MARSO 27, 2024 | UPDATED: MAYO 13, 2024
RUSSIA

UPDATE—NAHATULAN ANG MGA KAPATID | Nagtitiwala, Handa, at Positibo

I-PLAY

Noong Mayo 13, 2024, hinatulan ng Leninskiy District Court of Barnaul in the Altai Territory sina Brother Yuriy Kolotinskiy, Mikhail Reshetnikov, at Anatoliy Sarychev. Pinatawan sila ng suspended prison sentence na dalawang taon at tatlong buwan. Hindi nila kailangang makulong sa ngayon.

Profile

Yuriy Kolotinskiy

Ipinanganak: 1955 (Moldova)

Maikling Impormasyon: Nagtrabaho bilang operator ng malalaking makina sa mga kompanya ng minahan

Napangasawa niya si Nataliya noong 1977

Napapaisip siya kung bakit napakaraming pagdurusa. Nakita niya ang malinaw na sagot ng Bibliya nang makipag-aral siya sa mga Saksi ni Jehova. Nabautismuhan sina Yuriy at Nataliya noong 1995

Personal na mga Komento

Anong ulat sa Bibliya ang nakatulong sa iyo na magtiwala sa tulong ni Jehova?

Madalas kong isipin ang mga Israelita pagkatapos nilang umalis ng Ehipto. Inakay sila at pinrotektahan ni Jehova nang buong panahong nasa ilang sila. Parang ganoon din ang ginagawa sa akin ni Jehova. Tuwing nagpupunta ako sa korte, iniisip kong nauuna na doon si Jehova. Dama ko ang suporta niya kaya kumbinsido akong mahal niya ako at bibigyan niya ako ng lakas para magtiis at manatiling tapat sa kaniya anuman ang mangyari. Mas matibay ang pananampalataya ko ngayon at alam kong ginagawa ko ang tama. Handa kong gawin ang lahat para ipagtanggol ang pangalan ni Jehova.

Mikhail Reshetnikov

Ipinanganak: 1949 (Maksiner, Kirov Region)

Maikling Impormasyon: Nagtrabaho bilang driver ng bus at trak sa loob ng mahigit 50 taon

May isa siyang anak na lalaki at isang anak na babae sa una niyang asawa, na namatay dahil sa kanser. Napangasawa niya si Antonina noong 2021

Marami siyang tanong tungkol sa Bibliya pero wala siyang nakuhang sagot sa relihiyon niya. Masaya siyang malaman ang katotohanan nang makipag-aral siya ng Bibliya sa mga Saksi ni Jehova. Nabautismuhan siya noong 2000

Personal na mga Komento

Paano nakatulong sa iyo ang paghahanda para sa pag-uusig?

Nang magsimula na ang pag-aresto at pagbilanggo sa mga kapatid, nanalangin ako kay Jehova na bigyan ako ng karunungan at pagpipigil sa sarili para maging handa ako. Maraming beses niya akong tinulungan at pinatunayan nito na lagi siyang sumasagot sa panalangin sa tamang panahon. Sigurado ako na nasa tabi ko siya. Kaya hindi ako natatakot anuman ang maging desisyon ng korte sa kaso ko. Alam kong sa tulong ni Jehova, makakapanatili akong tapat.

Anatoliy Sarychev

Ipinanganak: 1949 (Karpovo, Altai Territory)

Maikling Impormasyon: Nagtrabaho bilang isang graphic designer bago magretiro

Napangasawa niya si Nadezhda noong 1990. Mayroon silang isang anak na lalaki

Nakausap siya ng mga Saksi ni Jehova habang nagpapagaling sa isang operasyon. Masaya siyang malaman ang pangako ni Jehova na wawakasan niya ang karahasan at pagdurusa. Nabautismuhan si Nadezhda noong 2001 at si Anatoliy naman noong 2002

Personal na mga Komento

Ano ang nakatulong sa iyo na manatiling positibo?

Iniisip ko ang nakasulat sa 1 Pedro 3:14: “Pero kung magdusa man kayo alang-alang sa katuwiran, maligaya kayo.” Inusig ng mga Pariseo ang mga apostol dahil ayaw nilang huminto sa pangangaral. Tiniis ng mga apostol ang kahihiyan alang-alang sa pangalan ni Jesus, at para sa kanila, dahilan ito para magsaya. Gusto kong tularan ang halimbawa nila. Wala akong nakikitang dahilan para masiraan ng loob dahil inuusig ako. Ang totoo, masaya ako dahil alam kong sinusunod ko ang halimbawa ng mga Kristiyano noon at ni Jesu-Kristo mismo.

Nagpapasalamat tayo sa mga kapatid na ito, dahil mga halimbawa sila ng pananampalataya at pagtitiwala kay Jehova. Kumbinsido tayo na patuloy silang tutulungan ni Jehova dahil mahal niya sila at hindi niya kalilimutan ang katapatan nila.—Awit 25:10.

Time Line

Mayo 25, 2021

Sinampahan ng kasong kriminal si Mikhail
Mayo 27, 2021

Hinalughog ang bahay ni Mikhail. Pinagtatanong sila ni Antonina. Pinagbawalang umalis ng kanilang lugar si Mikhail
Oktubre 6, 2022

Sinampahan ng kasong kriminal sina Anatoliy at Yuriy at isinama sa kaso ni Mikhail
Oktubre 7, 2022

Pinagbawalang umalis ng kanilang lugar sina Anatoliy at Yuriy
Enero 19, 2023

Nagsimula ang paglilitis

Tingnan Din

NEWS RELEASE

Nakabilanggo Dahil sa Kanilang Pananampalataya—Russia

Ibinibilanggo ang mga Saksi ni Jehova sa Russia dahil sa kanilang pananampalataya. Alamin ang kuwento nila, at kumuha ng listahan ng mga Saksing nakabilanggo.

NEWS RELEASE