AGOSTO 13, 2021 | UPDATED: MARSO 6, 2023
RUSSIA

UPDATE—BINAWASAN ANG SENTENSIYA | Brother Baranov at Li, Kalmado at Nagtitiwala kay Jehova

I-PLAY

Noong Marso 1, 2023, binawasan ng Khabarovsk Territory Court ang suspended prison sentence ni Brother Yegor Baranov at ginawang apat at kalahating taon dahil sa apela. Hindi niya kailangang makulong sa ngayon.

Noong Hunyo 6, 2022, hinatulan ng Vyazemskiy District Court sa Khabarovsk Territory si Yegor nang limang taon ng suspended prison sentence. Nakalulungkot, si Brother Yen Sen Li ay namatay bago matapos ang paglilitis.

Time Line

Pebrero 2, 2021

Nagsimula ang mga pagdinig ng korte sa kaso nina Yegor at Yen Sen
Nobyembre 20, 2020

Pinalaya si Yegor mula sa pretrial detention center pagkalipas ng 177 araw
Agosto 26, 2020

Kinuha ng Central District Court ng Khabarovsk ang kotse ni Yen Sen
Mayo 29, 2020

Ipinadala si Yegor sa isang pretrial detention center
Mayo 26, 2020

Sinampahan ng kasong kriminal sa Khabarovsk Territory sina Yegor at Yen Sen

Profile

Yegor Baranov

Ipinanganak: 2001 (Olovyannaya, Trans-Baikal Territory)

Maikling Impormasyon: May dalawang kuya. Namatay ang tatay nila noong 2013. Mahilig sa kalikasan at sa mga hayop. Nag-aaral ng forestry bago maaresto

Pinalaki ng nanay niya na isang Saksi ni Jehova. Nakakatulong sa kaniya ang pag-asang makitang muli ang tatay niya sa pagkabuhay-muli. Nabautismuhan bilang Saksi ni Jehova noong 2017. Mahilig tumugtog ng piano, gumawa ng tula, at magluto

Personal na mga Komento

Paano tumibay ang kaugnayan mo kay Jehova dahil sa karanasang ito?

Masaya ako kasi ngayong pinagdadaanan ko ang pagsubok na ito, nakita ko na gaano man kahirap ang sitwasyon, alam ni Jehova ang nadarama ng bawat isa sa atin. Na-realize ko na kapag medyo nagdududa ako, baka dahil ’yon sa nakakalimutan ko kung gaano katalino ang Diyos. Alam na alam niya kung ano ang gagawin, at madalas, hindi iyon ang inaasahan natin na gagawin niya. Noong nasa detention center ako, nasubok ang pagtitiwala ko kay Jehova, at dahil do’n, lalong tumibay ang pagtitiwala ko sa kaniya.

Yen Sen Li

Ipinanganak: 1952 (Nikolaevsk-on-Amur, Khabarovsk Territory)

Maikling Impormasyon: Pangatlo sa limang magkakapatid. Isang electrical engineer. Napangasawa si Olga noong 1991. May isa silang anak na lalaki. Naging interesado sa Bibliya nang malaman nilang mag-asawa ang sinasabi nito tungkol sa pag-asa ng mga tao sa hinaharap. Nabautismuhan noong 1994. Mahilig maglaro ng chess at maglakad-lakad

Personal na mga Komento

Ano ang ipinanalangin mo kay Jehova sa panahong ito?

Nagsumamo ako sa Diyos na patibayin kami ng asawa ko at bigyan sana kami ng kapayapaan ng puso. . . . Naging kalmado ako sa mga interogasyon, kaya tumibay ang pagtitiwala ko na hinding-hindi ako pababayaan ni Jehova.

Nang maospital ang asawa ko dahil sa atake sa puso, nagsumamo ako kay Jehova na . . . maging maayos sana ang pagpapagamot niya. Dininig ni Jehova ang mga panalangin ko. Kitang-kita ko na sinuportahan niya kaming mag-asawa sa pamamagitan ng mga kapatid. Lagi silang nandiyan para sa amin. Sinuportahan nila kami sa materyal, at higit sa lahat, tinulungan nila kaming manatiling malapít kay Jehova.

Sa tulong ng mga kapatid at ni Jehova, napanatili ng misis ko ang matibay na pananampalataya niya kay Jehova. . . Pinapatibay pa nga niya ang iba. Para sa akin, katibayan ’yon na sinusuportahan ni Jehova ang asawa ko.

Masayang-masaya tayo na patuloy na nagtitiwala kay Jehova ang ating mga kapatid, at alam nating palalakasin niya sila para makapagtiis.—2 Tesalonica 3:3.

Magugustuhan Mo Rin

NEWS RELEASE

Nakabilanggo Dahil sa Kanilang Pananampalataya—Russia

Ibinibilanggo ang mga Saksi ni Jehova sa Russia dahil sa kanilang pananampalataya. Alamin ang kuwento nila, at kumuha ng listahan ng mga Saksing nakabilanggo.

NEWS RELEASE