[sa Ingles, cutting off].

Sa Israel, kapag ginamit ang pananalitang ito bilang isang kaparusahan dahil sa paglabag sa Kautusan, nangangahulugan ito ng pagpatay. Naniniwala ang ilang rabinikong iskolar na nangangahulugan lamang ito ng pagtitiwalag mula sa kongregasyon ng Israel, bagaman nagkakaiba-iba ang kanilang opinyon.

Sa pamamagitan ng pagsusuri sa mga teksto ng Kasulatan na bumabanggit sa mga paglabag na tinakdaan ng kaparusahang ito, matitiyak na tumutukoy ito sa parusang kamatayan, na inilalapat ng mga awtoridad sa Israel o ng Diyos mismo. Yaong pinakamalulubhang krimen ang hinahatulan ng parusang pagkalipol. Kabilang sa mga ito ang kawalang-galang kay Jehova (ang Diyos at Hari ng Israel), idolatriya, paghahain ng mga anak, espiritismo, paglapastangan sa mga bagay na sagrado, at ang kasuklam-suklam na mga gawain gaya ng insesto, bestiyalidad, at sodomiya. Sa ilang pagkakataon, espesipikong binabanggit ang parusang kamatayan may kaugnayan sa paglabag na nilalapatan ng parusang ‘pagkalipol.’​—Exo 31:14; Lev 7:27; 18:6, 22, 23, 29; 20:3-6; 22:3, 4, 9; 23:28-30; Bil 4:15, 18, 20; 15:30, 31; tingnan din ang Exo 30:31-33, 38.

Maliwanag na nasa isip ng manunulat ng liham sa mga Hebreo ang ganitong pananalita sa Bilang 15:30: “Ang kaluluwa na gumagawa ng isang bagay nang sinasadya . . . lilipulin [sa Ingles, cut off] ang kaluluwang iyon mula sa gitna ng kaniyang bayan,” nang sabihin niya: “Ang sinumang taong nagwalang-halaga sa kautusan ni Moises ay mamamatay nang hindi kinahahabagan, sa patotoo ng dalawa o tatlo.” (Heb 10:28) Ginamit ni Jesus ang pananalitang iyon nang banggitin niya ang kaparusahan para sa makasagisag na “mga kambing”: “Ang mga ito ay magtutungo sa walang-hanggang pagkalipol [sa Ingles, cutting-off; sa Gr., koʹla·sin; sa literal, “pagtagpas; pagpungos”], ngunit ang mga matuwid ay sa buhay na walang hanggan.” (Mat 25:46) Dito, ipinakikitang ang kabaligtaran ng buhay ay kamatayan.