OKTUBRE 1, 2021| UPDATED: AGOSTO 29, 2023
RUSSIA

UPDATE—NAHATULAN ANG MGA KAPATID | Limang Brother, Determinadong Magtiis ng Pag-uusig

I-PLAY

Noong Agosto 28, 2023, hinatulan ng Promyshlenniy District Court of Orenburg sina Brother Vladimir Kochnev, Vladislav Kolbanov, Pavel Lekontsev, Sergey Logunov, at Nikolay Zhugin. Pinatawan sila ng dalawang-taon-at-anim-na-buwan hanggang tatlong-taon-at-anim-na-buwang suspended prison sentence. Hindi sila makukulong sa ngayon.

Time Line

Marso 1, 2021

Mahigit isang taon pagkatapos ibalik ang kaso sa prosecutor’s office, nagsimula ang mga pagdinig sa Promyshlenniy District Court ng Orenburg
Enero 14, 2020

Ibinalik sa prosecutor’s office ang kasong kriminal dahil walang malinaw na akusasyon laban sa mga brother
Agosto 3, 2018

Pinalaya si Vladimir mula sa isang pretrial detention center pagkaraan ng 79 na araw at ipina-house arrest
Mayo 16, 2018

Hinalughog ng mga pulis ang bahay ng 19 na pamilya sa Orenburg Region. Sina Vladimir at Vladislav ay ipinadala sa isang temporary detention facility. Pagkaraan ng tatlong araw, pinalaya si Vladislav at ipina-house arrest
Mayo 14, 2018

Sinimulan ng Investigative Directorate ng Investigative Committee of the Russian Federation para sa Orenburg Region ang kasong kriminal laban sa limang brother

Profile

Vladimir Kochnev

Ipinanganak: 1979 (Orenburg)

Maikling Impormasyon: Mahilig mag-fishing at maglaro ng soccer noong bata. Nagtrabaho bilang isang panday at nagre-repair ng telebisyon at radyo. Nabautismuhan bilang isang Saksi ni Jehova noong 1993. Napangasawa si Galina noong 2003

Personal na mga Komento

Paano lalong tumibay ang kaugnayan mo kay Jehova sa panahong ito ng pag-uusig?

Masasabi ko na lalo akong napalapít sa Diyos nang makulong ako. Natutuhan kong mas lalong magtiwala kay Jehova kasi mag-isa lang ako at wala akong magawa para baguhin ang kalagayan ko.

Ano ang maipapayo mo sa iba tungkol sa paggamit ng panahon nila bilang paghahanda sa pag-uusig?

Hindi nagiging mas mabuti o masama ang isa dahil sa pag-uusig. Sa halip, ipinapakita nito kung anong uri siya ng tao. Kung meron tayong magandang espirituwal na rutin, hindi hihina ang pananampalataya natin. Hindi natin kailangang maghintay ng kakaibang pangyayari bago natin patibayin ang espirituwalidad natin. Halimbawa, hindi na natin kailangang hintayin pang may mangyari sa atin bago tayo magbasa ng Bibliya araw-araw o regular na manalangin.

Vladislav Kolbanov

Ipinanganak: 1992 (Orenburg)

Maikling Impormasyon: Noong anim na taóng gulang si Vladislav, nagpa-Bible study ang nanay niya. Nabautismuhan si Vladislav bilang isang Saksi ni Jehova noong 2008. Sa edad na 18, humiling ng alternatibong paglilingkod sa halip na magsundalo. Nag-alaga ng mga may-edad sa isang nursing home bilang paglilingkod sa bayan

Personal na mga Komento

Paano napatibay ng karanasang ito ang determinasyon mong paglingkuran si Jehova?

Madalas akong tanungin ng iba na kung bibigyan ako ng pagkakataon, iiwasan ko raw ba na makasuhan bilang kriminal. Nang pag-isipan ko iyan ngayon, na-realize ko na wala akong pinagsisisihan sa lahat ng nangyayari sa akin. . . . Nakita ko kung paano ako tinutulungan ni Jehova, at damang-dama ko ang suporta ng mga kapatid.

Naisip ko na kapag dumaranas ng mga pagsubok ang isa, doon niya nalilinang ang pagtitiis, napapatibay ang pananampalataya kay Jehova, at napapalalim ang pag-ibig sa Kaniya.

Pavel Lekontsev

Ipinanganak: 1981 (Kytat, Krasnoyarsk Territory)

Maikling Impormasyon: Gustong-gusto niya ang tungkol sa mga nilalang mula sa kaniyang pagkabata. Mahilig mag-hiking, mag-fishing, at maghanap ng iba’t ibang uri ng kabute. Nagtrabaho sa konstruksiyon. Nagpa-Bible study sa mga Saksi ni Jehova noong mga 1998. Nalaman na kailangang sundin ang mga pamantayan ng Bibliya para maging masaya. Nabautismuhan noong 1999. Napangasawa si Oksana noong 2017

Personal na mga Komento

Ano ang naging reaksiyon mo sa paghalughog, interogasyon, at pagsasampa ng kaso sa iyo?

Nang puwersahang pasukin [ng mga pulis] ang bahay namin, nagulat ako kung gaano kabilis sinagot ni Jehova ang panalangin ko. Iyon na siguro ang pinakamaikling panalangin sa buong buhay ko. Hiniling ko na maging kalmado ako, at sinagot agad ang panalangin ko! Hindi na ako naghintay nang ilang oras o ilang minuto kasi pagkaraan lang ng ilang segundo, naging kalmado ako at malinaw ang isip ko.

Ano ang determinado mong gawin anuman ang maging desisyon ng korte?

Imposibleng malaman ang magiging desisyon ng korte. Pero sigurado ako na patuloy akong palalakasin ni Jehova. Tagumpay pa rin tayo anuman ang maging desisyon ng korte. Gaano man kahirap ang pagsubok, naglalaan si Jehova ng banal na espiritu na kailangan natin. Sa paglilingkod ko kay Jehova, paulit-ulit kong napatunayan na totoo ito. Kaya determinado akong tapusin ang takbuhan para sa buhay.—2 Timoteo 4:7.

Sergey Logunov

Ipinanganak: 1962 (Orenburg)

Maikling Impormasyon: Tumanggap ng pantanging pagsasanay bilang isang machine operator. Pagkatapos maglingkod sa militar, naging propesyonal na photographer. Ang huling trabaho ay bilang isang hardinero. Pagkuha pa rin ng mga litrato ang hobby niya. Naggigitara din. Nagpa-Bible study sa mga Saksi ni Jehova noong mga unang taon ng 1990’s. Nabautismuhan noong 1992. Napangasawa si Larisa noong 1994

Personal na mga Komento

Ano ang maipapayo mo sa iba para makapaghanda sa pag-uusig?

Karaniwan nang kapag may mga problema, diyan nakikita ang katapatan natin. Para maging handa, kailangan na ngayon pa lang, patibayin na natin ang kaugnayan natin kay Jehova at kay Jesu-Kristo. Para itong espada. Para maging matibay at hindi maputol sa digmaan, pinapatigas ang bakal. Kung matibay ang espada ng isang sundalo, hindi siya kakabahan sa panahon ng labanan. Sinabi ni Jesus na ang taong “tapat sa pinakamaliit na bagay ay tapat din sa maraming bagay.” (Lucas 16:10) Kaya kung ngayon pa lang, sinasanay na ng isa ang sarili niya na maging masunurin sa Diyos sa lahat ng bagay, mas malamang na manatili siyang tapat sa Diyos kapag dumating na ang pag-uusig.

Nikolay Zhugin

Ipinanganak: 1976 (Kazakhstan)

Maikling Impormasyon: Mahilig sa sports noong kabataan. Nagtatrabaho bilang isang welder. Nagpa-Bible study sa mga Saksi ni Jehova noong mga 1995. Nabautismuhan noong 1996. Kahit hindi Saksi ni Jehova ang asawa niyang si Galina, masaya ang pamilya nila kasama ng kanilang anak na lalaki at babae

Personal na mga Komento

Ano ang hiniling mo kay Jehova sa panahong ito?

Hindi aalisin ni Jehova ang lahat ng problema natin o pag-uusig. Pinapahintulutan niyang mangyari ang mga ito sa kaniyang mga lingkod. Kaya patuloy akong humihingi kay Jehova ng banal na espiritu para matiis ko ang lahat ng pagsubok na ito. Damang-dama ko na tinutulungan ako ni Jehova. Masaya ako kahit sa panahon ng imbestigasyon at paglilitis. Siguradong hindi ko ito matitiis kung wala ang tulong niya!

Kahit mahigit tatlong taon na ang kaso nila, kitang-kita na determinado ang mahal nating mga kapatid na manatiling tapat kay Jehova. Maliwanag din na tapat si Jehova sa kanila.—2 Samuel 22:26.

Magugustuhan Mo Rin

NEWS RELEASE

Nakabilanggo Dahil sa Kanilang Pananampalataya—Russia

Ibinibilanggo ang mga Saksi ni Jehova sa Russia dahil sa kanilang pananampalataya. Alamin ang kuwento nila, at kumuha ng listahan ng mga Saksing nakabilanggo.

NEWS RELEASE