Nais ni Satanas na magsagawa ka ng mahika. Marami ang naghahain sa mga ninuno o sa mga espiritu upang ipagsanggalang sila mula sa kapinsalaan. Ginagawa nila ito sapagkat kinatatakutan nila ang mga kapangyarihan sa daigdig ng mga espiritu. Sila’y nagsusuot ng mga singsing o mga pulseras na pangmahika. Iniinom nila o ipinapahid sa kanilang mga katawan ang “mga medisina” na diumano’y nagtataglay ng kapangyarihang pangmahika. Sa kanilang mga tahanan o sa lupa, itinatago ng ilang tao ang mga kasangkapang pinaniniwalaang may mga kapangyarihang magbigay ng proteksiyon. Ang iba’y gumagamit ng “medisina” na pangmahika sapagkat sila’y naniniwala na ito’y magdudulot ng tagumpay sa negosyo, sa mga pagsusulit sa paaralan, o sa panliligaw.

Ang iyong pinakamabisang proteksiyon laban kay Satanas ay ang maging kaibigan ka ni Jehova. Ang Diyos na Jehova at ang kaniyang mga anghel ay makapupong makapangyarihan kaysa kay Satanas at sa kaniyang mga demonyo. (Santiago 2:​19; Apocalipsis 12:9) Si Jehova ay nananabik na ipakita ang kaniyang lakas sa kapakanan ng kaniyang mga kaibigan​—yaong mga lubos na tapat sa kaniya.​—2 Cronica 16:9.

Ang Salita ng Diyos ay nagsasabi: “Huwag kayong magsasagawa ng mahika.” Hinahatulan ni Jehova ang mahika at pangkukulam sapagkat ang mga gawaing ito ay maaaring tuwirang maglagay sa isa sa ilalim ng kapangyarihan ni Satanas na Diyablo.​—Levitico 19:26.