[May-ari ng Isang Tipan; minsang lumitaw sa Huk 9:46 bilang El-berit, Diyos ng Isang Tipan].

Ang Baal ng Sikem, na sinimulang sambahin ng mga Israelita pagkamatay ni Hukom Gideon. (Huk 8:33) Maaaring ipinahihiwatig ng katawagang “Baal-berit” na ang partikular na Baal na ito ay pinaniniwalaang nagbabantay sa pagtupad sa mga tipan.

Maliwanag na ang bahay o templo ni Baal-berit sa Sikem ay may karugtong na isang silid na nagsisilbing ingatang-yaman. (Huk 9:4) Kapag panahon ng pag-aani ng ubas, lumilitaw na nagdaraos ang mga Sikemita ng isang kapistahan bilang parangal kay Baal-berit, na nagtatapos sa isang salu-salo ukol sa paghahain sa templo ng kanilang diyos. Sa loob ng templo ni Baal-berit, samantalang magkakasamang kumakain at umiinom at isinusumpa si Abimelec, malamang na sa ilalim ng impluwensiya ng alak, sinulsulan ni Gaal ang mga Sikemita na maghimagsik laban kay Haring Abimelec. (Huk 9:27-29) Nang maglaon, nang pagbantaan ni Abimelec ang mga may-ari ng lupain sa tore ng Sikem (Migdal-Sikem, AT), nanganlong sila sa kuta ng bahay ni El-berit (Baal-berit), ngunit namatay sila sa sunog nang silaban ni Abimelec at ng kaniyang mga tauhan ang kuta.​—Huk 9:46-49.