FEATURE

Ang Sinaunang Ehipto

I-PLAY

DAHIL sa madalas na pakikipag-ugnayan ng Israel sa Ehipto, ang Bibliya ay naglalaman ng maraming detalye tungkol sa lupaing iyon. Sa pamamagitan ng mga pangyayari sa Ehipto, napadakila ang pangalan ni Jehova sa kamangha-manghang paraan.

MAPA: Ang Sinaunang Ehipto

Maraming diyos ang sinasamba noon sa lupain ng Ehipto. Ang ilang hayop ay itinuring na mga diyos samantalang ang iba ay itinuring na sagrado sa partikular na mga diyos ng Ehipto. Hindi nga kataka-takang sinabi ni Moises na kung maghahandog ang Israel ng mga haing hayop kay Jehova sa Ehipto, kikilos ang bayan nang may karahasan laban sa kanila. (Exo 8:26) Mauunawaan din natin kung bakit nang manumbalik sa Ehipto ang puso ng Israel noong sila’y nasa ilang, gumamit sila ng isang binubong estatuwa ng guya para sa diumano’y “isang kapistahan para kay Jehova.”—Exo 32:1-5.

Ang isa pang prominenteng bahagi ng pagsamba ng mga Ehipsiyo ay ang paniniwala sa kabilang-buhay. Ang paniniwalang ito ay makikita sa kaugalian nila na embalsamuhin ang mga patay at magtayo ng pagkalaki-laking mga libingan upang parangalan ang mga ito.

Bagaman si Moises ay ‘tinuruan sa lahat ng karunungan ng mga Ehipsiyo,’ ang mga utos na itinala niya may kinalaman sa pagsamba kay Jehova ay walang anumang bahid ng paniniwalang Ehipsiyo. (Gaw 7:22) Ang isinulat niya ay hindi nagmula sa tao kundi kinasihan ng Diyos.

Ang estatuwa ni Amenhotep III na may taas na halos 18 m (60 piye) malapit sa Thebes. Tiyak na itinayo ang gayong mga estatuwa upang mamangha ang mga tao

Malaking stela na talaan ng mga naitayo ni Tutankhamen; nang maglaon ay ipinabago ni Haring Horemheb ang inskripsiyon upang siya ang kilalaning nagtayo ng mga iyon. Pangkaraniwan ang pagiging di-matapat sa sinaunang mga rekord ng Ehipto

Isang trinidad kung saan makikita si Ramses II sa pagitan ng diyos na si Amon at ng diyosang si Mut. Si Paraon ay itinuring na diyos, ang buháy na si Horus

Si Paraon Taharqa na nakaluhod sa harap ni Horus. Inangkin ni Taharqa na siya ang anyong-laman nito. Prominente sa relihiyon ng Ehipto ang mga hayop

Ibaba: Kahanga-hangang mga haligi ng templo sa Luxor

Isang daan na may mga espinghe patungo sa templo ni Amon-Ra sa Luxor

Isang bahagi ng “Aklat ng mga Patay” (ibaba), na inilalagay sa kabaong kasama ng momya; naglalaman ito ng nakasulat na mga orasyon upang bigkasin ng namatay bilang proteksiyon at upang pumatnubay sa kaniya sa paghuhukom sa kabilang-buhay

Ang diyosa ng kalangitan na si Nut na napalilibutan ng mga sagisag ng sodyako. Ang astrolohiya, na nanggaling sa Babilonya, ay naging bahagi ng relihiyong Ehipsiyo

Ang Ehipto ay umaasa sa makitid at matabang libis sa gilid ng Ilog Nilo. (Ang matabang lugar na ito ay kulay berde sa mapa sa pahina 531.) Sa gawing likuran ay makikita ang biglang pagbabago mula sa mga pananim tungo sa disyerto

Isang paraon sa kaniyang karo. Ang gayong mga karo ay bahagi ng kasangkapang militar ng Ehipto at ipinagbibili pa nga noon sa ibang mga bansa

Sa mga pader ng templo ni Amon-Ra sa Karnak, iniulat ni Seti I ang kaniyang mga tagumpay sa militar; ang mga bihag ay ipinakikitang hawak sa kanilang buhok. Gaya ng maaasahan, ang mga tagumpay ay ipinagmalaki at iniulat ng mga Ehipsiyo sa kanilang mga bantayog

Kaunawaan sa Kasulatan 2