Paggawa ng Literatura sa Bibliya Ukol sa Pagpupuri sa Diyos

Ang mga Saksi ni Jehova ay kilala sa kanilang pangangaral ng Kaharian ng Diyos sa pamamagitan ng mga nilimbag na babasahín. Sapol noong 1920 ang Watch Tower Society ay gumamit ng boluntaryong mga manggagawa sa mga Saksi upang gumawa ng mga magasin at aklat para ipamahagi. Ito’y upang magpatuloy ang produksiyon ng literatura sa pinakamaliit na gastos na maaari.

Sa loob ng mga 60 taon na, ang Society ay nakapagpaunlad at nakapagpalawak ng paggawa ng literatura sa Bibliya, una sa Brooklyn at pagkatapos ay sa mga ibang bansa. Lahat ng gawain ay isinasagawa ng dumaraming mga manggagawang boluntaryo.

Nang magtatapos ang mga taon ng 1970’s ang tradisyonal na paraan ng paghahanda at pag-iimprenta ng teksto ay unti-unti nang nahahalinhan ng sistema ng computer, phototypesetting, at offset printing. Ang problema rito ay na isang limitadong dami lamang ng mga wika ang naaaring ihanda nang uso noon na mga kagamitang komersiyal. Nguni’t, ang Society ay gumagawa na noon ng literatura sa mga 160 wika, at nangangailangan pa noon ng higit pa.

Kaya, tumawag ng mga boluntaryo upang gumawa ng isang multilanguage electronic phototypesetting system. Nakatutuwa ang resulta. Nagtagumpay ang mga technician, at sila’y nakabuo ng isang text-entry, composition, at phototypesetting na sistema, tinatawag na MEPS. Ito’y nakapaghahanda ng literatura sa halos 200 wika. Ito’y maaari pang maragdagan.

Sa ngayon ang MEPS text entry at graphics units, na gawa ng mga Saksi ni Jehova, ay ginagamit sa 25 mga bansa, at nagbabalak na dagdagan pa ito. Mga boluntaryong manggagawa sa mga bansang ito ang sinanay upang magpaandar at mangalaga ng kagamitang ito. Ang Society ay gumagawa ngayon ng mga magasin sa mahigit na 100 wika sa 36 na mga bansa, at sa 5 sa mga bansang ito ay gumagawa rin ng mga pinabalatang aklat at mga Bibliya.

Mga tao ang kailangan sa gawaing ito​—mga manunulat, tagapagsalin, proofreaders, tagalimbag, tagabuo ng aklat, at mga tagapagkarga. Ang mga iba ay nag-aasikaso ng pagpapahatid-liham sa mga  kongregasyon. Ang iba ay para sa produksiyon ng makakain, paghahanda ng pagkain, paglilinis, pag-aasikaso ng laundry, at iba pa. Lahat ng ito ay ginagawa ng mga boluntaryo na naglilingkod sa iba’t ibang bansa. Sa buong daigdig noong 1985, mayroong 8,438 na mga boluntaryo na naglilingkod sa iba’t ibang opisina, pabrika, tahanan, at mga taniman.

Sino ba ang mga taong ito? Sila’y mga lalaki at mga babae, walang asawa at may asawa, bata at matanda, lahat ay nag-alay na mga Saksi ni Jehova. Ang iba ay nasa gawaing ito nang may 40, 50, at 60 taon. Sila’y gumugugol sa katamtaman ng di-kukulangin sa 44 na oras isang linggo sa kani-kanilang trabaho at nag-o-overtime kung kinakailangan. Ang mga gabi at mga dulo ng sanlinggo ay ginugugol sa pangangaral ng mabuting balita sa bahay-bahay, at sa iba pang mga aktibidades ng kongregasyon.

Sa buong daigdig ang mga manggagawang ito ay pinaglalaanan ng katamtamang silid at pagkain sa isa sa mga pabahay ng Society, na tinatawag na mga tahanang Bethel. Sila’y tumatanggap din ng katamtamang reimbursement para sa paglalakbay sa kanilang ministeryo at sa personal na mga pangangailangan.

Sapol noong 1920, ang boluntaryong mga manggagawang ito ay nakagawa ng mahigit na siyam na bilyong Bibliya, mga aklat, magasin, at pulyeto sa mga 200 wika para sa pamamahagi sa buong daigdig. Ginagawa nila ang kanilang bahagi upang ang walang hanggang mabuting balita ay maipangaral bilang masasayang pabalita sa bawa’t bansa at tribo at wika at bayan.​—Apocalipsis 14:6, 7.

● Anong mga paglimbag ang ginagawa ng Watch Tower Society, at bakit?

● Sino ang gumagawa ng lahat ng gawaing ito, at paano sila tinutustusan sa buhay?

[Mga larawan sa pahina 24]

Mga boluntaryo na gumagawa ng iba’t ibang mga gawaing kaugnay ng produksyon ng literatura sa Bibliya sa pabrika, tahanan, opisina, at taniman, sa Brooklyn at Wallkill, New York, E.U.A.

[Mga larawan sa pahina 25]

Mga boluntaryo na gumagawa ng iba’t ibang gawain na tuwiran o di-tuwiran na kasangkot sa paggawa ng Bibliya at literatura sa Bibliya

Espanya

Alemanya

Pinlandya

Canada

Denmarka

Sweden

Timog Aprika

Brazil

Olanda

Australia