Isang dako sa Jerusalem, na may latag ng bato, kung saan umupo sa luklukan ng paghatol ang Romanong si Gobernador Poncio Pilato nang humarap sa kaniya si Jesu-Kristo upang litisin. (Ju 19:13) Sa Hebreo, ang lugar na ito ay tinawag na “Gabata,” isang salita na di-matiyak ang pinagkunan at posibleng nangangahulugang “burol,” “mataas na dako,” o “hantad na lugar.” Ang pangalang Griego nito, na Li·thoʹstro·ton (Latag ng Bato), ay maaaring tumutukoy sa isang pari-parisukat na sahig, na may disenyong moseyk.

Sa paanuman, ang “Latag ng Bato” kung saan humarap si Jesus kay Pilato ay nauugnay sa “palasyo ng gobernador.” (Ju 19:1-13) Maaaring ito ay isang hantad na dako sa harapan ng palasyo ni Herodes na Dakila; ipinapalagay naman ng ilang iskolar na ito’y isang lugar na malapit sa Tore ng Antonia o isang gitnang looban sa loob mismo ng Toreng iyon, sa HK ng bakuran ng templo. Gayunman, hindi pa rin alam ang eksaktong lokasyon ng Latag ng Bato.​—Tingnan ang ANTONIA, TORE NG; PALASYO NG GOBERNADOR.