Sa mga hayop na may apat na paa, ang mga gatil sa likuran ng mga binti ay ang mga litid sa itaas ng pinakasakong ng mga binti sa hulihan. Kapag pinutol ang mga litid na ito, ang hayop ay mapipilay, o malulumpo, at hindi na magagamit sa pagtatrabaho o pakikidigma. Sa kanilang sariling kagustuhan, ang mga anak ni Jacob na sina Simeon at Levi ay pumilay ng mga toro, malamang ay noong maghiganti sila sa mga Hivita ng Sikem. (Gen 49:5, 6) Pinilay ng mga Israelita ang mga kabayo ng kanilang mga kaaway sa digmaan. Noong minsan ay espesipikong tinagubilinan ni Jehova si Josue na gawin ito. (Jos 11:6, 9; 2Sa 8:3, 4; 1Cr 18:3, 4) Ito ang pinakasimpleng paraan upang hindi na magamit ang mga kabayo sa pakikipagbaka. Pagkatapos pilayin ang mga kabayo, walang alinlangang pinapatay ang mga ito at nililipol kasama ng mga karong pandigma. Sa pamamagitan ng di-pagkamkam sa mga kabayo ng kanilang mga kaaway at di-paggamit ng mga ito sa pakikidigma, ang mga Israelita ay maiingatan mula sa silo ng pananalig sa mga kabayo ukol sa proteksiyon sa halip na kay Jehova.​—Ihambing ang Deu 17:16; Isa 31:1, 3.