Noong Nobyembre 23, 2023, namatay si Mary M. Larimer, na nagtapos sa unang klase ng Watchtower Bible College of Gilead. a Ipinanganak si Mary noong Hunyo 4, 1920, sa Scenery Hill, Pennsylvania, U.S.A. Noong 1935, sa edad na 15, nabautismuhan siya sa isang kombensiyon sa Washington, D.C., U.S.A. Makalipas ang apat na taon, naging regular pioneer si Sister Larimer at agad siyang nakilala bilang isang masigasig na mangangaral.

Noong Disyembre 1942, tumanggap siya ng imbitasyon mula kay Brother Nathan Knorr, na nangunguna sa organisasyon noon, na mag-apply sa bagong paaralan na tinatawag na Watchtower Bible College of Gilead. “Layunin ng kolehiyo na ihanda ang mga ministro, kapuwa lalaki at babae, para sa gawaing pagmimisyonero sa buong daigdig.” Binabanggit sa imbitasyon: “Tatagal [ito] nang limang buwan . . . Kailangan ng sipag, puspusang pag-aaral, at pagsisikap para matapos ang kursong ito sa napakaikling panahon.” Ipinadala agad ni Mary ang aplikasyon niya.

Pebrero 1, 1943, ang unang araw ng klase nila. Isang daan silang magkakaklase sa bagong paaralang ito, na nasa South Lansing, New York, U.S.A. Nag-aral nang mabuti si Mary sa loob ng halos limang buwan para matuto nang higit tungkol sa Kasulatan. Mahusay siyang estudyante, at nagtapos siya noong Hunyo 23, 1943.

Pagka-graduate, naatasan si Mary na maging misyonera sa Cuba. Ganito ang sinabi niya tungkol sa mga hamon na napaharap sa kaniya: “Mahirap ang mga tao doon. Sa ministeryo, kailangan naming maglakad . . . Wala kaming sasakyan.” Nanatili si Mary sa kaniyang atas hanggang 1948, kasi bumalik siya sa Pennsylvania para alagaan ang nanay niyang naaksidente. Nang sumunod na mga dekada, nanatiling dalaga si Mary at abala sa paglilingkod kay Jehova. Naglilingkod siya sa isang kongregasyon sa Glendale, California, U.S.A. noong mamatay siya.

Nasa Patterson, New York, na ngayon ang Watchtower Bible School of Gilead, kung saan kasalukuyang nag-aaral ang ika-155 klase. Nang mabalitaan ni Brother Mark Noumair, isang instruktor sa Gilead, ang pagkamatay ni Mary, sinabi niya: “Si Mary Larimer ay isang kabataang babae noon na handang magpunta kahit saan para ipakilala sa mga tao si Jehova. Hindi niya alam kung saan siya ipapadala at kung makakabalik pa siya. Ang mga misyonerong nagtapos sa Gilead gaya ni Mary ay nakapaglatag ng pundasyon para sa paglawak ng gawaing pangangaral sa buong daigdig.”—Isaias 6:8.