MAYO 30, 2023 | UPDATED: Marso 6, 2024
RUSSIA

UPDATE—PINAGMULTA ANG MGA KAPATID | Damang-dama ng mga Brother sa Teykovo ang Suporta ni Jehova

I-PLAY

Noong Pebrero 29, 2024, hinatulang may-sala ng Teykovskiy District Court of the Ivanovo Region sina Brother Sergey Galyamin, Anatoliy Lyamo, Vladimir Spivak, at Aleksandr Vasichkin. Pinatawan ng multa ang bawat isa sa kanila. Pinagmumulta si Vladimir ng 600,000 rubles ($6,564 U.S.), 650,000 rubles ($7,111 U.S.) naman ang pataw kay Sergey, at tig-1,100,000 rubles ($12,034 U.S) kina Aleksandr at Anatoliy.

Profile

Sergey Galyamin

Ipinanganak: 1967 (Teykovo, Ivanovo Region)

Maikling Impormasyon: May-ari at nagpapatakbo ng isang shoe-repair business

Napangasawa si Lyudmila noong 1991. Mayroon silang tatlong anak na babae

Nagulat nang malamang may pangalan pala ang Diyos. Dumalo sa pulong ng mga Saksi ni Jehova, at nakumbinsi na nakita na niya ang katotohanan dahil sa kabaitang ipinakita ng mga Saksi. Nabautismuhan si Sergey noong 2001 at si Lyudmila noong 2002

Personal na mga Komento

Anong mahalagang aral ang natututuhan mo dahil sa mahirap na sitwasyong ito?

Nang una kong malaman kung paano tinatrato ang mga kapatid, talagang nagalit ako. At nag-alala ako kung ano na kaya ang mangyayari sa akin. Pero naalala ko ang sinasabi sa Awit 73:26: “Maaaring manghina ang katawan at puso ko, pero ang Diyos ang bato ng puso ko.” Kailangan ko iyon. Na-realize ko na walang maitutulong sa akin ang pag-aalala at pag-iisip kung ano ang puwedeng mangyari. Ang pinakamagandang magagawa ko ay ang patuloy na patibayin ang kaugnayan ko kay Jehova at magtiwala sa kaniya.

Anatoliy Lyamo

Ipinanganak: 1963 (Pogar, Bryansk Region)

Maikling Impormasyon: Nagtrabaho sa subway construction

Napangasawa si Galina noong 1993. May dalawa silang anak at dalawang apo

Hinahanap ang katotohanan at humanga sa lohika ng Bibliya. Nabautismuhan si Anatoliy noong 1995 at si Galina naman noong 1997

Personal na mga Komento

Paano ka sinuportahan ng mga kapuwa mo Saksi?

Lalo kong naa-appreciate ang mga kapatid ngayon. Hindi ko mailarawan kung paano sila ginamit ni Jehova para tulungan ako. Noong iniimbestigahan ako, napaharap ako sa maraming problema. Pero ginamit ni Jehova ang mga kapatid para tulungan ang pamilya ko. Malalakas ang loob nila, kasi pumupunta rin sila sa korte para suportahan ako. At araw-araw, tumatanggap ako ng mga mensahe na nagsasabing ipinapanalangin nila ako at ang pamilya ko. Dahil dito, napapakilos ako na tulungan ang iba na nakakaranas din ng mga pagsubok.

Vladimir Spivak

Ipinanganak: 1955 (Litin, Ukraine)

Maikling Impormasyon: Naglingkod sa militar bago naging Saksi ni Jehova

Napangasawa si Nellie noong 1979. Naunang nagpa-Bible study si Nellie. Magkasama silang dumalo sa isang kombensiyon ng mga Saksi ni Jehova noong 1992. Humanga si Vladimir sa nakita at narinig niya. Nabautismuhan si Nellie noong 1994, at si Vladimir noong 1997

Personal na mga Komento

Paano mo nakayanan ang pagkasira ng loob?

Gustong-gusto kong dumalo sa mga asamblea at kombensiyon. Kapag hindi ako nakadalo sa mga ito, pati na ang iba pang bagay na hindi ko puwedeng gawin, nasisiraan ako ng loob. Pero alam kong hindi ako nag-iisa. Lagi nandiyan si Jehova at ang mga kapatid para tulungan ako. Sigurado ako na susuportahan ako ni Jehova, poprotektahan, at tutulungan akong matiis ang mga pagsubok.

Aleksandr Vasichkin

Ipinanganak: 1969 (Bryansk, Bryansk Region)

Maikling Impormasyon: Naglingkod sa army bago naging Saksi ni Jehova. Nagtrabaho kamakailan bilang groundskeeper

Napangasawa si Nataliya noong 1993. May dalawa silang anak

Humanga sa kabaitang ipinakita sa kaniya nang dumalo siya sa mga pulong ng mga Saksi ni Jehova. Nagpa-Bible study silang mag-asawa. Nabautismuhan si Nataliya noong 1994 at si Aleksandr naman noong 1995

Personal na mga Komento

Ano ang nakatulong sa iyo na hindi masyadong mag-alala sa mga pagsubok na tinitiis mo?

Napansin ko na kapag naaawa ako sa sarili ko, nasisiraan ako ng loob. Kaya imbes na isipin kung bakit ito nangyayari sa akin, iniisip ko na isang pribilehiyong mangaral tungkol kay Jehova. Ipinaaalaala ko rin sa sarili ko na pansamantala lang ang nangyayari sa buhay ko, na parang isang pahina lang ito sa aklat ng buhay ko. Matatapos din ang mga problemang ito. Kung mananatili akong tapat, magkakaroon ako ng malapít na kaugnayan kay Jehova at sa mga kapatid magpakailanman.

Alam natin na anumang pagsubok ang dumating sa sistemang ito, pansamantala lang ang mga ito kumpara sa walang hanggang mga pagpapala na ibibigay ni Jehova sa tapat na mga lingkod niya.—2 Corinto 4:17, 18.

Time Line

Abril 10, 2020

Sinampahan ng kasong kriminal
Abril 11, 2020

Hinalughog ang mga bahay
Abril 16, 2020

Pinagbawalang magbiyahe
Pebrero 2, 2023

Nagsimula ang paglilitis

Magugustuhan Mo Rin

NEWS RELEASE

Nakabilanggo Dahil sa Kanilang Pananampalataya—Russia

Ibinibilanggo ang mga Saksi ni Jehova sa Russia dahil sa kanilang pananampalataya. Alamin ang kuwento nila, at kumuha ng listahan ng mga Saksing nakabilanggo.

NEWS RELEASE