MARSO 29, 2023 | UPDATED: ABRIL 18, 2023
RUSSIA

UPDATE—IKINULONG ANG MGA KAPATID | Tinutulungan ni Jehova ang mga Kapatid Natin na Naka-detain

I-PLAY

Noong Abril 17, 2023, hinatulan ng Ahktubinskiy District Court of the Astrakhan Region sina Brother Rinat Kiramov, Sergey Korolev, at Sergey Kosyanenko at sinentensiyahan ng tigpipitong taon sa bilangguan. Nasa pretrial detention na sila mula pa noong Nobyembre 2021 at nananatili roon.

Profile

Rinat Kiramov

Ipinanganak: 1987 (Moscow, Moscow Region)

Maikling Impormasyon: Nag-aaral na maging web developer bago inaresto. Mahusay na musician. Naging mailman bilang alternative civilian service

Nalaman ang katotohanan mula sa nanay niya. Humanga sa pag-ibig at pagkakaisa ng mga Saksi ni Jehova. Nabautismuhan noong 2001

Napangasawa si Galina noong 2009

Personal na mga Komento Mula sa Asawa ni Rinat na si Galina a

Paano nakakapagtiis si Rinat sa detention center?

Ginawang goal ni Rinat na banggitin ang pangalan ng mga kapatid na nakabilanggo kapag nananalangin siya. Buwan-buwan, binibigyan ko siya ng listahan ng mga nakabilanggong kapatid sa buong mundo. Dahil naging mas mahaba at espesipiko ang mga panalangin niya, lalong tumibay ang kaugnayan niya kay Jehova at naiwasan niyang mag-focus sa mga problema niya. Ipinapaalala rin namin sa isa’t isa kung ano ang nagagawa ng pagtitiis namin: Nagbibigay kami ng magandang patotoo at sinusuportahan namin ang soberanya ni Jehova. Sinabi ni Rinat sa liham niya: “Gaano man kalakas ang kalaban natin, magtatagumpay tayo sa tulong ng Ama natin. Pero hindi laging nangangahulugan ng kalayaan ang tagumpay. Para sa atin, ang tagumpay ay ang pagiging tapat hanggang sa wakas.”

Paano mo nadama ang tulong ni Jehova?

May isinulat si Rinat sa isang liham niya na talagang totoo: “Dahil hindi kita maalagaan ngayon, si Jehova ang nag-aalaga sa iyo.” At talagang naranasan ko ang tulong ng banal na espiritu ni Jehova nang magsimula ang lahat ng ito. Maganda ang pangako sa Awit 91:1: “Ang sinumang naninirahan sa lihim na lugar ng Kataas-taasan ay nanganganlong sa lilim ng Makapangyarihan-sa-Lahat.” Nabasa ko na noon ang “lihim na lugar,” pero ngayon ko lang nakita higit kailanman ang proteksiyon ni Jehova. Nakatulong ito sa akin na magtiwala sa kaniya at manatiling masaya.

Sergey Korolev

Ipinanganak: 1973 (Penza, Penza Region)

Maikling Impormasyon: Mahilig sa photography at paggawa ng furniture

Nabago ang negatibong pananaw sa relihiyon nang makisama sa mga Saksi ni Jehova at malaman ang tungkol sa Maylalang. Nabautismuhan noong 1996

Napangasawa si Yekaterina noong 2005

Personal na mga Komento

Paano napatibay ang kaugnayan mo kay Jehova noong panahong iyon?

Noong nasa detention ako, hindi ko maiwasang magkaroon ng negatibong saloobin tungkol sa mga nangyayari. Nasubok talaga ang pagtitiis, pananampalataya, pag-asa, at pag-ibig ko. Malaki ang naitulong sa akin ng panalangin. Napakarami kong panahon para makipag-usap sa Diyos. Ngayon lang ako nakapanalangin nang ganito! Naiintindihan ko na kung paano magdamag na nanalangin si Jesus sa kaniyang Ama. Dahil sa sitwasyon ko, natuto akong lubusang magtiwala sa Diyos. At ito ang pinakamalaking pakinabang ko habang nakabilanggo.

Sergey Kosyanenko

Ipinanganak: 1961 (Yelan, Volgograd Region)

Maikling Impormasyon: Isang physical education teacher

Napangasawa si Olga noong 1983. Nagustuhan ang pagiging tama ng kasaysayan at mga hula sa Bibliya. Nabautismuhan noong 2002

Personal na mga Komento Mula sa Asawa ni Sergey na si Olga b

Ano ang nakatulong sa iyo na makayanan ang pagkasira ng loob?

Nagpakaabala ako sa mga bagay na makakatulong sa akin. Nagbabasa ako ng mga publikasyong salig sa Bibliya. Nananalangin din ako kay Jehova at humihingi ng lakas para makayanan ang kahit anong panghihina ng loob. Paulit-ulit kong binabasa ang mga sulat ni Sergey at ini-imagine kapag natapos na ito at magkikita na ulit kami. Nakakatulong din sa akin ang pakikinig at pagkanta ng mga awit na salig sa Bibliya.

May espesipikong teksto ba sa Bibliya na nakatulong sa iyo na magtiis?

Gustong-gusto ko ang sinasabi sa 1 Corinto 10:13, kung saan nangako ang Diyos na ‘hindi niya hahayaang tuksuhin tayo nang higit sa matitiis natin.’ Alam kong hindi ko makakayanan ang lahat ng ito nang ako lang, at na siguradong tutulungan ako ni Jehova na magtiis. Kung nangyayari man ito sa atin, ibig sabihin, kaya natin ito. Matatapos din ito.

Nakakapagpatibay malaman na patuloy na patutunayan ni Jehova na siya ang kanlungan ng tapat na mga lingkod niya, at na nakasuporta sa atin ang “walang-hanggang mga bisig niya.”—Deuteronomio 33:27.

Time Line

Nobyembre 9, 2021

Sinampahan ng kasong kriminal. Hinalughog ng mga pulis ang 15 bahay ng mga Saksi ni Jehova sa Akhtubinsk at Znamensk, pati na ang mga bahay nina Brother Kiramov, Korolev, at Kosyanenko
Nobyembre 10, 2021

Inaresto si Sergey Korolev
Nobyembre 11, 2021

Inaresto sina Rinat Kiramov at Sergey Kosyanenko. Dinala ang tatlong brother sa pretrial detention
Nobyembre 14, 2022

Nagsimula ang paglilitis

a b Hindi posibleng makuha ang personal na mga komento nina Brother Kiramov at Kosyanenko.

Magugustuhan Mo Rin

NEWS RELEASE

Nakabilanggo Dahil sa Kanilang Pananampalataya—Russia

Ibinibilanggo ang mga Saksi ni Jehova sa Russia dahil sa kanilang pananampalataya. Alamin ang kuwento nila, at kumuha ng listahan ng mga Saksing nakabilanggo.

NEWS RELEASE