Isang Romanong distrito, o tetrarkiya, sa rehiyon ng kabundukan ng Anti-Lebanon sa H ng Bundok Hermon. Isinunod ito sa pangalan ng kabisera nito na Abila, isang lunsod na nasa isang magandang lokasyon sa pagitan ng mga bangin sa may pampang ng ilog ng Abana (makabagong Barada).

Sinasabi sa atin ng Lucas 3:1 na noong ika-15 taon ni Tiberio Cesar (28/29 C.E.), ang distritong ito ay pinamamahalaan ni Lisanias. Ang bagay na ito ay pinatototohanan ng isang inskripsiyong natagpuan sa Abila na isinulat noong panahon ng paghahari ni Tiberio may kaugnayan sa pag-aalay ng isang templo. Mababasa sa inskripsiyong ito ang pangalang “Lisanias na tetrarka.” Bago nito, ang Abilinia ay bahagi ng kaharian ni Herodes na Dakila, ngunit pagkamatay niya, noong mga taóng 1 B.C.E., isinama ito sa probinsiya ng Sirya. Itinala ni Josephus na ang tetrarkiya ni Lisanias ay isinama sa Palestina, noong 37 C.E., sa ilalim ng pamamahala ni Herodes Agripa I, at nang maglaon ay ipinagkaloob ito ni Claudio kay Herodes Agripa II, noong 53 C.E.