DISYEMBRE 16, 2021
RUSSIA

UPDATE | Nakatulong ang Araw-araw na Pagbabasa ng Bibliya sa Limang Brother at Isang Sister Para Matiis ang Pag-uusig

I-PLAY

Noong Agosto 22, 2022, hinatulan ng Leninskiy District Court ng Saransk sina Brother Denis Antonov, Vladimir Atryakhin, Aleksandr Korolev, Georgiy Nikulin, Sister Yelena Nikulina, at Brother Aleksandr Shevchuk. Sina Denis, Aleksandr Korolev, at Aleksandr Shevchuk ay nahatulang mabilanggo nang dalawang taon. Sina Georgiy at Yelena ay apat na taon at dalawang buwan, at si Vladimir ay nahatulang mabilanggo nang anim na taon. Ipatutupad agad ang lahat ng sentensiya.

Time Line

Hunyo 11, 2021

Nagsimula ang unang sesyon ng korte sa Leninskiy District Court ng Saransk
Abril 2, 2021

Inakusahan si Yelena ng pagre-recruit at pakikibahagi sa mga gawain ng isang ekstremistang organisasyon
Marso 31, 2021

Inakusahan si Vladimir ng pag-oorganisa ng mga gawain ng isang ekstremistang organisasyon
Hulyo 2, 2019

Pinalaya sina Aleksandr Shevchuk at Georgiy mula sa pretrial detention at pinagbawalang umalis sa kanilang lugar
Marso 28, 2019

Pinalaya si Vladimir mula sa pretrial detention at pinagbawalang umalis sa kanilang lugar
Pebrero 8, 2019

Ikinulong sina Aleksandr Shevchuk, Vladimir, at Georgiy sa pretrial detention center
Pebrero 4, 2019

Sinampahan ng FSB ng kasong kriminal ang limang brother at si Yelena dahil sa pag-oorganisa ng mga gawain ng isang ekstremistang organisasyon

Profile

Denis Antonov

Ipinanganak: 1976 (Syktyvkar, Komi Republic)

Maikling Impormasyon: Noong kabataan niya, madalas lumipat ang pamilya nila dahil sa trabaho ng tatay niya. Nag-aral sa isang technical school at naging mining equipment electrician at mekaniko

Nagtrabaho sa isang minahan bilang electrical technician sa loob ng limang taon. Mahilig kumuha ng litrato at maglaro ng chess

Marami siyang tanong tungkol sa Diyos at sinikap niyang maunawaan ang itinuturo ng Bibliya at ng mga aklat tungkol sa relihiyon, pero bigo siya. Habang naglilingkod sa hukbo, nakipagsulatan sa isang kaibigan na nagba-Bible study pala sa mga Saksi ni Jehova. Naantig si Denis nang malaman niya ang tumpak na turo ng Bibliya at ang pangalan ng Diyos, si Jehova. Nabautismuhan bilang Saksi ni Jehova noong 1998. Napangasawa si Olga noong 2015

Personal na mga Komento

May teksto ba sa Bibliya na nagpalakas ng loob mo at nakatulong sa iyo na magtiis?

Isa sa mga paborito kong teksto ang Genesis 15:1 . . . Napakahalaga nito sa akin kasi lagi ko itong naaalala noong gabing makita ako ng mga opisyal ng FSB sa aming apartment at dalhin ako para sa interogasyon. . . . Napakalma ako nito at nakatulong ito sa akin na manatiling tapat.

Vladimir Atryakhin

Ipinanganak: 1987 (Rozhdestveno, Republic of Mordovia)

Maikling Impormasyon: Pinalaki sa isang pamilya ng nagsosolong-magulang. May nakababatang kapatid na lalaki. Mahilig maglaro ng soccer, volleyball, at hockey. Isang computer programmer. Nagtatrabaho bilang isang systems administrator

Naging interesado sa Bibliya habang nag-aaral. Nabautismuhan bilang isang Saksi ni Jehova noong 2004. Napangasawa si Mariya noong 2009. Noong maaresto, may dalawa silang maliliit na anak, ang isa ay siyam na buwang gulang at ang isa ay dalawang taóng gulang

Personal na mga Komento

Paano napatibay ng pag-uusig ang kaugnayan mo kay Jehova?

Nang malayó ako sa aking pamilya, lumong-lumo ako at di-mapalagay. Nang dalhin ako sa detention center, isa sa mga guwardiya ang may ginagawang ilang dokumento. Habang nagtatrabaho siya, tinanong niya ako kung bakit ako idinitine ng mga pulis. Nasabi ko siguro na nag-aalala ako [sa pamilya ko]. Bigla niyang sinabi: “Hindi pababayaan ng mga kasamahan mo ang pamilya mo.” . . . Sigurado siya na pangangalagaan ng mga kapuwa ko Saksi ang pamilya ko . . . Para bang ginamit ni Jehova ang guwardiyang iyon para ipaalala sa akin na maaasahan ko si Jehova. Nang makalaya ako at makausap ko ang aking asawa, tuwang-tuwa ako na maibiging pinangalagaan ni Jehova ang pamilya ko sa pamamagitan ng ating mga kapananampalataya.

Aleksandr Korolev

Ipinanganak: 1978 (Zemetchino, Penza Region)

Maikling Impormasyon: Lumaking hindi kasama ang tatay niya. Mahilig mag-fishing at maglaro ng soccer noong kabataan. Pagkatapos ng high school, nagtrabaho bilang drayber ng trak at makinista. Nagtrabaho rin bilang pastol at livestock breeder sa isang farm. Nagtatrabaho ngayon bilang isang karpintero at woodworker

Nang magpa-Bible study sa mga Saksi ni Jehova, nasagot ang mga tanong na pinag-iisipan niya sa loob ng maraming taon. Nabautismuhan noong 1998. Noong 2006, napangasawa niya si Natalya, na may anak na lalaki na magkasama nilang pinapalaki

Personal na mga Komento

Paano patuloy na nakatulong sa iyo ang pagdalo mo sa mga pulong linggo-linggo?

Malaki ang naitulong sa akin ng pagbasa ng Bibliya sa pulong sa gitnang sanlinggo. Napapatibay ako kapag pinag-aaralan ko ang lakas ng loob at pananampalataya na ipinakita ng mga lingkod ni Jehova noon. Nakatulong sa akin ang pagsunod sa mga mungkahi na tinatanggap natin sa mga pulong para gumawi nang may kabaitan. Patuloy akong nananalangin para patnubayan ako kung paano gagawi nang tama at iwasang . . . magdala ng kasiraan sa pangalan ni Jehova.

Georgiy Nikulin

Ipinanganak: 1963 (Rovenky, Ukraine)

Maikling Impormasyon: Nag-aral mag-drive at magmekaniko ng kotse. May kasanayan din sa graphic design, satellite radio repair, equipment maintenance, at pag-ukit ng kahoy

Mahilig mag-aral ng bagong mga bagay. Gustong-gustong malaman kung saan nagmula ang tao. Nang magpa-Bible study sa mga Saksi ni Jehova, nasagot ang mga tanong niya

Personal na mga Komento

Ano ang nakatulong sa iyo na mapanatili ang iyong pananampalataya at lakas ng loob habang nasa detention center ka?

Nakatulong sa akin ang pagsasaliksik sa Kasulatan at pagbubulay-bulay ng mga teksto sa Bibliya. Marami kasing halimbawa [sa Bibliya] tungkol sa mga lingkod ni Jehova na nagpakita ng pananampalataya at lakas ng loob. Talagang gustong-gusto ko silang tularan.

Alam natin mula sa kasaysayan na ginagamit ni Satanas ang kasinungalingan para pahinain ang ating pananampalataya nang hindi tayo makapagtiis. Alam din natin na hindi dapat bigyang-pansin ang lahat ng mga kasinungalingan at paninirang-puri niya, at hindi tayo dapat magpaapekto sa mga ito.

Yelena Nikulina

Ipinanganak: 1968 (Monastyrskoe, Republic of Mordovia)

Maikling Impormasyon: Mahilig manahi at mag-ski noong kabataan. Tumanggap ng pagsasanay para maging isang sastre at nang maglaon bilang tagatabas. Lumipat sa Saransk at Tolyatti sa paghahanap ng trabaho. Nagtrabaho siya bilang mananahi. Kasalukuyang nagtatrabaho bilang tagalinis

Napangasawa si Georgiy noong 2016. Nag-aral sila ng Bibliya. Nalaman nila na hindi winawalang-bahala ng Diyos ang pagdurusang nararanasan ng mga tao kundi maibigin Siya at mapagmalasakit. Nabautismuhan bilang isang Saksi ni Jehova noong 2017

Personal na mga Komento

Paano ka nakinabang sa tulong na ibinibigay ng mga kapatid?

Isang taon pagkatapos ng paghalughog [ng mga pulis], nagkasunog at nawalan kami ng tirahan. . . . Tinulungan kami ng mga kapatid at dahil doon humanga ang mga kamag-anak ko. Sinusunod na nila ngayon ang payo ng Bibliya sa kanilang buhay at [nagiging mas malapít kay Jehova].

Aleksandr Shevchuk

Ipinanganak: 1989 (Pyatigorsk, Stavropol Territory)

Maikling Impormasyon: Sinanay sa landscape design at construction. Nang maglaon, lumipat sa Saransk. Namasukan sa pagawaan ng mga muwebles. Mahilig sa basketball at ping pong

Ang kaniyang lolo at lola sa tuhod ay ipinatapon sa Siberia dahil mga Saksi ni Jehova sila. Ang mga magulang niya ay parehong ipinanganak sa Siberia

Nabautismuhan noong 2006. Nagsagawa siya ng alternatibong serbisyong pansibilyan kapalit ng pagsusundalo

Personal na mga Komento

Anong mga gawain ang nakatulong sa iyo na magtiis noong apat na buwan kang nasa detention center?

Mula noong bata ako, sama-samang binabasa ng pamilya namin ang pang-araw-araw na teksto bago mag-almusal. Naging ugali ko na ’yon na pinanatili ko kahit nasa bilangguan ako. Noong wala pa akong Bibliya, nag-iisip ako ng teksto o halimbawa ng ilang lingkod ni Jehova at binubulay-bulay ko ’yon. Ang unang teksto na naalala ko ay ang Isaias 40:26-31. Isa ’yon sa paborito kong teksto. Ipinapaalala n’on sa akin na si Jehova ang Maylalang, at napakalakas ng kapangyarihan niya. Ginagamit niya ang kapangyarihang iyon para palakasin tayo sa harap ng mahihirap na kalagayan, kahit na tao lang tayo.

Alam natin na patuloy na magpapakita si Jehova ng tapat na pag-ibig sa ating mahal na mga kapatid na pinag-uusig sa Russia habang patuloy silang nagtitiwala sa Kaniya.—Genesis 32:10.

Magugustuhan Mo Rin

NEWS RELEASE

Nakabilanggo Dahil sa Kanilang Pananampalataya—Russia

Ibinibilanggo ang mga Saksi ni Jehova sa Russia dahil sa kanilang pananampalataya. Alamin ang kuwento nila, at kumuha ng listahan ng mga Saksing nakabilanggo.

NEWS RELEASE