapos ng ilang buwan. Nagulat siya kasi nagpapadala pa rin ang mga kaibigan ko pagkatapos ng anim na buwan at kahit halos isang taon na!

Ano ang maipapayo mo sa iba para makapaghanda sa posibleng pag-uusig?

Ang maipapayo ko, huwag pabayaan ang pagtitipon nang sama-sama. Na-miss ko talaga ang mga pulong. Dapat nating samantalahin ang lahat ng pagkakataon na ibinibigay ni Jehova. Patibayin ang kaugnayan mo sa kaniya at huwag kang matakot sa anumang bagay. Hindi tayo iiwan ni Jehova!

Mariya Karpova

Ipinanganak: 1980 (Magadan, Magadan Region)

Maikling Impormasyon: May dalawang kapatid na lalaki. Mahilig mag-ski, magbiyahe, at magbasa. Nagtapos bilang isang beterinaryo

Nahanap niya sa Bibliya ang magagandang sagot tungkol sa hinaharap at nagdesisyon siyang maging Saksi ni Jehova. Nabautismuhan noong 1998

Personal na mga Komento

Ano ang nakatulong sa iyo na huwag sobrang mag-alala noong nakakulong ka?

Naalala ko ang maraming teksto sa Bibliya at isinulat ko ang mga iyon sa notebook. Pinatibay ako ng mga tekstong iyon sa loob nang tatlong buwan na wala akong Bibliya. Napatibay ako ng Filipos 4:6, 7. Kapag nag-aalala ako, binubuksan ko ang notebook ko, babasahin ko ang teksto, at sasabihin ko sa sarili ko: ‘Huwag kang mag-alala sa anumang bagay.’ Pagkatapos, gumagaan ang pakiramdam ko.

Paano ka nakumbinsi na tinutulungan ka ni Jehova sa mahirap na panahong ito?

Tinulungan niya akong makayanan ang pagkamatay ng tatay ko [habang nasa pretrial detention ako]. Si Nanay mismo ang nagbalita sa akin, hindi ibang tao, kasi pinayagan ako ng imbestigador na makausap siya sa telepono. Tinulungan din ako ng dalawa kong matalik na kaibigan kasi sinamahan nila si Nanay. Nagbiyahe sila para makasama si Nanay at suportahan siya noong panahon ng libing. Hindi rin kinalimutan ng mga kapatid ang nanay ko. Tinawagan nila siya, sinulatan, nagpadala sila ng mga card, at nagbigay ng praktikal na tulong para makapunta siya sa mga pagdinig.

Lubos tayong nagtitiwala na si Jehova, gaya ng kahulugan ng kaniyang pangalan, ay laging magiging anuman ang kailangan para protektahan at suportahan ang kaniyang bayan.—Exodo 3:14.

a Hindi laging ipinapaalám kung kailan ang petsa ng paghatol ng korte.

Magugustuhan Mo Rin

NEWS RELEASE

Nakabilanggo Dahil sa Kanilang Pananampalataya—Russia

Ibinibilanggo ang mga Saksi ni Jehova sa Russia dahil sa kanilang pananampalataya. Alamin ang kuwento nila, at kumuha ng listahan ng mga Saksing nakabilanggo.

NEWS RELEASE