[sa Heb., qip·pohzʹ].

Isang ahas na maliwanag na tinawag nang gayon dahil bigla itong lumulundag upang tuklawin ang sisilain nito, gaya ng rattlesnake. Ang salitang-ugat na Hebreo kung saan hinalaw ang pangalan nito ay waring nauugnay sa isang pandiwang salitang-ugat na Arabe na nangangahulugang “tumalon” o “lumukso.” Ang ahas-palaso ay binabanggit sa hula ni Isaias (34:15) bilang isa sa mga hayop na mananahanan sa Edom. Idiniriin nito na ang Edom ay magiging tiwangwang na kaguhuan anupat magiging isang ligtas na dako para sa ahas-palaso upang doon ito ‘mamugad at mangitlog at magpisa ng mga itlog at magpisan ng mga iyon sa kaniyang lilim.’ Nangingitlog ang karamihan sa mga ahas, at ang tekstong ito ay maaaring tumutukoy sa kinagawian ng ilang ahas na pumulupot sa palibot ng kanilang mga itlog. Sinasabi ng aklat ni H. W. Parker na Snakes: A Natural History (1977, p. 55): “Ang ugaling ‘paglimlim’ at ang pagpulupot ng katawan ay nagsisilbing pangontrol ng temperatura at proteksiyon din dahil maaaring takpan o ilantad ng ina ang kaniyang mga itlog habang nagbabagu-bago ang klima at sa gayon ay napananatili ang di-pabagu-bago at malamang na mas mataas na temperatura; isa pa, sa pamamagitan ng pagpulupot ay natatakpan ang nakalantad na mga bahagi.”

Si Samuel Bochart (1599-1667), sa kaniyang akda na Hierozoicon (Leipzig, 1796, Tomo 3, Bahagi II, Aklat III, kab. XI, p. 194-204), ay gumawa ng detalyadong pag-aaral sa salitang Hebreo na qip·pohzʹ at naghinuha na tumutukoy ito sa ahas na sa Griego ay tinatawag na a·kon·tiʹas at sa Latin naman ay jaculus, o ahas-palaso. Gayunman, hindi nagkakasundo ang makabagong mga leksikograpo tungkol sa kahulugan ng salitang Hebreong ito.