FEATURE

Ang Baha Noong mga Araw ni Noe

I-PLAY

MAHIGIT 4,370 taon na ang nakararaan, ayon sa ulat ng kasaysayan sa Bibliya, nabuksan ang mga pintuan ng tubig ng langit at isang delubyo ang umapaw sa buong lupa. Napuksa ang mga taong di-makadiyos at mararahas at lahat niyaong nagwalang-bahala anupat hindi nagbigay-pansin sa babala ng Diyos. Ang nakaligtas lamang sa Baha ay ang matuwid na si Noe at ang kaniyang pamilya, walo katao, kasama ang limitadong bilang ng bawat uri ng buhay-hayop, sa pamamagitan ng isang pagkalaki-laking arka na ginawa ayon sa tagubilin ng Diyos.—Gen 7:1-24.

Pinatutunayan ng maraming manunulat ng Bibliya na talagang naganap ang Baha. (Isa 54:9; 2Pe 3:5, 6; Heb 11:7) Gayunman, ang pinakamatibay na ebidensiya ay ang patotoo ni Jesu-Kristo mismo, na nakasaksi sa mga pangyayari mula sa langit. (Ihambing ang Ju 8:58.) Tuwiran niyang sinabi: “Noong mga araw ni Noe, . . . dumating ang baha at pinuksa silang lahat.”—Luc 17:26, 27.

Ang ulat tungkol sa Baha ay hindi isang kuwento lamang. Ipinakita ni Jesu-Kristo na mayroon itong makahulang kahulugan. Sa kaniyang hula hinggil sa “katapusan ng sistema ng mga bagay,” espesipiko niyang tinukoy ang “mga araw ni Noe.” Tinukoy niya ang Baha bilang babalang halimbawa ng isang mas malaking pagkapuksa na sasapit sa panahon ng “pagkanaririto ng Anak ng tao.”—Mat 24:3, 37-39.

Nagkasya Kaya sa Arka ang Lahat ng Hayop? Totoo na sinasabi ng mga ensayklopidiya na may mahigit sa isang milyong uri ng mga hayop. Ngunit tinagubilinan si Noe na mga kinatawan lamang ng bawat “uri” ng hayop sa katihan at lumilipad na nilalang ang iingatan niyang buháy. Sinasabi ng ilang imbestigador na 43 “uri” ng mamalya, 74 na “uri” ng ibon, at 10 “uri” ng reptilya lamang ang posibleng pinagmulan ng sari-saring uri ng mga hayop na kilala sa ngayon. Mga 40,000 m kubiko (1,400,000 piye kubiko) ang magagamit na espasyo sa arka—sapat para sa lahat ng nakatalang sakay nito

Saan Napunta ang Tubig ng Baha? Maliwanag na naririto pa iyon sa lupa. Sa ngayon, may mga 1.4 bilyong km kubiko (326 na milyong mi kubiko) ng tubig sa lupa. Ito ang tumatakip sa mahigit 70 porsiyento ng ibabaw ng lupa. Ang katamtamang lalim ng mga karagatan ay 4 na km (2.5 mi); sa katamtaman, 0.8 km (0.5 mi) lamang ang taas ng lupa mula sa kapantayan ng dagat. Kung papatagin ang ibabaw ng lupa, ito ay matatabunan ng tubig sa lalim na 2,400 m (8,000 piye)

Mga Alamat ng Baha

Mga halimbawa mula sa anim na kontinente at mga pulo sa dagat; daan-daang gayong mga alamat ang kilala

Iladong mammoth na muling binuo, nahukay sa Siberia noong 1901. Pagkaraan ng libu-libong taon, nasa bibig pa rin nito ang kinain nitong halaman. Para sa ilan, ito, at gayundin ang iba pang mga bagay gaya ng fosil ng mga nilalang sa dagat na natagpuan sa matataas na kabundukan, ay malinaw na katibayan ng isang biglaan at kapaha-pahamak na pangglobong baha

Kaunawaan sa Kasulatan 2