[Sa Palibot ng Lunsod].

Isang lunsod ng Macedonia, mga 5 km (3 mi) mula sa Dagat Aegeano at sa daungang-dagat ng Eion. Dumaan dito si Pablo noong kaniyang ikalawang paglalakbay bilang misyonero. (Gaw 17:1) Itinayo ito sa isang burol na napalilibutan sa tatlong panig niyaon (sa H, K, at T) ng paliku-likong ilog ng Strymon, anupat walang alinlangan na ang kalagayang ito ang pinagmulan ng pangalan ng lunsod. Ang Amfipolis ay mga 50 km (30 mi) sa KTK ng Filipos at, dahil sa posisyon nito sa bantog na Romanong lansangang-bayan na Via Egnatia at dahil nasa ilalim ng kontrol nito ang tulay sa ibabaw ng ilog ng Strymon, napakaestratehiko nito at napakahalaga nito sa komersiyo. Itinatag ito bilang isang kolonya ng Atenas noong ikalimang siglo B.C.E. ngunit nang maglaon ay napasailalim ito sa pamamahala ng mga taga-Macedonia. Pagkatapos nito, nakontrol ito ng Roma at ginawang isang malayang lunsod at kabisera ng unang distrito ng Macedonia. Ang mga guho nito ay matatagpuan sa labas lamang ng makabagong nayon na tinatawag ding Amfipolis (Amfipoli).