Ang sistema ng relihiyon ng mga Judio. (Gal 1:13, 14) Hindi lubusang nakasalig sa Hebreong Kasulatan ang iba’t ibang anyo ng Judaismo noong unang siglo C.E. Ang isa sa pinakaprominenteng dibisyon ng Judaismo, ang mga Saduceo, ay hindi naniniwala sa maka-Kasulatang turo ng pagkabuhay-muli at sa pag-iral ng mga anghel. (Mar 12:18-27; Gaw 23:8) Sa mga bagay na ito, tahasan silang sinalungat ng mga Pariseo, isa pang maimpluwensiyang sanga ng Judaismo. (Gaw 23:6-9) Gayunman, pinawalang-bisa ng mga Pariseo ang Salita ng Diyos dahil sa kanilang maraming di-makakasulatang tradisyon. (Mat 15:1-11) Marami ang nahirapang tumanggap kay Kristo, hindi dahil sa Kautusan, na sa totoo’y nagsilbing tagapagturo na umaakay tungo kay Kristo (Gal 3:24), kundi dahil sa di-makakasulatang mga tradisyong iyon. Ang Kautusan mismo ay mabuti at banal (Ro 7:12), ngunit mga tradisyon ng mga tao ang umalipin sa mga Judio. (Col 2:8) May-kalupitang pinag-usig ni Saul (Pablo) ang mga Kristiyano dahil sa kaniyang maalab  na sigasig sa ‘mga tradisyon ng kaniyang mga ama.’​—Gal 1:13, 14, 23; tingnan ang PARISEO; SADUCEO.