Roman Baranovskiy

• Ipinanganak: 1974 (Balakovo, Saratov Region)

• Maikling Impormasyon: Nagre-renovate ng mga bahay para masuportahan ang sarili at ang kaniyang nanay. Mahilig maggitara at maglaro ng chess at soccer

  Noong kabataan pa siya, iniisip niya kung ano ang layunin ng buhay. Sabi niya, “Kung minsan, hinihiling ko sa Diyos na ituro sa akin ang tamang daan.” Noong 1993, nagpa-Bible study siya sa mga Saksi ni Jehova. Nabautismuhan noong 1997

Valentina Baranovskaya

• Ipinanganak: 1951 (Vannovka, Kazakhstan)

• Maikling Impormasyon: Nagtrabaho bilang accountant at financial planner hanggang sa magretiro noong 2006. Mahilig magluto at sumulat ng mga kanta at tula

  Noong 1995, nagpa-Bible study siya sa mga Saksi ni Jehova kasama ang anak niya. Gustong-gusto niya ang natutuhan niya na hindi makakapagsinungaling ang Diyos. Nabautismuhan noong 1996

Noong gabi ng Abril 10, 2019, ni-raid ng armadong mga pulis ng Abakan ang apat na bahay, kasama na ang bahay ni Brother Roman Baranovskiy at ng nanay niyang si Valentina. Kinumpiska ng mga pulis ang kanilang mga Bibliya, gadyet, at personal na mga dokumento. Sinampahan sina Roman at Valentina ng kasong kriminal.

“Nang mangyari y’ong raid,” sabi ni Roman, “midweek meeting namin at katatalakay lang namin sa 1 Corinto 10:13. May magandang itinuturo ang tekstong iyon—hindi si Jehova ang pumipili kung anong pagsubok ang mararanasan natin . . . Hindi niya sinasabi: ‘Malakas ka; kaya mo ang pagsubok na ’to. Pero ikaw, mas mahina ka, kaya ito ang mas madaling pagsubok para sa iyo.’ Dahil kung ganoon, kailangan nating umasa sa sarili nating lakas. Puwedeng makaranas ng iba’t ibang pagsubok ang kahit sino sa atin. Pero kung aasa tayo sa lakas ni Jehova, matitiis nating lahat ang pagsubok.”

Noong Hulyo 2020, na-stroke si Valentina. Sinabi niya: “Habang mas humihina ang kalusugan ko, mas nadarama ko ang tulong ni Jehova. Para niya akong niyayakap tuwing nananalangin ako sa kaniya. Talagang napapanatag ako at hindi na ako nag-aalala.”

Napalakas si Valentina ng mga naranasan niya kaya nasabi niya: “Determinado akong paglingkuran ang ating Ama magpakailanman at manatiling tapat sa kaniya anuman ang mangyari sa akin.”

Sinabi ni Roman na dahil sa pagbubulay-bulay sa mga halimbawa ng mga nakapagtiis noong panahon ng Bibliya at sa panahon natin, lalong tumibay ang pananampalataya niya. Tinatanong niya ang sarili niya: ‘Ano ang mga naranasan nila at bakit? Ano ang nakatulong sa kanila na manatiling tapat? Paano nakatulong sa kanila ang banal na espiritu ni Jehova?’ Nakatulong ang sagot sa mga tanong na iyon para maging kumbinsido siya na anumang pagsubok ang dumating, “magbibigay si Jehova ng lakas na higit sa karaniwan kung kailangan.”

Ipinapanalangin natin na sina Roman, Valentina, at lahat ng mahal nating kapatid sa Russia ay patuloy na umasa kay Jehova bilang kanilang kanlungan at lakas.—Awit 46:1.