PEBRERO 10, 2023| UPDATED: HULYO 14, 2023
RUSSIA

UPDATE—IKINULONG ANG MGA KAPATID | Tatlong Brother ang Nililitis sa Isang Korte sa Moscow

I-PLAY

Noong Hulyo 12, 2023, hinatulan ng Savelovskiy District Court of Moscow sina Brother Roman Mareyev, Anatoliy Marunov, at Sergey Tolokonnikov. Si Roman ay sinentensiyahang mabilanggo nang apat na taon at anim na buwan. Hinatulan naman si Anatoliy ng anim na taon at anim na buwan. At si Sergey naman ay hinatulan ng limang taon. Agad na ikinulong si Anatoliy mula sa hukuman. Nasa detention center na sina Roman at Sergey.

Profile

Roman Mareyev

Ipinanganak: 1978 (Moscow)

Maikling Impormasyon: Nagtrabaho sa transit system ng Moscow. Siya ang nag-aalaga sa mga magulang niya bago siya inilagay sa detention center

Sinimulang basahin ang Bibliya at humanga sa katumpakan ng mga hula sa Daniel. Nabautismuhan bilang Saksi ni Jehova noong 2002

Personal na mga Komento

Ano ang nakatulong sa iyo na manatiling positibo sa mahabang panahon na nasa detention center ka?

Nang ilagay ako sa pretrial detention center dahil sa pananampalataya sa Diyos, na-realize ko na ang mga ginagawa ko ang pinakamagandang paraan para purihin siya. Maraming buwan na naoobserbahan ng mga kasama ko sa detention center ang mga ginagawa at reaksiyon ko. Kaya napakaimportante na araw-araw, humingi ako ng banal na espiritu kay Jehova para magaya ko ang mga katangian niya.

Natutuhan ko rin na hindi naman pala ganoon kahirap dumaan sa paglilitis kumpara sa mga naiisip ko noon. Kailangan lang nating magtiwala sa Diyos, at pagkatapos siya na ang bahalang umalalay sa atin sa “napakadilim na lambak.” (Awit 23:4) Ang magagawa ko lang sa ngayon ay huwag bumitaw sa kaniya. Laging gumagawa si Jehova ng paraan para hindi ako mawalan ng pag-asa, kaya panatag pa rin ako at masaya.

Anatoliy Marunov

Ipinanganak: 1953 (Izmail, Ukraine)

Maikling Impormasyon: Nagtrabaho bilang graphic designer para sa diyaryo bago magretiro

Napangasawa si Alevtina noong 1975. May dalawa silang anak na lalaki

Nagpa-Bible study si Alevtina at nabautismuhan noong 1994. Nagtatrabaho noon si Anatoliy sa industriya ng diyaryo. Noong una, humanga siya sa kalidad ng mga nakaimprentang publikasyon ng mga Saksi ni Jehova. Nagkainteres sa hula ng Bibliya, at nabautismuhan noong 1999

Personal na mga Komento

Paano mo pinaghandaan ang pag-uusig?

Alam naming mag-asawa na puwedeng dumating ang araw na pag-uusigin kami. Kaya lagi naming isinasapuso ang mga sinasabi sa daily text, mga artikulo, pulong sa kongregasyon, at mga patalastas. Lagi kaming nakikinig sa mga tagubilin at nagsisikap na masunod ang mga iyon.

Ano ang nakatulong sa iyo para makapagtiis?

Malaki ang naitulong sa akin para huwag akong sumuko ng pagpapahalaga sa mga nagawa na ng Ama natin sa langit para sa akin at sa pamilya ko. Isa na rito ang kinabukasang ipinangako niya para sa lahat ng masunuring tao. Alam natin na malapit na ang wakas. Hindi ito ang panahon para sumuko, lalo na kapag naiisip ko ang lahat ng natatanggap kong suporta.

Sergey Tolokonnikov

Ipinanganak: 1972 (Moscow)

Maikling Impormasyon: Nagtrabaho sa security

Napangasawa si Mariya noong 2004. Nagpa-Bible study si Mariya noong 2003. Natuwa si Sergey nang masagot mula sa Bibliya ang mga tanong niya at sumama na rin sa study. Nabautismuhan sila noong 2005

Personal na mga Komento Mula sa Asawa ni Sergey na si Sister Mariya Pankova a

Paano kayo nakakapag-usap ng mister mo?

Nagsusulatan kami. May iba’t ibang teksto at ulat mula sa Bibliya ang mga sulat niya sa akin. Nagpapadala rin siya ng mga card at drawing na nagpapangiti sa akin. Nitong nakaraan lang, pinayagan akong dumalaw sa kaniya dalawang beses sa isang buwan sa loob ng 90 minuto. Halos tatlong oras ang biyahe papunta sa detention center, kaya inaabot na ako ng maghapon kapag bumibisita ako sa kaniya.

Ano ang natutuhan mo sa naranasan mong ito?

Kitang-kita namin ni Sergey na walang magagawa ang kahit sino—mga prosecutor man, judge, o imbestigador—kung hindi ipapahintulot ni Jehova na magawa nila iyon. Kontrolado niya ang lahat.

Nagpapasalamat tayo sa mga halimbawa ng pananampalataya nina Roman, Anatoliy, at Sergey. Nagtitiwala rin tayo na anumang mahirap na sitwasyon ang pagdaanan natin, ‘hindi tayo matatakot’ dahil alam nating kasama natin si Jehova.—Awit 23:4.

Time Line

Oktubre 20, 2021

Hinalughog ng mga awtoridad ang walong bahay ng mga Saksi ni Jehova sa Moscow. Sinampahan ng kasong kriminal sina Roman, Anatoliy, at Sergey. Inakusahan sila ng pag-oorganisa ng mga gawain ng isang ekstremistang organisasyon at panghihikayat sa iba na makibahagi sa mga gawaing ito. Inilagay silang tatlo sa temporary detention
Oktubre 22, 2021

Dinala sina Roman at Sergey sa pretrial detention. Inilagay naman si Anatoliy sa house arrest
Hunyo 17, 2022

Nagsimula ang paglilitis

a Noong inihahanda ang artikulong ito, si Brother Tolokonnikov ay nasa pretrial detention at hindi posibleng hingan ng komento. Pinanatili ni Sister Pankova ang apelyido niya noong dalaga pa siya pagkatapos mag-asawa.

Magugustuhan Mo Rin

NEWS RELEASE

Nakabilanggo Dahil sa Kanilang Pananampalataya—Russia

Ibinibilanggo ang mga Saksi ni Jehova sa Russia dahil sa kanilang pananampalataya. Alamin ang kuwento nila, at kumuha ng listahan ng mga Saksing nakabilanggo.

NEWS RELEASE