[sa Ingles, daughter].

Isang supling na babae; sa Hebreo, bath, at sa Griego, thy·gaʹter. (Gen 19:8; Mat 14:6; Gaw 21:9) Sa mga sambahayan noong panahon ng Bibliya, ang pagsisilang sa mga anak na babae ay hindi kasinsaya ng pagsisilang sa mga anak na lalaki; sila ay itinuring na mas mababa kaysa sa mga anak na lalaki, at bihirang itala ang kanilang mga pangalan. (1Cr 2:34, 35) Gayunma’y mahal na mahal ng karamihan sa mga magulang ang kanilang mga anak na babae at pinangalagaan nila ang kapakanan ng mga ito. Dahil sa pagsusumamo ng namimighating mga magulang, pinagaling ni Jesus ang anak na babae ng isang babaing taga-Fenicia, at ibinangon niya ang anak na babae ni Jairo mula sa mga patay.​—Mat 15:22-28; Luc 8:41, 42, 49-56.

Sa patriyarkal na lipunan, ang mga anak na babae ay may partikular na mga karapatan, mga pananagutan, at mga limitasyon. Inaatasan sila ng iba’t ibang gawain. Ang mga anak na babae ng mga saserdote ay kumakain mula sa takdang bahagi ng mga saserdote sa mga hain. (Gen 24:16, 19, 20; 29:6-9; Lev 10:14) Ang anak na babae ay pag-aari ng kaniyang ama hanggang sa ibigay siya nito sa pag-aasawa (Jos 15:16, 17; 1Sa 18:17, 19, 27), at bilang pag-aari nito ay maaari pa nga siyang gamiting panagot o ipagbili sa pagkaalipin, huwag lamang sa isang banyaga. (Exo 21:7-10; Ne 5:2-5) Hangga’t wala pa siyang asawa, ang kaniyang mga panata ay maaaring pawalang-bisa ng kaniyang ama. (Bil 30:3-5) Ipinagbabawal sa ama na gawing patutot ang kaniyang anak na babae, at kapag hinalay ito, ang ama ay maaaring maningil ng bayad-pinsala. (Exo 22:16, 17; Lev 19:29; Deu 22:28, 29) May mga pagkakataong inialok ng mga ama ang kanilang mga anak na dalaga sa balakyot na mga mang-uumog upang mapangalagaan ang kanilang mga panauhin. (Gen 19:6-8; Huk 19:22-24) Kung minsan, ang mga anak na babae ay binibigyan ng mana kasama ng kanilang mga kapatid na lalaki, ngunit sa kaso ng limang anak na babae ni Zelopehad, na namatay nang walang anak na lalaki, sila ang tumanggap sa buong mana ng kanilang mga ninuno, sa kundisyon na mag-aasawa lamang sila sa mga anak ni Manases upang ang ari-arian ay manatili sa tribo. (Bil 36:1-12; Jos 15:19; Job 42:15) Kapag ang isang anak na babae ay diniborsiyo o nabalo, maaari siyang bumalik sa sambahayan ng kaniyang ama.​—Gen 38:11; Lev 22:13.

“Anak na babae”​—lagi ba itong tumutukoy sa tunay na anak na babae?

Ang terminong “anak na babae” o “anak” ay ikinapit sa iba pang mga kamag-anak bukod sa tunay na anak na babae. Halimbawa, sa ilang kalagayan, ang terminong ito ay tumukoy sa kapatid na babae (Gen 34:8, 17), inampong anak na babae (Es 2:7, 15), manugang na babae (Huk 12:9; Ru 1:11-13), apong babae (1Ha 15:2, 10, kung saan ang salitang Hebreo para sa anak na babae, bath, ay isinasaling “apo” sa Mo, NW; tingnan ang 2Cr 13:1, 2), at inapo.​—Gen 27:46; Luc 1:5; 13:16.

Bukod sa tunay na mga kamag-anak na ito, ang terminong “anak na babae” o “anak” ay ikinakapit sa mga babae sa pangkalahatan (Gen 6:2, 4; 30:13; Kaw 31:29); sa mga kababaihan ng isang partikular na lupain, bayan o lunsod (Gen 24:37; Huk 11:40; 21:21); at sa mga babaing mananamba ng huwad na mga diyos (Mal 2:11). Ginagamit ito ng isang may awtoridad o ng isang nakatatanda bilang isang magiliw at pangkaraniwang katawagan sa isang nakababatang babae. (Ru 3:10, 11; Mar 5:34) Ang mga anyo ng salitang bath ay ginagamit ding pantukoy sa “mga sanga” ng punungkahoy (Gen 49:22) at “mga sakop na bayan” ng isang malaking lunsod. (Bil 21:25; Jos 17:11; Jer 49:2) Ang termino para sa “anak na babae,” na may iba’t ibang kahulugan, ay lumilitaw sa Bibliya nang mahigit 600 beses.