Isa sa 70 matatandang lalaki ng Israel na pinili upang tumulong kay Moises noong panahon ng paglalakbay sa ilang. Bagaman sina Medad at Eldad ay hindi pumaroon sa tolda ng kapisanan kasama ng iba pa, “kabilang sila roon sa mga nakasulat.” Kaya nang kunin ni Jehova ang ilang bahagi ng espiritu na sumasa kay Moises at ilagay iyon sa bawat isa sa 70 matatandang lalaki, ang mga ito rin ay tumanggap niyaon at nagsimulang gumanap bilang mga propeta sa kampo. (Bil 11:16, 17, 24-26) Nang imungkahi ni Josue kay Moises na pigilan sina Medad at Eldad, sinabi nito: “Naninibugho ka ba para sa akin? Huwag, nais ko nga na ang buong bayan ni Jehova ay maging mga propeta, sapagkat kung gayon ay ilalagay ni Jehova sa kanila ang kaniyang espiritu!”​—Bil 11:27-29.