NOBYEMBRE 1, 2021 | UPDATED: PEBRERO 7, 2024
RUSSIA

UPDATE—NAKULONG ANG KAPATID | Brother Dmitriy Barmakin—Nananatiling Masaya sa Kabila ng Matagal na Pagkakakulong

I-PLAY

Noong Pebrero 6, 2024, pinagtibay ng Primorye Territory Court sa Vladivostok ang naunang hatol kay Brother Dmitriy Barmakin at ipinatupad ang walong-taóng pagkabilanggo na sentensiya sa kaniya. Agad siyang kinuha sa korte at ikinulong.

Noong Agosto 8, 2023, pinaboran ng Primorye Territory Court ang apela ni Brother Dmitriy Barmakin at binaligtad ang naunang hatol sa kaniya. Agad siyang inilabas sa bilangguan. Pero ibinalik sa prosecutor ang kaso niya, at haharap siya sa paglilitis sa ikatlong pagkakataon.

Noong Abril 27, 2023, hinatulan ng Pervorechenskiy District Court of Vladivostok in the Primorye Territory si Dmitriy at sinentensiyahang mabilanggo nang walong taon. Agad siyang ibinilanggo pagkagaling sa korte.

Noong Abril 8, 2022, binaligtad ng Primorye Territory Court ang hatol kay Dmitriy na inosente siya. Muli siyang lilitisin.

Time Line

Noong Nobyembre 22, 2021, pinawalang-sala ng Pervorechenskiy District Court of Vladivostok sa Primorye Territory si Dmitriy. Ito ang kauna-unahang pagkakataon na pinawalang-sala ng isang korte sa Russia ang isa sa mga Saksi ni Jehova na inaakusahan sa ilalim ng Article 282.2(1) ng Criminal Code ng Russia (tungkol sa pag-oorganisa ng mga gawain ng isang ekstremistang organisasyon). Aalisin ng korte ang lahat ng pagbabawal sa kaniyang mga gawain. Magkakabisa ang hatol sa Disyembre 3, 2021, kung hindi aapela ang prosecutor’s office
Abril 20, 2021

Ipinagpatuloy ang kasong kriminal
Disyembre 18, 2020

Ibinalik ang kasong kriminal sa prosecutor dahil sa kakulangan ng ebidensiya. Hindi nagbago ang pagbabawal sa kaniyang mga gawain
Oktubre 18, 2019

Pagkaraan ng 447 araw, pinalaya si Dmitriy pero hinihigpitan ang mga gawain niya. Pinalawig ng korte ang pretrial detention ni Dmitriy nang 10 beses
Hulyo 28, 2018

Noong 7:00 a.m. ng Hulyo 28, 2018, isang grupo ng armado at nakamaskarang mga lalaki ang pumasok sa apartment nina Dmitriy at Yelena kung saan inaalagaan ni Yelena ang kaniyang 90-taóng-gulang na lola. Sina Dmitriy at Yelena ay dinala pabalik sa lunsod nila, sa Vladivostok, na 177 kilometro ang layo. Inaresto si Dmitriy at agad na inilagay sa pretrial detention
Hulyo 27, 2018

Nagsimula ang kriminal na kaso laban kay Brother Dmitriy Barmakin
Oktubre 2017

Isang 30-taóng-gulang na babae na nagtatrabaho para sa Federal Security Service (FSB) ang nagkunwaring interesado sa Bibliya. Palihim niyang kinunan ng video ang pakikipag-usap niya sa mga kapatid

Profile

Dmitriy Barmakin

Ipinanganak: 1974 (Alushta, Crimea)

Maikling Impormasyon: Namatay ang nanay niya noong sampung taóng gulang siya. Nag-aral siyang maging chef, at nang maglaon, bilang isang computer programmer. Napangasawa niya si Yelena noong 2006. Mahilig silang magbiyahe at kumuha ng litrato ng mga hayop sa gubat

Bumili siya ng una niyang Bibliya noong nasa grade eight siya. Gustong-gusto niya ang praktikal na mga payo na nasa Bibliya. Nang maglaon, nagpa-Bible study siya sa mga Saksi ni Jehova. Nabautismuhan siya noong 1994

Personal na mga Komento

Paano ka nanatiling malapít kay Jehova habang nasa bilangguan ka?

Ugali ko nang magbasa ng Bibliya araw-araw bago pa ako makulong. Dahil wala namang ginagawa sa kulungan, marami kang panahon para mag-isip. Marami kang maaalala at mabubulay-bulay. Lagi kang mag-iisip. At kung hindi mo pinuno ang isip mo ng mga katotohanan mula sa Bibliya bago ka makulong, mahihirapan kang manatiling tapat.

Anong katangian ang nakatulong sa iyo na magtiis sa bilangguan?

Tinulungan ako ni Jehova na maging masaya. Madalas kong ipanalangin ‘yon kay Jehova, at nakikita ‘yon ng mga kasama ko. Noong mag-roll call isang umaga, tinanong ako ng isa sa mga guwardiya: “Barmakin, bakit lagi kang nakangiti?” Ang sabi ko: “Masaya ako, kaya nakangiti ako.” Tinanong ako ng guwardiya, “Masaya ka dahil nakulong ka?” Sagot ko: “Hindi po! Masayahin po talaga ako, at hindi po iyan maaalis ng bilangguan.” Ang nakakatuwa, hindi ko napapansin na nakangiti pala ako. Parang naging natural na lang ‘yon sa ‘kin.

Ano ang determinado mong gawin, anuman ang maging desisyon ng korte sa iyong kaso?

Alam kong ipinahihintulot ng Diyos ang sitwasyong ito para maluwalhati ang pangalan niya. Kahit na sinisikap ng mga kaaway na takutin ang mga lingkod ni Jehova para ihinto ang kanilang gawaing pangangaral, nakikita ko na nare-realize ng mga hukom, bailiff, at mga prosecutor na mabubuting tao ang mga Saksi ni Jehova. Kaya determinado akong luwalhatiin si Jehova.

Kahit na pinaghiwalay ng bilangguan sina Dmitriy at Yelena, huwaran sila sa pagpapakita ng kagalakan, dahil “ang kagalakang nagmumula kay Jehova ang [kanilang] moog.”—Nehemias 8:10.

Magugustuhan Mo Rin

NEWS RELEASE

Nakabilanggo Dahil sa Kanilang Pananampalataya—Russia

Ibinibilanggo ang mga Saksi ni Jehova sa Russia dahil sa kanilang pananampalataya. Alamin ang kuwento nila, at kumuha ng listahan ng mga Saksing nakabilanggo.

NEWS RELEASE