MAYO 6, 2024 | UPDATED: HULYO 11, 2024
RUSSIA

UPDATE—NASENTENSIYAHANG MABILANGGO | “Kontrolado ni Jehova ang Lahat ng Bagay”

I-PLAY

Noong Hulyo 10, 2024, hinatulan ng Khorolskiy District Court of the Primorye Territory sina Brother Boris Andreyev, Brother Anatoliy Li, at Sister Nataliya Sharapova. Sinentensiyahan si Boris ng anim-na-taóng pagkabilanggo. Anim na taon at anim na buwan naman ang sentensiya kay Anatoliy, at tatlong taon ang sentensiya kay Nataliya. Silang tatlo ay nasa pretrial detention at mananatiling nakabilanggo.

Profile

Boris Andreyev

Ipinanganak: 1951 (Monastyrishche, Primorye Territory)

Maikling Impormasyon: Nagtrabaho bilang dispatch agent; nakikipag-ugnayan siya sa mga team na rumeresponde sa emergency

Dahil nasagot ng mga Saksi ang mga tanong niya gamit ang Bibliya, nakumbinsi siya na nahanap na niya ang katotohanan. Nabautismuhan siya bilang Saksi ni Jehova noong 2004

Napangasawa niya si Aleksandra noong 2020

Personal na mga Komento Mula sa Asawa ni Boris na si Aleksandra a

Paano ka tinulungan ng asawa mo na matiis ang mahirap na sitwasyong ito?

Pagkatapos maaresto si Boris, may isang araw na hirap na hirap ako. Lungkot na lungkot ako at umiiyak. Sinabi ko sa sulat ko kay Boris ang nangyari at kung ano ang nararamdaman ko. Sumagot siya sa sulat. Pinagaan niya ang loob ko at sinabing nauunawaan niya ako. Pero ang pinakanakatulong sa akin, ’yong ipinaalala niya ang lahat ng problemang napagtagumpayan namin dahil sa tulong ni Jehova. Iyon ang kailangan ko. Napatibay no’n ang tiwala ko na hinding-hindi kami iiwan ni Jehova.

Anatoliy Li

Ipinanganak: 1985 (Uzbekistan)

Maikling Impormasyon: Sumubok ng iba’t ibang relihiyon pero hindi nasagot ang mga tanong niya. Nakipag-aral siya sa mga Saksi ni Jehova, at masaya siyang matutuhan ang mga katotohanan sa Bibliya. Nabautismuhan siya noong 2010

Napangasawa niya si Raisa noong 2011

Personal na mga Komento Mula sa Asawa ni Anatoliy na si Raisa b

Paano kayo tinulungan ni Jehova?

Nang makulong si Anatoliy habang naghihintay ng paglilitis, sinabi niyang nag-aalala siya sa kalagayan ko. Bago siya maaresto, araw-araw kaming nag-aaral ng Bibliya at nananalanging magkasama. Pero hindi na siya nag-alala nang malaman niya kung paano ibinigay ni Jehova ang lahat ng kailangan ko sa tulong ng mga kapatid. Pareho naming nakita na talagang mahal na mahal kami ni Jehova at hinding-hindi niya kami iiwan.

Nataliya Sharapova

Ipinanganak: 1972 (Kazakhstan)

Maikling Impormasyon: Nakilala ang mga Saksi noong 1995 at nagpa-Bible study. Nakumbinsi siya na Salita ng Diyos ang Bibliya. Nabautismuhan siya noong 2012

Personal na mga Komento Mula sa Nanay ni Nataliya na si Nina c

Ano ang nakatulong kay Nataliya na huwag masiraan ng loob habang nakakulong bago ang paglilitis?

Maraming hirap ang pinagdaanan ng anak ko sa kulungan. Napakalamig doon. Madalas ding sumakit ang ulo niya. Nasisiraan siya ng loob kung minsan, pero kumbinsido siya na kontrolado ni Jehova ang lahat ng bagay. Sinabi niya: “Alam kong makakalaya ako. Tinutulungan ako ni Jehova na makapagtiis, at handa akong maghintay.” Lalo pang napalapít sa Diyos si Nataliya dahil sa mga naranasan niya. Para bang yakap siya ni Jehova.

Nagtitiwala tayo na gaya nina Anatoliy, Boris, at Nataliya, sasagutin ni Jehova ang mga panalangin natin kapag napapaharap tayo sa mga problema at bibigyan tayo ng lakas para makapagtiis.—Awit 20:1.

Time Line

Hulyo 28, 2022

Sinampahan ng kasong kriminal
Oktubre 6, 2022

Hinalughog ang 12 bahay sa nayon ng Yaroslavsky. Ikinulong sina Boris at Nataliya sa temporary detention center
Oktubre 7, 2022

Inilipat sa pretrial detention center sina Boris at Nataliya
Oktubre 12, 2022

Ikinulong si Anatoliy sa temporary detention center
Oktubre 13, 2022

Inilipat si Anatoliy sa pretrial detention center
Oktubre 5, 2023

Nagsimula ang paglilitis

a b c Habang inihahanda ang artikulong ito, nasa pretrial detention center sina Brother Andreyev, Brother Li, at Sister Sharapova kaya hindi puwedeng makuha ang personal na mga komento nila.

Tingnan Din

NEWS RELEASE

Nakabilanggo Dahil sa Kanilang Pananampalataya—Russia

Ibinibilanggo ang mga Saksi ni Jehova sa Russia dahil sa kanilang pananampalataya. Alamin ang kuwento nila, at kumuha ng listahan ng mga Saksing nakabilanggo.

NEWS RELEASE