DISYEMBRE 27, 2023 | UPDATED: MARSO 6, 2024
RUSSIA

UPDATE—IKINULONG ANG MGA KAPATID | Nananatiling Positibo sa Kabila ng Mahabang Pagkakakulong at House Arrest

I-PLAY

Noong Marso 5, 2024, hinatulang may-sala ng Oktyabrskiy District Court of Irkutsk sina Brother Nikolay Martynov, Sergey Kosteyev, Yaroslav Kalin, Mikhail Moysh, Igor Popov, Denis Sarazhakov, Aleksey Solnechniy, Andrey Tolmachev, at Sergey Vasiliyev. Sinentensiyahan sina Nikolay, Sergey Kosteyev, Yaroslav, Mikhail, Aleksey, at Andrey ng pitong-taóng pagkabilanggo, at anim na taon at apat na buwan naman para kina Igor at Denis. Hinatulan naman si Sergey Vasiliyev ng tatlong taon sa bilangguan at agad na ikinulong pagkagaling sa korte. Ang iba pang brother ay nakakulong na bago pa magsimula ang paglilitis kaya mananatili lang sila sa bilangguan.

Profile

Nikolay Martynov

Ipinanganak: 1958 (Bandarka, Irkutsk Region)

Maikling Impormasyon: Isang drayber

Napangasawa si Irina noong 1982. Mayroon silang dalawang anak

Nakipag-aral si Irina sa mga Saksi ni Jehova noong 1997. Ang katuparan ng mga hula sa Bibliya ang nakakumbinsi kay Nikolay na nahanap na niya ang katotohanan. Pareho silang nabautismuhan noong 1998

Personal na mga Komento Mula sa Asawa ni Nikolay na si Irina a

Ano ang nakatulong sa asawa mo na manatiling positibo kahit mahigit dalawang taon na siyang nasa pretrial detention?

Regular na nagbabasa at nagbubulay-bulay si Nikolay ng Bibliya, at madalas niyang banggitin kung paano sinasagot ni Jehova ang mga panalangin niya. Pero hindi madali para sa kaniya na mawalay sa amin. Napakabait na asawa at ama ni Nikolay. Kaya napakahirap para sa kaniya na hindi kami mapaglaanan nang gaya ng ginagawa niya noon. Pero kapag sinasabi namin sa kaniya kung paano kami pinangangalagaan ni Jehova sa tulong ng mga kapatid, napapanatag siya. Nakakatulong din daw sa kaniya kapag ini-imagine niya ang buong pamilya namin na sama-sama sa bagong sanlibutan. Naiplano na nga niya sa isip kung ano ang magiging bahay namin doon at kung ano-anong puno ang itatanim niya.

Yaroslav Kalin

Ipinanganak: 1969 (Pivovarikha, Irkutsk Region)

Maikling Impormasyon: Pinalaki sa isang pamilyang Saksi. Naging tapon sa Siberia ang mga magulang at lolo’t lola niya noong 1951

Pag-aayos ng telebisyon at radyo ang hanapbuhay niya

Nabautismuhan bilang Saksi ni Jehova noong 1987

Napangasawa si Tatyana noong 1991. Mayroon silang dalawang anak na lalaki at dalawang anak na babae. Namatay ang bunso nilang anak na lalaki noong 2007

Personal na mga Komento Mula sa Asawa ni Yaroslav na si Tatyana b

Anong mga problema ang naranasan ng asawa mo sa kulungan, at ano ang nakatulong sa kaniya na magtiis?

Mahigit dalawang taon na nakulong mag-isa si Yaroslav, at napakahirap no’n para sa kaniya. Gustong-gusto niya kasing may kasama siya at nakikipagkuwentuhan. Talagang na-depress siya at nanghina noong mag-isa lang siya. Pero hindi siya sumusuko, at hindi niya iniisip na kawawa siya. Sa mga sulat niya, madalas niyang sipiin ang Colosas 1:11: “At mapalakas sana kayo ng maluwalhating kapangyarihan ng Diyos para maging mapagpasensiya kayo at masaya habang tinitiis ang lahat ng bagay.” Determinado siyang maging tapat at patuloy na magtiwala kay Jehova. Alam kong alam ni Yaroslav na para pagpalain siya ni Jehova, kailangan niyang patuloy na gawin ang kalooban ni Jehova ngayon at magpakailanman.

Mikhail Moysh

Ipinanganak: 1987 (Ukraine)

Maikling Impormasyon: Nagtrabaho sa construction at sales

Napangasawa si Yelena noong 2009. Mayroon silang dalawang anak na lalaki

Nabautismuhan si Yelena noong 2010. Nagsimulang dumalo ng mga pulong si Mikhail kasama si Yelena. Nabautismuhan siya noong 2016

Personal na mga Komento Mula sa Asawa ni Mikhail na si Yelena c

Paano inalalayan ni Mikhail sa espirituwal ang pamilya ninyo kahit mahigit dalawang taon na siyang nasa pretrial detention?

Ang panganay naming anak ay 12 anyos. Dalawa at kalahating taon naman ang bunso namin ngayon at anim na buwan lang siya nang arestuhin at makulong si Mikhail. Hindi niya maintindihan kung bakit hindi namin kasama sa bahay ang tatay niya. Miss na miss siya ng mga bata. Pero madalas silang sulatan ni Mikhail—pinapadalhan niya sila ng mga tula, tinuturuan sila tungkol sa mga hayop at mga ibon, ginagawan sila ng mga crossword puzzle, at binibigyan sila ng simpleng mga assignment na iri-research nila. Tinutulungan niya rin ako kapag nasisiraan ako ng loob. Minsan naitatanong ko: ‘Bakit kami? Bakit nangyari ito sa pamilya namin?’ Sa isa sa mga sulat ni Mikhail, tiniyak niya sa akin na kahit naitatanong ko ’yon, hindi naman ibig sabihin no’n na mahina ang pananampalataya ko. Isinulat niya: “Ang mahalaga ay kung ano ang ginagawa natin sa mga nararamdaman natin. Kung hahayaan nating ituwid ni Jehova ang pag-iisip natin, gaya ni Job, tutulungan niya tayo na mapalakas ang pananampalataya natin at magkaroon ng tamang pananaw.” Talagang napatibay ako ng sulat niya.

Igor Popov

Ipinanganak: 1987 (Kazakhstan)

Maikling Impormasyon: Walo silang magkakapatid. Namatay ang tatay niya noong 11 anyos siya.

Isang interior finisher at tubero

Nang mamatay ang tatay niya, nag-aral ng Bibliya ang nanay at kuya ni Igor. Sumama si Igor sa Bible study at tuwang-tuwa siya nang matutuhan niya ang tungkol sa pagkabuhay-muli. Nabautismuhan si Igor noong 2006 kasama ang pitong iba pa niyang kapamilya

Napangasawa si Mangira noong 2013

Personal na mga Komento Mula sa Asawa ni Igor na si Mangira d

Anong teksto sa Bibliya ang nakatulong sa iyo at sa asawa mo na maharap ang mahirap na sitwasyong ito?

Matagal siya sa bartolina. Sa isa sa mga sulat niya, binanggit niya ang Awit 118:5: “Sa kagipitan ay tumawag ako kay Jah; sumagot si Jah at dinala niya ako sa ligtas na lugar.” Isinulat ni Igor: “Puwede ring isalin na ‘isang maluwang na lugar’ ang ‘ligtas na lugar’ na iyon. Kaya kapag parang bihag tayo ng negatibong kaisipan, mapapalaya tayo ni Jehova at sasagutin niya ang mga panalangin natin—bibigyan niya tayo ng kapayapaan ng isip at puso.” Sa lahat ng naranasan namin, laging naipapaalala sa amin na humahanap si Jehova ng paraan para tulungan tayo at hinding-hindi niya tayo iiwan anuman ang kalagayan.

Denis Sarazhakov

Ipinanganak: 1988 (Sayanogorsk, Republic of Khakassia)

Maikling Impormasyon: Nagtrabaho sa advertising

Pinalaki bilang isang Saksi ni Jehova. Tinulungan siya ng mga magulang niya na mahalin si Jehova at maging malapít sa Kaniya. Kumbinsido siya na nakakatulong sa buhay ang mga payo sa Bibliya. Nabautismuhan noong 2004

Napangasawa si Olesiya noong 2007

Personal na mga Komento Mula sa Asawa ni Denis na si Olesiya e

Paano ka pinatibay ni Denis?

Madalas kaming magsulatan ni Denis. Pinapayagan kaming mag-usap sa telepono minsan sa isang linggo sa loob ng mga limang minuto. Puwede ko rin siyang dalawin nang isang oras dalawang beses kada buwan. May nakaharang sa amin na salamin habang nag-uusap kami sa telepono. Tuwing nag-uusap kami, may pampatibay para sa akin si Denis galing sa Bibliya. Ipinapaalala din niya sa akin na hindi namin dapat isiping kawawang-kawawa kami. Puwede kaming maging masaya sa nagagawa namin. Hindi kami nagpadaig sa mga problema namin. Napatibay pa nga nito ang pananampalataya namin.

Aleksey Solnechniy

Ipinanganak: 1976 (Abakan, Krasnoyarsk Territory)

Maikling Impormasyon: Isang electrician

Nakipag-Bible study ang nanay niya at nakababatang kapatid na babae sa mga Saksi ni Jehova noong naglilingkod pa sa militar si Aleksey. Pagbalik niya, naging interesado siya sa Bibliya at nagsimulang mag-aral. Nabautismuhan siya noong 2004

Napangasawa niya si Alyona noong 2011

Personal ng mga Komento Mula sa Asawa ni Aleksey na si Alyona f

Ano ang nakatulong sa asawa mo na manatiling positibo habang nakakulong?

Laging nananalangin si Aleksey kay Jehova para maalala niyang ipinagmamalaki siya ni Jehova. Lagi rin niyang tinatandaan na ginagawa lang ng mga pulis at ng mga opisyal sa korte ang trabaho nila. Nakatulong ito sa kaniya na magpokus sa karangalang ipagtanggol ang pangalan ni Jehova imbes na sa sarili niya at sa mahirap na kalagayan niya. Kahit nami-miss niya ako, ang pamilya niya, at mga kaibigan, positibo at komedyante pa rin si Aleksey.

Kahit na pansamantalang nawalay sa pamilya ang mahal nating mga kapatid, alam natin na walang makapaghihiwalay sa kanila sa pag-ibig ng Diyos habang tapat silang nagtitiis.—Roma 8:35-39.

Time Line

Oktubre 4, 2021

Hinalughog ang mga bahay ng mga Saksi ni Jehova sa Irkutsk Region. Sinampahan ng kasong kriminal sina Nikolay, Sergey Kosteyev, Yaroslav, Mikhail, Aleksey, Andrey, at Sergey Vasiliyev. Ikinulong ang pitong brother na ito
Oktubre 5, 2021

Inilipat sina Yaroslav, Mikhail, at Aleksey sa isang detention center habang naghihintay ng paglilitis
Oktubre 6, 2021

Inilipat sina Sergey Kosteyev, Nikolay, at Andrey sa isang detention center habang naghihintay ng paglilitis. Pinalaya si Sergey mula sa pansamantalang pagkakakulong at inilagay sa house arrest
Nobyembre 30, 2021

Marami pang bahay na hinalughog. Inaresto sina Denis at Igor at dinala sa Irkutsk, mahigit 1500 kilometro ang layo
Disyembre 1, 2021

Ikinulong si Igor sa isang detention center habang naghihintay ng paglilitis
Disyembre 2, 2021

Ikinulong si Denis sa isang detention center habang naghihintay ng paglilitis
Disyembre 29, 2022

Nagsimula ang paglilitis

a b c d e f Dahil nasa pretrial detention sina Brother Martynov, Kalin, Moysh, Popov, Sarazhakov, at Solnechniy, hindi sila puwedeng mainterbyu.

Tingnan Din

NEWS RELEASE

Nakabilanggo Dahil sa Kanilang Pananampalataya—Russia

Ibinibilanggo ang mga Saksi ni Jehova sa Russia dahil sa kanilang pananampalataya. Alamin ang kuwento nila, at kumuha ng listahan ng mga Saksing nakabilanggo.

NEWS RELEASE