Ito ang salin ng salitang Griego na peʹtra (kasariang pambabae), na tumutukoy sa isang limpak ng bato (Mat 7:24, 25; 27:51, 60; Luc 6:48; 8:6, 13; Apo 6:15, 16) sa gayon ay naiiba ito sa peʹtros (kasariang panlalaki at ginagamit bilang pangalang pantangi na Pedro), nangangahulugang “piraso ng bato.” Dahil sa pagkakaibang ito, makikita natin na nang sabihin ni Jesus kay Pedro, “Ikaw ay si Pedro, at sa batong-limpak na ito ay itatayo ko ang aking kongregasyon,” hindi siya gumamit ng mga terminong magkasingkahulugan. (Mat 16:18) Maging sa bersiyong Aramaiko (Syriac), agad makikita ang pagkakaibang ito dahil magkaiba ang kasarian ng kataga na nasa unahan ng salitang kiʼphaʼ, na ginamit kapuwa para sa “Pedro” at sa “bato.” Panlalaking pandiwang panghalip (hu) ang  nasa unahan ng “Pedro,” samantalang pambabaing pamatlig na pang-uri (hadeʼ) naman ang nasa unahan ng “bato.”

Hindi inisip ng mga apostol na ang sinabi ni Jesus ay nangangahulugang si Pedro ang batong-limpak; bilang katunayan nito, nang maglaon ay pinagtalunan nila kung sino ang waring pinakadakila sa kanila. (Mar 9:33-35; Luc 22:24-26) Wala sanang saligan ang gayong pagtatalo kung si Pedro ang binigyan ng nakatataas na posisyon bilang ang batong-limpak na pagtatayuan ng kongregasyon. Maliwanag na ipinakikita ng Kasulatan na ang lahat ng mga apostol ay pantay-pantay bilang mga batong pundasyon. Silang lahat, pati na si Pedro, ay nakatatag sa ibabaw ni Kristo Jesus bilang ang pundasyong batong-panulok. (Efe 2:19-22; Apo 21:2, 9-14) Tinukoy mismo ni Pedro na ang batong-limpak (peʹtra) na kinatatayuan ng kongregasyon ay si Kristo Jesus. (1Pe 2:4-8) Gayundin, ang apostol na si Pablo ay sumulat: “Sapagkat umiinom sila [ang mga Israelita] noon mula sa espirituwal na batong-limpak na sumusunod sa kanila, at ang batong-limpak na iyon ay nangangahulugang ang Kristo.” (1Co 10:4) Sa di-kukulangin sa dalawang pagkakataon at sa dalawang magkaibang lokasyon, makahimalang pinaglaanan ang mga Israelita ng tubig mula sa batong-limpak. (Exo 17:5-7; Bil 20:1-11) Samakatuwid, sa diwa ay sinusundan sila ng isang batong-limpak bilang bukal ng tubig. Maliwanag na ang batong-limpak na iyon mismo ay lumalarawan o sumasagisag kay Kristo Jesus, na nagsabi sa mga Judio: “Kung ang sinuman ay nauuhaw, pumarito siya sa akin at uminom.”​—Ju 7:37.

Kapansin-pansin din na si Augustine (354-430 C.E.), karaniwang tinatawag na “San Agustin,” ay dating naniniwala na si Pedro ang batong-limpak ngunit nang maglaon ay nagbago siya ng pangmalas. Ayon sa Commentary on the Holy Scriptures ni Lange (Mat 16:18, tlb, p. 296), sinabi ni Augustine: “Ang bato ay hindi pinanganlan nang gayon mula kay Pedro, kundi si Pedro mula sa bato (non enim a Petro petra, sed Petrus a petra), kung paanong si Kristo ay hindi tinatawag nang gayon dahil sa Kristiyano, kundi ang Kristiyano dahil kay Kristo. Ang dahilan kaya sinabi ng Panginoon, ‘Sa batong ito ay itatayo ko ang aking simbahan,’ ay sapagkat sinabi ni Pedro: ‘Ikaw ang Kristo, ang Anak ng Diyos na buháy.’ Sa batong ito, na iyong ipinahayag, ang sabi niya, ay itatayo ko ang aking simbahan. Sapagkat si Kristo ang bato (petra enim erat Christus), na sa ibabaw niyaon ay itinayo rin mismo si Pedro; sapagkat walang ibang pundasyon ang mailalatag ng sinumang tao, maliban sa nakalatag na, si Jesu-Kristo.”​—Isinalin at inedit ni P. Schaff, 1976.