Ang salitang “kaliskis” ay katumbas ng salitang Hebreong qas·qeʹseth at ng salitang Griegong lepís.

Ang mga kaliskis ng maraming isda at reptilya ay maninipis at matitigas at nagsisilbing pinakabalat ng mga ito. Sinasabi ng Kautusan na ang “lahat ng may mga palikpik at mga kaliskis sa tubig” ay malinis sa seremonyal na paraan bilang pagkain. Hindi maaaring kainin ang mga hayop sa tubig na walang kaliskis; “karima-rimarim na bagay” ang mga iyon. (Lev 11:9, 10, 12; Deu 14:9, 10) Sa gayon, ang mga kaliskis (sa Heb., qas·qas·simʹ, pangmaramihan ng qas·qeʹseth) ay isa sa madaling makitang palatandaan upang malaman kung aling isda ang maaaring kainin. Bagaman may apat na uri ng kaliskis ng isda, pinakakaraniwan ang kaliskis na ctenoid (may tulad-suklay na gilid) at ang kaliskis na cycloid (may pabilog na gilid). Nakahanay at susun-suson ang mga ito, anupat nagsisilbing isang manipis, magaan, at malambot na balot.

Gayunding salitang Hebreo ang ginagamit sa Ezekiel 29:4, kung saan ang Ehipsiyong Paraon ay makasagisag na inilalarawan na parang isang buwaya. Ang buong katawan ng buwaya ay nababalot ng matitigas at usli-usling kaliskis sa tulad-katad na balat nito. Maliwanag na ang tinutukoy rin sa Job 41:15-17 ay mga kaliskis (AS, NW, MR) ng buwaya, anupat ginamit doon ang salitang Hebreo na madalas isalin bilang “kalasag.”​—Tingnan ang LEVIATAN.

Mga Kaliskis ng Baluti. Ang kutamaya noon ay maaaring may mga kaliskis. Ang mga ito ay maliliit na laminang metal na susun-suson at nagsisilbing isang medyo malambot na laminang baluti.​—1Sa 17:5; tingnan ang ARMAS, BALUTI (Kutamaya).

Mga Kaliskis sa mga Mata ni Pablo. Nang pagalingin ang pagkabulag ni Pablo na resulta ng pagpapakita sa kaniya ni Jesus, nalaglag mula sa kaniyang mga mata “ang sa wari ay mga kaliskis.” (Gaw 9:18) Sinasabi ng ilang iskolar na wala namang aktuwal na nalaglag mula sa mga mata ni Pablo kundi makasagisag na pananalita lamang ito na nangangahulugang nanauli ang paningin ni Pablo. Gayunpaman, ipinahihiwatig ng maraming makabagong salin na mayroon talagang nalaglag mula sa mga mata ni Pablo.​—AS-Tg, BSP, MB, NPV, NW.