Tinanggap ng mga Saksi ni Jehova sa Ukraine ang libo-libo nilang kapatid sa espesyal na kombensiyon na idinaos sa Lviv, Ukraine, noong Hulyo 6-8, 2018. Mahigit 3,300 delegado mula sa siyam na bansa ang pumunta sa Ukraine, pangunahin na para makinabang sa espirituwal na programang may temang “Magpakalakas-Loob”! Naranasan nila ang pagkamapagpatuloy ng mga kapatid sa Ukraine.

Nagsimula ang paghahanda para sa kombensiyon noong Abril 2017, at sa sumunod na 15 buwan, maraming Saksing tagaroon ang nagboluntaryo para tumulong sa pagsasaayos ng mga aktibidad sa kombensiyon at mag-asikaso sa mga delegado. Nakita ng mga delegado ang kultura ng mga Ukrainian sa kanilang mga sayaw, musika, at pagkain. Sinamahan din ang mga delegado sa tour nila sa mga museum, sinaunang mga kastilyo, at sa isang bahagi ng napakagandang bulubundukin ng Carpathian. Isa sa mga espesyal na aktibidad ay ang pagkakataong makasama ng mga delegado ang mga kapatid na Ukrainian sa ministeryo.

Ang kombensiyon ay ginanap sa isang malaking arena sa Lviv, at ang pinakamataas na bilang ng dumalo ay mahigit 25,000. Ang mahahalagang bahagi ng programa ay nakabrodkast sa 15 stadium at maraming Kingdom Hall sa buong bansa, kaya ang kabuoang bilang ng dumalo ay mahigit 125,000 at 1,420 ang nabautismuhan.

Sinabi ni Ivan Riher, kinatawan ng tanggapang pansangay sa Ukraine: “Matagal naming pinaghandaan at pinanabikan ang espesyal na okasyong ito at ang pagkakataong tanggapin ang mga kapatid natin galing sa iba’t ibang bansa. Masaya kaming makapagpakita ng pagkamapagpatuloy sa mga bisita, at naramdaman namin na lumakas pa ang loob namin at napatibay ang pagkakaisa ng pambuong-daigdig na pamilya natin.”—Awit 133:1.