ENERO 31, 2022 | UPDATED: MARSO 27, 2023
RUSSIA

UPDATE—BINAWASAN ANG SENTENSIYA | Sister Lyudmila Salikova, Nakasumpong ng Lakas at Kaaliwan kay Jehova

I-PLAY

Noong Marso 23, 2023, inilabas ng Chelyabinsk Regional Court ang desisyon nito sa ikalawang apela ni Sister Lyudmila Salikova. Binawasan ng korte ang suspended prison sentence niya. Mula anim na taon ginawa itong dalawa at kalahating taon. Hindi niya kailangang makulong sa ngayon.

Noong Marso 17, 2022, hindi tinanggap ng Chelyabinsk Regional Court ang apela ni Lyudmila.

Noong Enero 20, 2022, hinatulang nagkasala ng Snezhinsk City Court ng Chelyabinsk Region si Lyudmila at pinatawan ng anim-na-taóng suspended prison sentence.

Time Line

Nobyembre 2020

Hinalughog ng mga pulis ang mga bahay ng apat na pamilya ng mga Saksi ni Jehova, kasama na ang bahay ni Lyudmila. Hinalughog din ng mga pulis ang lugar na pinagtatrabahuhan niya. Pagkatapos, sapilitan siyang pinagbitiw sa trabaho niya
Agosto 26, 2021

Kinasuhan si Lyudmila dahil sa pag-oorganisa ng mga pulong para sa isang ipinagbabawal na relihiyosong organisasyon at pag-aangkat ng ipinagbabawal na mga literatura
Disyembre 8, 2021

Nagsimula ang paglilitis

Profile

Lyudmila Salikova

Ipinanganak: 1951 (Sysert)

Maikling Impormasyon: Nag-asawa noong 1971. May tatlong anak na lalaki. Namatay ang asawa noong 2009. Isang energy engineer para sa lunsod ng Snezhinsk. Mahilig magbiyahe

Nag-aral ng Bibliya ang ate niya noong 1999. Pagkaraan ng anim na buwan, sumama sa kaniya sa pag-aaral si Lyudmila. Nalaman niya ang kasiya-siyang paliwanag tungkol sa kahulugan ng buhay at kung bakit palasak ang kawalang-katarungan, karahasan, at digmaan. Nabautismuhan noong 2002

Personal na mga Komento

Paano ka naging mas malapít kay Jehova sa panahong ito ng pag-uusig?

Bago nangyari ang pag-uusig, madalas kong maisip na hindi ako mahalaga kay Jehova . . . Nagbago ang pag-iisip ko; naniniwala na ako na mahalaga ako kay Jehova. At binigyan din ako ni Jehova ng pribilehiyo na pabanalin ang pangalan niya sa harap ng korte dito sa Snezhinsk. Kaya nagtitiwala na ako na mahal ako at pinagkakatiwalaan ni Jehova. Itinuturing ko ang aking sitwasyon na isang pagkakataon para ipakita na lagi niya akong mapagkakatiwalaan.

May sinabi ba sa iyo ang isang kapatid na nakatulong sa iyo na magtiis?

Bago ang una kong hearing, kabadong-kabado ako . . . Nanalangin ako: “. . . Pakisuyo, bigyan n’yo po ako ng inyong banal na espiritu. Nagsusumamo po ako, Jehova!” Makalipas ang ilang sandali, nakatanggap ako ng text mula sa isang sister. Ganito ang sabi: “. . . Ang isang pagsubok sa pananampalataya ay parang washing machine. ‘Iikot, pipilipitin, at pipigain’ tayo nito. Pero gaya ng washing machine na naglilinis ng mga damit, mas bumubuti tayo dahil sa mga pagsubok. Ang lahat ng paghalughog, pagtatanong, at imbestigasyon ay parang ‘pagpilipit at pagpiga’ sa iyo. Pero sa lahat ng pinagdaanan mo, lalo kang naging napakahalaga kay Jehova . . . Natitiyak namin na bukas ng umaga, madarama mo rin ang pag-ibig at proteksiyon sa iyo ni Jehova sa korte.” Tiyak ko na alam ni Jehova ang nadarama ko at ginamit ni Jehova ang sister na iyon para ipadama na mahal ako ni Jehova.

Patuloy na nakasusumpong ng lakas at kaaliwan kay Jehova ang mga kapatid natin sa Russia. Tinitiyak sa atin ng ating maibiging Diyos na kaniyang “bibigyan . . . ng katarungan ang mga walang ama at ang mga inaapi, para hindi na sila takutin pa ng mga hamak na tao sa lupa.”—Awit 10:18.

Magugustuhan Mo Rin

NEWS RELEASE

Nakabilanggo Dahil sa Kanilang Pananampalataya—Russia

Ibinibilanggo ang mga Saksi ni Jehova sa Russia dahil sa kanilang pananampalataya. Alamin ang kuwento nila, at kumuha ng listahan ng mga Saksing nakabilanggo.

NEWS RELEASE