DISYEMBRE 14, 2023 | UPDATED: ENERO 30, 2024
RUSSIA

UPDATE—IKINULONG ANG MGA KAPATID | “Napakahalagang Magtiwala kay Jehova”

I-PLAY

Noong Enero 25, 2024, hinatulan ng Samarskiy District Court of Samara sina Brother Aram Danielyan, Denis Kuzyanin, Sergey Polosenko, at Nikolay Vasiliyev. Lahat sila ay sinentensiyahan ng pitong-taóng pagkabilanggo. Agad silang kinuha sa korte at ibinilanggo.

Profile

Aram Danielyan

Ipinanganak: 1990 (Armenia)

Maikling Impormasyon: Lumipat ang pamilya nila sa Russia noong anim na buwang gulang siya

Nagtrabaho siya sa construction at purchasing

Natutuhan niya ang tungkol sa Bibliya mula sa tiya at nanay niya. Lumalim ang pag-ibig niya kay Jehova dahil sinasagot ni Jehova ang mga panalangin niya. Nabautismuhan siya bilang isang Saksi ni Jehova noong 2011

Napangasawa niya si Elina noong 2017. Mayroon silang isang anak na lalaki

Personal na mga Komento

Ano ang nakatulong sa iyo para hindi ka masiraan ng loob?

May mga panahong nalulungkot ako dahil sa kalagayan ko. Nakakatulong sa akin kapag iniisip ko na pinili kong maging isang lingkod ni Jehova. Kung titigil ako sa paglilingkod kay Jehova para lang maiwasan ang pag-uusig, ano pa’ng silbi ng buhay? Masaya ako kasi alam kong napapabanal ko at naipapakilala ang pangalan ni Jehova. Determinado akong patunayan kay Satanas na hinding-hindi ako hihinto sa paglilingkod kay Jehova kahit pa ikulong ako o mamatay.

Denis Kuzyanin

Ipinanganak: 1984 (Norilsk, Krasnoyarsk Territory)

Maikling Impormasyon: Self-employed

Nagpa-Bible study si Denis at ang nanay niya sa mga Saksi ni Jehova noong 10 taóng gulang siya. Nabautismuhan siya noong 2001

Napangasawa si Yelena noong 2012. May isa silang anak na babae

Personal na mga Komento

Anong ulat sa Bibliya ang nakatulong sa iyo na magkaroon ng tamang pananaw sa mga hamong nakakaharap mo?

Nagustuhan ko ang aklat ng Job. Simula sa kabanata 38, tinulungan ni Jehova si Job na maunawaan kung gaano kalakas ang ginamit niyang kapangyarihan sa paglalang. Sa tulong ng pagbubulay-bulay sa mga ginawa na at gagawin pa lang ni Jehova, naging mas balanse ang pananaw ko. Ipinaalala nito sa akin na ang pagsunod kay Jehova ang pinakamahalaga. Basta may pagsang-ayon ako ni Jehova, hindi magiging napakabigat ng mga problema ko.

Nikolay Vasiliyev

Ipinanganak: 1984 (Aisha, Republic of Tatarstan)

Maikling Impormasyon: Nagtrabaho bilang isang programmer

Dating hindi naniniwala sa Diyos. Pagkatapos mag-aral ng Bibliya, nakita niyang makatuwiran ang turo nito at nakumbinsi siya na umiiral nga ang Diyos. Nabautismuhan siya noong 2005

Personal na mga Komento

Ano ang nakatulong sa iyo na patuloy na magtiwala kay Jehova?

Ang totoo, bago ako ilagay sa pretrial detention, takot na takot akong makulong. Ngayong alam ko na kung ano ang buhay sa bilangguan at nakita ko kung paano ako tinulungan ni Jehova, hindi na ako takót. Kahit mahirap ang kalagayan ko kasi hindi ko alam kung gaano katagal ang paglilitis at kung ano ang magiging hatol sa akin, alam kong lagi kong kasama si Jehova. Napakahalagang magtiwala kay Jehova para magkaroon ng kapayapaan ng isip at makasigurong lulutasin niya ang problema ko sa pinakamabuting paraan.

Kumbinsido tayo na patuloy na aaliwin ni Jehova ang lahat ng nagdurusa dahil sa kanilang pananampalataya habang ‘pinatatatag sila na gumawa at magsalita ng mabubuting bagay.’—2 Tesalonica 2:16, 17.

Time Line

Disyembre 14, 2021

Sinampahan ng kasong kriminal sina Denis, Nikolay, at Sergey
Disyembre 15, 2021

Hinalughog ang bahay nina Denis, Nikolay, at Sergey. Idinitine at ikinulong sa pansamantalang detention center
Disyembre 16, 2021

Inilipat sina Denis, Nikolay, at Sergey sa isang pretrial detention center
Enero 6, 2022

Sinampahan ng kasong kriminal si Aram. Inaresto sa airport
Enero 7, 2022

Ikinulong si Aram sa pretrial detention center
Disyembre 12-14, 2022

Pinalaya sa kulungan ang apat na brother at pinagbawalang umalis ng kanilang lugar
Hunyo 16, 2023

Nagsimula ang paglilitis

Magugustuhan Mo Rin

NEWS RELEASE

Nakabilanggo Dahil sa Kanilang Pananampalataya—Russia

Ibinibilanggo ang mga Saksi ni Jehova sa Russia dahil sa kanilang pananampalataya. Alamin ang kuwento nila, at kumuha ng listahan ng mga Saksing nakabilanggo.

NEWS RELEASE