SETYEMBRE 23, 2021
RUSSIA

UPDATE—HINDI TINANGGAP ANG APELA | Anim na Sister at Isang Brother ang Nagtiwala kay Jehova at sa mga Kapananampalataya Nila sa Panahon ng Paglilitis

I-PLAY

Noong Setyembre 26, 2022, hindi tinanggap ng Primorye Territory Court ang apela nina Sister Nadezhda Anoykina, Lyubov Galaktionova, Nailya Kogay, Nina Purge, Raisa Usanova, at Brother Valentin Osadchuk. Hindi nila kailangang makulong sa ngayon.

Noong Hunyo 1, 2022, hinatulang may-sala ng Leninskiy District Court ng Vladivostok sina Nadezhda, Lyubov, Nailya, Nina, Raisa, at Valentin. Pinatawan ng dalawang-taóng suspended prison sentence ang mga sister. At anim na taon naman para kay Valentin. Sinuspende ang kaso laban kay Sister Yelena Zayshchuk na 87 years old kasi may malala siyang sakit.

Time Line

Enero 19, 2021

Inilipat sa Leninskiy District Court ng Vladivostok ang kasong kriminal
Nobyembre 12, 2019

Ibinalik ang kasong kriminal sa prosecutor’s office
Abril 5, 2019

Pagkatapos ng 274 na araw sa pretrial detention center, pinalaya na rin si Valentin, ang nag-iisang brother na kasama sa kasong ito. Ipina-house arrest siya
Abril 19, 2018

Hinalughog ng mga opisyal ng Federal Security Service (FSB) ang bahay ng pitong Saksi
Abril 9, 2018

Kinasuhan ng Investigation Department ng FSB para sa Primorsky Territory si Valentin at ang anim na sister

Profile

Lyubov Galaktionova

Ipinanganak: 1942 (Vladivostok)

Maikling Impormasyon: Nagtrabaho bilang sekretarya hanggang sa magretiro. Nag-asawa noong 1962. Pagkaraan ng 14-na-taóng pagsasama, namatay ang asawa niya. Pinalaking mag-isa ang anak niyang lalaki. Dahil sa matagal na pagkakasakit, nagkaroon siya ng kapansanan

Pinag-isipan kung ano ang kahulugan ng buhay at kung bakit namamatay ang mga tao. Nahanap ang nakakapagpatibay na sagot sa mga tanong niya habang nakikipag-aral sa mga Saksi ni Jehova. Nabautismuhan noong 1998

Personal na mga Komento

Ano ang mga pakiusap mo kay Jehova sa mahirap na panahong ito?

Ipinanalangin kong maging panatag ako. Hiniling ko kay Jehova na tulungan akong maging mapagpakumbaba para maharap nang tama ang kawalang-katarungan at na bigyan niya sana ako ng lakas para matiis ang pag-uusig.

Nailya Kogay

Ipinanganak: 1951 (Tashkent, Uzbekistan)

Maikling Impormasyon: May dalawang kapatid na lalaki. Mahilig sa sports noong bata pa. Nagtapos at naging civil engineer. Retirado na ngayon. Pinakasalan si Robert noong 1975. Nagkaroon ng dalawang anak. Noong 1989, na-diagnose na may sakit si Robert at mangangailangan na siya ng tagapag-alaga. Lumipat sa Vladivostok noong 2003

Habang nakikipag-aral sa mga Saksi ni Jehova, nakumbinsing ang Bibliya ay Salita ng Diyos. Gustong-gusto ang pagiging lohikal ng Bibliya at ang pag-ibig ng Diyos. Nabautismuhan noong 1997

Personal na mga Komento

May sinabi ba sa iyo ang kakongregasyon mo na nakatulong para matiis mo ang pagsubok?

Maraming sister ang nagsabi sa akin: ‘Isa kang magandang halimbawa, isang huwaran, para sa ’min. Proud kami sa ’yo. Kung nagagawa mo ’yon, magagawa din namin!’

Nina Purge

Ipinanganak: 1940 (Pesok, Pskov Region)

Maikling Impormasyon: May mas batang kapatid na lalaki. Lumaki noong panahon ng Digmaang Pandaigdig II. Noong 1942, sinakop ng mga sundalong German ang nayon nila. Muntik nang mapatay ng mga Nazi ang buong pamilya nila

Pinakasalan ang asawa niya habang nag-aaral ito sa Estonian Maritime Academy. Nagkaroon sila ng dalawang anak. Lumipat ang pamilya nila sa Vladivostok nang ma-assign doon ang asawa niya

Noong mga huling taon ng 1990’s, nakipag-aral siya ng Bibliya sa mga Saksi ni Jehova. Nalamang makakahingi siya ng tulong sa Diyos anumang oras. Nabautismuhan noong 1999

Personal na mga Komento

Paano nakatulong ang karanasang ito para lalo kang mapalapít kay Jehova?

Mas tumibay ang pagtitiwala ko kay Jehova. Humiling ako ng lakas para makapagtiis hanggang wakas at makapanatiling tapat. At natulungan ako ng Isaias 41:13 na huwag matakot kasi hawak ng aking Ama [sa langit] ang kamay ko. Handa ako sa anumang mangyayari.

Raisa Usanova

Ipinanganak: 1947 (Kuznetsovo)

Maikling Impormasyon: May apat na kapatid: isang babae at tatlong lalaki. Pagka-graduate sa secondary school, lumipat sa Vladivostok para magsanay na maging railway technician. Nag-asawa at nagkaroon ng dalawang anak na babae. Nagtrabaho nang 25 taon bilang trolleybus driver. Retirado na ngayon

Noong 2000, nang mamatay ang nanay niya, kapatid na babae, at isang kapatid na lalaki, napaisip siya kung bakit namamatay ang mga tao at kung may pag-asa ba ang mga patay. Nahanap ang makatuwiran at nakakakumbinsing sagot sa mga tanong niya nang makipag-aral siya ng Bibliya sa mga Saksi ni Jehova. Nabautismuhan noong 2002

Personal na mga Komento

Ano ang natutuhan mo sa pagsubok na ito na makakatulong para maihanda ka sa darating pang mga pagsubok?

Natutuhan kong kontrolin ang sarili ko, lalo na sa pagsasalita. Natuto din akong magtiis at magtiwala kay Jehova. Mas lalo ko pang pinag-aaralan ang Bibliya. . . . Gusto kong makapanatiling tapat hanggang wakas.

Paano mo pinaghahandaan ang posibleng pag-uusig?

[Sinisikap kong] pag-isipang mabuti ang mga tekstong ‘ipapaalaala’ sa akin ng espiritu kapag kinailangan ko ito.—Juan 14:26.

Patuloy tayong napapatibay ng magagandang halimbawa ng ating mahal na mga kapatid sa Russia. Napapatunayan nilang sila ang uri na may pananampalataya na makapagliligtas ng buhay.—Hebreo 10:39.

Magugustuhan Mo Rin

NEWS RELEASE

Nakabilanggo Dahil sa Kanilang Pananampalataya—Russia

Ibinibilanggo ang mga Saksi ni Jehova sa Russia dahil sa kanilang pananampalataya. Alamin ang kuwento nila, at kumuha ng listahan ng mga Saksing nakabilanggo.

NEWS RELEASE