Sa Ezekiel 9:2, 3, 11, ang lalaking nakasuot ng lino na may pananagutang markahan ang mga indibiduwal sa noo ay inilalarawan bilang may “tintero ng kalihim sa kaniyang mga balakang,” na maliwanag na nakasukbit sa kaniyang baywang sa pamamagitan ng pamigkis. Ang tinterong ito ng kalihim ay maaaring katulad ng ginagamit noon sa sinaunang Ehipto. Ang Ehipsiyong ‘kagamitan ng eskriba’ ay isang kahita na mahaba at makitid, gawa sa kahoy, at may kompartment o mga lalagyan para sa mga panulat na tambo. Sa pinakalabas nito, sa bandang itaas, mayroon itong isa o mas marami pang uka para sa isang maliit na limpak ng pinatuyong tinta. Kapag magsusulat, ipinapahid ng eskriba sa tinta ang basang dulo ng kaniyang panulat. Ipinakikita ng mga inskripsiyon na ang ‘kagamitan ng eskriba’ na ginamit ng mga eskribang Siryano ay katulad nito.