DISYEMBRE 23, 2021 | UPDATED: AGOSTO 29, 2023
RUSSIA

UPDATE—HINATULANG NAGKASALA ANG MAG-ASAWA | Mga Paglalaan ni Jehova—Nagbibigay ng Kapayapaan sa Pamilyang Postnikov

I-PLAY

Noong Agosto 23, 2023, hinatulan ng Birobidzhanskiy District Court of the Jewish Autonomous Region sina Brother Oleg Postnikov at Sister Agnessa Postnikova. Si Oleg ay pinatawan ng limang-taón-at-anim-na-buwang suspended prison sentence habang si Agnessa naman ay pinatawan ng apat-na-taón-at-anim-na-buwang suspended prison sentence. Hindi sila makukulong sa ngayon.

Noong Oktubre 11, 2022, binaligtad ng Court of the Jewish Autonomous Region ang hatol na guilty sina Brother Oleg Postnikov at Sister Agnessa Postnikova. Lilitisin uli sila.

Noong Abril 25, 2022, hinatulang nagkasala ngBirobidzhanskiy District Court of the Jewish Autonomous Region sina Oleg at Agnessa. Pinatawan si Oleg ng lima-at-kalahating-taóng suspended prison sentence at limang taon naman kay Agnessa. Hindi nila kailangang makulong sa ngayon.

Time Line

Pebrero 12, 2021

Sinampahan ng FSB ng kasong kriminal si Agnessa. Ang mga Postnikov ay inakusahan ng pagbuo ng isang “kriminal” na grupo at pagsasabi sa iba ng tungkol sa “ekstremistang” mga tunguhin nito. Sina Oleg at Agnessa ay pinagbawalang umalis sa kanilang lugar, hindi rin sila puwedeng mag-withdraw ng pera sa kanilang mga bangko, at idinagdag ang pangalan nila sa listahan ng mga terorista sa Russia
Pebrero 12, 2020

Sinampahan ng FSB ng kasong kriminal si Oleg

Profile

Oleg Postnikov

Ipinanganak: 1965 (Vyazemsky, Khabarovsk Territory)

Maikling Impormasyon: Tubero. Naging miyembro ng isang gang noong tin-edyer. Nakulong dahil sa krimeng ginawa niya. Natuto tungkol sa Bibliya habang nasa bilangguan. Paglaya niya, nabautismuhan siya bilang isang Saksi ni Jehova noong 1986

Noong 1989, napangasawa niya si Agnessa. Malalaki na ang dalawa nilang anak

Personal na mga Komento

Paano mo nalaman ang katotohanan sa bilangguan?

May isang Saksi na nakulong dahil sa pagtanggi niyang magsundalo. . . . Matagal kaming nag-usap tungkol sa katibayan na may Diyos at sa mga depekto ng teoriya ng ebolusyon. Pinag-usapan din namin ang disenyo at pagiging masalimuot ng uniberso. Lubusang binago ng pag-uusap na iyon ang pag-iisip ko. . . . Nang maglaon, binasa ko ang ilang publikasyon ng mga Saksi ni Jehova. . . . Paglaya ko, nagpatuloy ako sa pag-aaral ng Bibliya at nagpabautismo.

Ano ang natutuhan mo tungkol sa pagtitiwala kay Jehova?

Madalas akong manalangin, lalo na kapag haharap ako sa imbestigador. Nakita ko sa karanasan ko na hindi ko kayang mag-isa na tanggihan ang tusong pamamaraan ng imbestigador para itakwil ko ang pananampalataya ko. Kaya para maging kalmado, kailangan kong lubusang magtiwala kay Jehova at huwag masyadong mag-alala sa kung ano ang maaaring mangyari.

May teksto ba na nagpatibay sa iyo?

Lagi kong iniisip ang Josue 1:9: “Kasama mo si Jehova na iyong Diyos saan ka man magpunta.” Ipinapaalala nito sa akin na baka mapunta ako sa lugar na hindi ko gusto. Pero tinitiyak sa akin ni Jehova: ‘Sasamahan kita, huwag kang mag-alala. Sinamahan ko si Jose, kaya sasamahan din kita.’ Nakatulong ang pangakong ito para hindi ako mag-alala sa maaaring mangyari bukas. Nakatulong din ito sa akin na huwag mag-isip ng negatibong mga bagay.

Agnessa Postnikova

Ipinanganak: 1963 (Kazakhstan)

Maikling Impormasyon: Ikalima sa pitong magkakapatid. Mahilig sa teatro at pagsayaw noong kabataan niya. Mahilig din siya sa skiing at skating. Dahil nasa probinsiya siya ngayon, nawiwili siyang mag-alaga ng mga bulaklak. Nagtrabaho sa isang tailor shop

Nabautismuhan noong 1979. Napangasawa niya si Oleg noong 1989

Personal na mga Komento

Paano ka tinutulungan sa mahirap na panahong ito?

Gusto kong pasalamatan ang Lupong Tagapamahala sa paghahanda ng espirituwal na pagkain sa tamang panahon. Gusto ko ring pasalamatan ang lahat ng kapatid na tumutulong sa paghahanda ng mga awit, pelikula, video, kombensiyon, at bagong mga salin ng Bibliya. Pinapasalamatan ko si Jehova kasi mayroon akong maibigin at kahanga-hangang pamilya na nagpapatibay sa akin sa mahirap na panahong ito.

Anong espesipikong mga paglalaan mula kay Jehova ang lubha mong pinapahalagahan?

Nakatulong sa akin ang pananalangin kay Jehova at pag-iisip tungkol sa mga awit na gaya ng, ‘Malapit Na’ at ‘Ito’y Nalalapit Na.’ Binabanggit ng mga awiting ito ang tungkol sa bagong sanlibutan. Napapakalma ako nito, at tinitiyak nito sa akin na mahal ako ng aking Ama, si Jehova.

Ang mga karanasang ito ay karagdagang katibayan na inihahanda ni Jehova ang kaniyang bayan para makapanatiling tapat sa kabila ng iba’t ibang pagsubok. Lagi nawa tayong magtiwala sa “tapat na pag-ibig at katapatan” ni Jehova.—Awit 115:1.

Magugustuhan Mo Rin

NEWS RELEASE

Nakabilanggo Dahil sa Kanilang Pananampalataya—Russia

Ibinibilanggo ang mga Saksi ni Jehova sa Russia dahil sa kanilang pananampalataya. Alamin ang kuwento nila, at kumuha ng listahan ng mga Saksing nakabilanggo.

NEWS RELEASE