Ang sining ng paglilok sa kahoy, bato, metal, at luwad. Sa ilalim ng paksang ito, ang pag-ukit at paglilok ay mga terminong halinhinang ginagamit bilang salin ng ilang salitang Hebreo. Gayunman, ang salitang Hebreo na peʹsel, na pinakamalimit gamitin, ay ginagamit may kinalaman sa inukit o nililok na mga imahen.

Sa Dekalogo (Exo 20:4) unang sinabihan ang Israel na huwag gumawa ng mga inukit na imaheng sasambahin, at nang maglaon ay inulit ito. “Sumpain ang tao na gumagawa ng inukit na imahen.” (Deu 27:15; 4:16, 23; 5:8) Paulit-ulit na itinawag-pansin ng mga propeta ang kamangmangan ng paggawa ng mga inukit na idolo at pagsamba sa mga ito, at hinatulan nila ang gawaing ito. (Aw 97:7; Isa 42:17; 44:9-20; 45:20; Jer 10:14, 15; Na 1:14; Hab 2:18) Kung ang katipang bayan ng Diyos ay magpipitagan sa mga inukit na imahen sa kanilang pagsamba, mahahati ang kanilang bukod-tanging debosyon na nauukol kay Jehova. Kaya sa tuwing humihiwalay ang Israel mula sa Diyos at sumasamba sa mga bagay na inukit ng kanilang mga kamay, hindi kataka-taka na naiwawala nila ang pagsang-ayon ng Diyos.​—Huk 18:18, 30, 31; 2Ha 21:7-9; 2Cr 33:7, 22; Eze 8:10.

Sa kabilang dako, ang mga gawang inukit para sa tabernakulo at sa malaking templo ni Solomon ay hindi dapat sambahin kundi nilayon upang magsilbing palamuti at sagisag. Si Jehova mismo ang nag-utos na gawin ang mga inukit na kagamitang ito, at inilagay ng Diyos ang kaniyang espiritu kina Bezalel at Oholiab, mga bihasang manggagawa na pinili upang mangasiwa sa pagtatayo ng tabernakulo. (Exo 35:30, 31, 34) Sa kaayusan sa tabernakulo, ang ilang halimbawa ng mga inukit na kagamitang yari sa ginto at mahahalagang bato ay ang mga kasangkapang gaya ng kandelero, ang mga kerubin sa takip ng Kaban, ang mga lilok sa mga hiyas ng pektoral, at ang laminang ginto sa turbante ng mataas na saserdote. (Exo 25:18, 19, 31-40; 28:2, 21, 36) Sa templo ni Solomon, may mga kerubin, mga larawan ng puno ng palma, mga bulaklak, at mga palamuting hugis-upo na inukit sa mga tablang sedro, na pawang kinalupkupan ng ginto. (1Ha 6:18-35; 2Cr 2:7) Marami ring gawang inukit na matatagpuan sa makalarawang templo na nakita ni Ezekiel sa pangitain.​—Eze 41:17-20.

Dahil hinahatulan ng Diyos ang paggamit ng inukit na mga idolo at mga imahen sa pagsamba, hindi kataka-taka na yaong mga natagpuan ng mga arkeologo sa Palestina ay may bahid o impluwensiya ng mga pagano. Hindi lamang umiwas ang mga Israelita  sa paggawa ng mga bantayog para sa kanilang dakilang mga lider kundi umiwas din sila sa pag-ukit ng mga relyebeng naglalarawan ng kanilang mga tagumpay sa militar. Samantala, masasalamin sa mga relyebe, mga estatuwa, at iba pang inukit na mga replika mula sa Ehipto, Asirya, Babilonia, at Persia ang pagsamba, pakikipagdigma, at pang-araw-araw na buhay ng sinaunang mga taong iyon. Isinisiwalat ng mga bagay na pinakakaraniwang natatagpuan na ang bato, luwad, kahoy, bubog, garing, mahahalagang hiyas, buto ng hayop, eskayola, kabibi, mga metal, at alabastro ay ginamit ng mga mang-uukit sa paggawa ng mga trono, mga leon, mga haligi, mga alahas, mga panlagda at mga pantatak, mga sarkopago, mga tapyas ng bato, mga muwebles, mga palamuti sa dingding, at mga kagamitan.