Sa Disyembre 6, 2017, diringgin ng Leningrad Regional Court ang apela ng mga Saksi sa desisyon ng mababang hukuman na ipagbawal ang New World Translation of the Holy Scriptures sa wikang Russian.

Noong Agosto 2017, tinanggap ng Vyborg City Court ang argumento ng tagausig na hindi isang Bibliya ang New World Translation dahil isinasalin nito ang personal na pangalan ng Diyos na kinakatawan ng Tetragrammaton, bilang “Jehova.” Dahil sa argumentong ito, nalusutan ng tagausig ang Law on Counteracting Extremist Activity, na nagbabawal ideklarang ekstremista ang mga sagradong aklat.

Mariing tinututulan ng mga Saksi ni Jehova, ang tagapaglathala ng New World Translation sa Russia, ang desisyon ng Vyborg City Court sa pagdedeklarang “ekstremistang” publikasyon ang Bibliyang ito. Ang New World Translation ay nailathala na sa kabuoan o sa bahagi nito sa 161 wika at ito ay iginagalang, tumpak, at madaling basahin. Mahigit 200 milyong kopya na ang naipamahagi.